ដោយៈ យោធិន / កំពង់ចាមៈ ​ប្រជាពលរដ្ឋ ឃុំ​រកា​គយ និង​ឃុំ​ពាមជីកង ស្រុក​កងមាស ខេត្តកំពង់ចាម ទទួលបាន​សមិទ្ធផល​ថ្មី​មួយទៀត គឺ​ស្ពាន​បា​ឡេ ឆ្លងកាត់​ព្រែក​ដំណាក់​ល្អិត ដែលជា​អំណោយ​ដ៏​ថ្លៃថ្លា​របស់ សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រ​កម្ពុជា និង​សម្តេច​កិត្តិ​ព្រឹទ្ធ​បណ្ឌិត ប៊ុន រ៉ានី ហ៊ុន សែន ប្រធាន​កាកបាទ ក្រហម​កម្ពុជា​។​

​ប្រជាពលរដ្ឋ​ទាំងពីរ​ឃុំ​ខាងលើ បាននាំគ្នា​មក​អបអរ​សមិទ្ធផល​ថ្មី ស្ពាន​បា​ឡេ​ដែល​ពួកគាត់ ទើប​ទទួលបាន​នេះ យ៉ាង​អ​ធឹ​ក​អធម នា​ព្រឹក​ថ្ងៃទី​២២ ខែកក្កដា ឆ្នាំ​២០២២ ក្នុង​ពិធី​សម្ពោធ ដាក់ឱ្យ​ប្រើប្រាស់​ជា​ផ្លូវការ ក្រោម​វត្តមាន​លោក​បណ្ឌិតសភា​ចា​រ្យ ហង់​ជួន ណា​រ៉ុ​ន រដ្ឋមន្ត្រីក្រសួង​អប់រំ យុវជន និង​កីឡា និង​ជា​ប្រធាន​ក្រុមការងារ​ថ្នាក់ជាតិ ចុះជួយ​ស្រុក​កងមាស ។​

​សូមបញ្ជាក់ថាៈ ស្ពាន​បា​ឡេ​ថ្មី ដែល​ទើប​កសាង​រួច​នេះ មាន​ឈ្មោះថា ស្ពាន​សាមគ្គី ដំណាក់​ល្អិត ដែល​ដឹកនាំ​កសាង​ដោយ​លោក ឧ​ត្ត​ម​សេនីយ៍​ឯក គង់ អៀង ទីប្រឹក្សា​សម្តេច តេ​ជោ អនុប្រធាននាយកដ្ឋាន​វិស្វកម្ម ក្រសួងការពារជាតិ មាន​បណ្តោយ ៥៤ ម៉ែត្រ ទទឹង ៤,២ ម៉ែត្រ មាន​បំពាក់​អំពូល​ភ្លើង ប្រើ​ថាមពលព្រះអាទិត្យ ជាច្រើន​អំពូល​ទៀតផង ។​

​ថ្លែង​ក្នុង​ពិធី​សម្ពាធ​នេះ លោក​បណ្ឌិតសភា​ចា​រ្យ ហង់​ជួន ណា​រ៉ុ​ន បានលើកឡើង​ថាៈ សមិទ្ធផល​ថ្មីៗ ដែល​ប្រជាពលរដ្ឋ ឃុំ​រកា​គយ និង​ឃុំ​ពាមជីកង ទទួល​បានជា​បន្តបន្ទាប់ ពី​រាជរដ្ឋាភិបាល​នេះ ដោយសារ​ប្រទេសជាតិ មាន​សុខសន្តិភាព រាជរដ្ឋាភិបាល​ដឹកនាំ​ដោយ សម្តេច​តេ​ជោ ធ្វើឱ្យ​សេដ្ឋកិច្ចជាតិ មានការ​រីកចំរើន​ជា​លំដាប់​។​

​លោក ហង់​ជួន ណា​រ៉ុ​ន បាន​ផ្តាំផ្ញើ​ប្រជាពលរដ្ឋ​មួលដ្ឋាន ឱ្យ​រួមគ្នា​ថែរក្សា​សមិទ្ធផល ក្នុង​មូលដ្ឋាន និង​ខិតខំ​រួមគ្នា​ថែរក្សា ការពារ​សុខសន្តិភាព អោយបាន​គង់វង្ស ស្ថិតស្ថេរ បន្ត​ដល់​កូនចៅ​ជំនាន់​ក្រោយៗ​ទៀត ។​

​ក្នុង​ពិធី​សម្ពាធ​នេះដែរ លោក ហង់​ជួន ណា​រ៉ុ​ន ក៏បាន​ជម្រាបជូន ប្រជាពលរដ្ឋ​ថា សំរាប់​ឆ្នាំ ២០២៣ ខាងមុខនេះ រាជរដ្ឋាភិបាល នឹង​ជួយ​ស្ថាបនា​ស្ពានបេតុង មួយកន្លែង​ទៀត ដែលមាន​ទទឹង ៩,៩០ ម៉ែត្រ និង​បណ្តោយ ១៥០ ម៉ែត្រ ជូន​ប្រជាពលរដ្ឋ​មូលដ្ឋាន ឃុំ​អង្គរ​បាន ស្រុក​កងមាស​ផងដែរ​។​

​យោងតាម​របាយការណ៍​មូលដ្ឋាន ក៏ដូចជា ការបញ្ជាក់​របស់លោក​ឧ​ត្ត​ម​សេនីយ៍​ឯក គង់ អៀង បានឱ្យដឹងថា ស្ពាន​សាមគ្គី​ដំណាក់​ល្អិត​នេះ ជា​ស្ពាន​ឆ្លងកាត់​ព្រែក ស្ថិតនៅ​ចន្លោះ ភូមិ​ដំណាក់​ល្អិត ឃុំ​រកា​គយ និង​ភូមិ​ដំណាក់​ជ្រៃ ឃុំ​ពាមជីកង​។ ក្នុង​ដំណើរការ​សាងសង់ ក្រៅពី​ថវិកា​របស់​សម្តេច​តេ​ជោ ក៏មាន​ការចូលរួម​ជួយ​ជា​ឈើ​គគីរ សំរាប់​ក្រាល​ស្ពាន​នេះ ពី​សំណាក់​ព្រះសង្ឃ និង​ប្រជាពលរដ្ឋ​មូលដ្ឋាន​ផងដែរ​។
​ប្រភព​ដដែល បានបញ្ជាក់​ទៀតថាៈ មុន​ទទួលបាន​ស្ពាន​នេះ ប្រជាពលរដ្ឋ​ក្នុង​មូលដ្ឋាន និង​អ្នកធ្វើដំណើរ​ឆ្លងកាត់​ផ្លូវ​នេះ ជួប​ការលំបាក​បំផុត ព្រោះ​ត្រូវ​ធ្វើដំណើរ​ឆ្លងកាត់ ស្ពាន​ចាស់​នោះ ដែលជា​ស្ពាន ធ្វើ​អំពី​ឈើ មាន​ទទឹង​តែ​ជាង​មួយ​ម៉ែត្រ​ប៉ុណ្ណោះ​។​

​ប្រជាពលរដ្ឋ​មូលដ្ឋាន បាន​សំដែង​ទឹកចិត្ត​រីករាយ​ថាៈ តាមរយៈ​ស្ពាន​ថ្មី​នេះ នឹង​ជួយ​សំរួល ឱ្យ​ដំណើរ​ការកសាង​ជីវភាព​រស់នៅ​របស់​ពួកគាត់ បាន​ងាយស្រួល និង​ធូរធារ​ឆាប់រហ័ស​។​

​ក្នុង​ពិធី​សម្ពោធ​នេះ វិស្វករ និង​កងកំលាំង​ក្នុង​កងវិស្វកម្ម ក្រសួងការពារជាតិ ដែលមាន​ស្នាដៃ ក្នុងការ​ស្ថាបនា​ផ្លូវ​ស្ពាន កន្លងមក​នោះ ទទួលបាន​គ្រឿង​ឥស្សរិយយស ពី​រាជរដ្ឋាភិបាល ដែល​បំពាក់​ជូន​ដោយ​លោក​បណ្ឌិតសភា​ចា​រ្យ ហង់​ជួន ណា​រ៉ុ​ន ៕/V​