ដោយ​៖ ម៉េង​ឆៃ / ភ្នំពេញ​៖ នៅក្នុង​សប្តាហ៍​នេះ មាន​ព្រឹត្តិការណ៍​ជាតិ​សំខាន់ៗ បានកើត​ឡើង ។ ក្នុងនោះ មាន​សន្និបាត​វិសាមញ្ញ​របស់ គណៈកម្មាធិការ​កណ្ដាល គណបក្ស​ប្រជាជន​កម្ពុជា និង​ករណី​បុរស​ជនជាតិ​នី​ហ្សេ​រី​យ៉ា ដែល​កើត​ជំងឺ​អុត​ស្វា រត់គេច​ពី​ប្រទេស​ថៃ ត្រូវបាន​រកឃើញ នៅ​ភ្នំពេញ ជាដើម​។​

១- គណបក្ស​ប្រជាជន​កម្ពុជា ណែនាំ​ដល់​មន្ត្រី​របស់ខ្លួន​ទាំងអស់ បន្ត​ខិតខំ​បម្រើប្រជាជន ឱ្យ​អស់ពី​ចិត្ត​ពី​ថ្លើម

​សន្និបាត​វិសាមញ្ញ​របស់ គណៈកម្មាធិការ​កណ្ដាល គណបក្ស​ប្រជាជន​កម្ពុជា ដែល​ដឹកនាំ​ដោយ​សម្តេច​តេ​ជោ ហ៊ុន សែន ប្រធាន​គណបក្ស និង​ជា​នាយករដ្ឋមន្ត្រី កាលពី​ថ្ងៃ​សៅរ៍ និង​ថ្ងៃអាទិត្យ ទី​១៦ និង​ថ្ងៃទី​១៧ ខែកក្កដា សម្រេចបាន​ជោគជ័យ និង​ផ្លែផ្កា គួរអោយកត់សម្គាល់​។ ក្នុងនោះ គណបក្ស​ប្រជាជន​កម្ពុជា នៅតែ​ណែនាំ​ដល់​មន្ត្រី របស់ខ្លួន​ទាំងអស់ រួមគ្នា​លើកកម្ពស់​សាមគ្គីភាព ឯកភាព​ផ្ទៃក្នុង របស់​គណបក្ស ដោយ​បន្ត​ជំរុញ​អនុវត្ត កម្មវិធី​នយោបាយ​នានា ដោយ​ឥត​ថមថយ និង​ខិតខំ​បម្រើប្រជាជន ឱ្យ​អស់ពី​ចិត្ត​ពី​ថ្លើម​។​

២-​រដ្ឋាភិបាល​ជប៉ុន ប្រកាស​ធ្វើ​កិច្ចសហការ ជួយ​កម្ពុជា រៀបចំ​កិច្ចប្រជុំ​កំពូល​អាស៊ាន និង​កិច្ចប្រជុំ​ពាក់ព័ន្ធ ឱ្យ​ទទួលបាន​ជោគជ័យ

​រដ្ឋាភិបាល​ជប៉ុន តាមរយៈ​ឯកអគ្គរដ្ឋទូត​របស់​ខ្លួន ប្រចាំ​កម្ពុជា បាន​អះអាង​ចំពោះ​ប្រមុខ ការទូត​កម្ពុជា ថា​ប្រទេស​ជប៉ុន នឹង​បន្ត​ជួយ​ជ្រោមជ្រែង ដល់​ប្រទេស​កម្ពុជា ក្នុងនាម​ជា ប្រធាន​អាស៊ាន នៅ​ឆ្នាំ​២០២២​នេះ ដើម្បី​រៀបចំ​កិច្ចប្រជុំ​កំពូល​អាស៊ាន និង​កិច្ចប្រជុំ​ពាក់ព័ន្ធ ផ្សេងទៀត នៅលើ​ទឹកដី​កម្ពុជា នា​ដើមខែ​សីហា ខាងមុខ ឱ្យ​ទទួលបាន​ជោគជ័យ​។ ជាមួយគ្នានេះ ភាគី​ជប៉ុន និង​កម្ពុជា ក៏បាន​ផ្លាស់ប្តូរ​ទស្សន​ទៅវិញទៅមក សំដៅ​ជំរុញ​បង្កើន កិច្ចសហការ​ទ្វេភាគី ក៏ដូចជា​ការរៀបចំ​ផែនការ សម្រាប់​ដំណើរ​ទស្សនកិច្ច​ផ្លូវការ​របស់ រដ្ឋមន្ត្រីការបរទេស​ជប៉ុន មកកាន់​កម្ពុជា និង​ការរៀបចំ​ពិធី​ចុះហត្ថលេខា លើ​លិខិត​ប្តូរ​សារ និង​ឯកសារ​ពាក់ព័ន្ធ ស្តីពី​ការផ្តល់​ឥណទាន​សម្បទា​ន ប្រាក់​យ៉េន​របស់​ជប៉ុន មកកាន់​កម្ពុជា នាពេលខាងមុខ​ផងដែរ​។​

៣- ផ្លូវ​ល្បឿន​លឿន ភ្នំពេញ​-​ព្រះសីហនុ គ្រោង​ដាក់ឱ្យ​ប្រើប្រាស់ ជា​បណ្ដោះអាសន្ន នៅ​ដើមខែ​តុលា ឆ្នាំ​២០២២ នេះ

​លោក ស៊ុន ចាន់ថុល រដ្ឋមន្ដ្រីក្រសួង​សាធារណការ និង​ដឹកជញ្ជូន បាន​អញ្ជើញ​ត្រួតពិនិត្យ វឌ្ឍនភាព ផ្លូវ​ល្បឿន​លឿន ភ្នំពេញ​-​ព្រះសីហនុ កាលពី​ថ្ងៃទី​១៩ ខែកក្កដា​។ ការសាងសង់ ផ្លូវ​ល្បឿន​លឿន មកដល់ពេលនេះ បានសម្រេច ៩៥ ភាគរយ ផ្លូវ​ល្បឿន​លឿន ភ្នំពេញ​-​ព្រះសីហនុ ហើយ​គ្រោង​ដាក់ឱ្យ​ដំណើរការ​ប្រើប្រាស់ ជា​បណ្ដោះអាសន្ន នៅ​ដើមខែ​តុលា ឆ្នាំ​២០២២ នេះ​។ ប្រជាពលរដ្ឋ អាចធ្វើ​ដំណើរ​លើផ្លូវ Highway ដំបូង​បំផុត​នេះ ដោយ​មិន​បង់ថ្លៃ ក្នុង​រយៈពេល ១​ខែ​ដំបូង​ផងដែរ​។ ចាប់ពី​ខែវិច្ឆិកា​តទៅ ក្នុង​ឡាន ១​គ្រឿង ត្រូវ​បង់ថ្លៃ ចាប់ពី ១២​ដុល្លារ រហូតដល់ ៦០​ដុល្លារ ក្នុងពេល​ធ្វើដំណើរ ម្តង​ពី​ភ្នំពេញ​-​ក្រុងព្រះសីហនុ​។​

៤- កម្ពុជា រំពឹង​ខ្ពស់​លើ​ការនាំចេញ ផ្លែ​មៀន​ប៉ៃលិន ទៅកាន់​ប្រទេស​ចិន នៅក្នុង​ឆ្នាំនេះ

​ក្រសួងកសិកម្ម រុក្ខាប្រមាញ់ និង​នេសាទ បានប្រកាសថា ផ្លែ​មៀន​ប៉ៃលិន នឹង​អាច​នាំចេញ ទៅកាន់​ប្រទេស​ចិន បាន​នៅក្នុង​ឆ្នាំនេះ​។ ក្តី​រំពឹង​នេះ ធ្វើឡើង ដោយសារតែ​អគ្គ​រដ្ឋបាល គយ​ចិន បាន​វាយតម្លៃ​ចុងក្រោយ ឃើញថា ផ្លែ​មៀន​ប៉ៃលិន របស់​កម្ពុជា មានគុណ​ភាពល្អ និង​មិនមាន​សមាសភាព​ចង្រៃ ដែល​ប្រទេស​ចិន ហាមឃាត់​នោះទេ​។

៥-​សកលវិទ្យា​ល័យ គ្រើ​ក ប្រកាស​ផ្តល់​អាហារូបករណ៍ ៤០​កន្លែង ដល់​សិស្ស​និស្សិត​កម្ពុជា ទៅ​សិក្សា​នៅ​ប្រទេស​ថៃ

​សកលវិទ្យា​ល័យ គ្រើ​ក (Krirk) តាមរយៈ​លោក ក្រា​ស៊ែ ឆាណៈ​វង្ស សកលវិទ្យា​ធិ​ការ នៃ​សកល​វិទ្យាល័យ និង​ជា​សមាជិក​ក្រុមប្រឹក្សាភិបាល​នៃ​មជ្ឈមណ្ឌល​ត្រៀម​បង្ការ គ្រោះមហន្តរាយ​អាស៊ី ក្នុងឱកាស​ជួបពិភាក្សា​ការងារ ជាមួយ​សម្ដេច​តេ​ជោ ហ៊ុន សែន នាយករដ្ឋមន្ត្រី​កម្ពុជា កាលពី​ថ្ងៃទី​២០ ខែកក្កដា ដោយបាន​ប្រកាស​ផ្តល់​អាហារូបករណ៍ ៤០ កន្លែង ឱ្យ​សិស្ស​និស្សិត​កម្ពុជា ទៅ​សិក្សា​នៅ​ប្រទេស​ថៃ​។ ក្រៅពីនេះ លោក ក្រា​ស៊ែ ឆាណៈ​វង្ស ក៏បាន​ស្នើសុំ​អនុសាសន៍ និង​ជម្រាប​ពី​បច្ចុប្បន្នភាព នៃ​ការវិវត្តន៍​ចុងក្រោយ​របស់ មជ្ឈមណ្ឌល​ត្រៀម​បង្ការ​គ្រោះមហន្តរាយ​អាស៊ី ជូន​សម្តេចនាយក​រដ្ឋមន្ត្រី​កម្ពុជា ផងដែរ​។​

៦-​គណៈប្រតិភូ​ជាន់ខ្ពស់ មកពី ៣៨​ប្រទេស នឹង​អញ្ជើញ​ចូលរួម​កិច្ចប្រជុំ​រដ្ឋមន្ដ្រីការបរទេស អាស៊ាន លើក​ទី​៥៥ និង​កិច្ចប្រជុំ​ពាក់ព័ន្ធ​នានា នៅ​កម្ពុជា នៅ​ដើមខែ​សីហា​ខាងមុខ

​មន្ត្រីជាន់ខ្ពស់​ក្រសួងការបរទេស និង​សហ​ប្រតិ​ប​ត្ដិ​ការ​អន្ដរជាតិ​កម្ពុជា បាន​បញ្ជាក់ថា កិច្ចប្រជុំ​រដ្ឋមន្ដ្រី​ការ បរទេស​អាស៊ាន លើក​ទី​៥៥ និង​កិច្ចប្រជុំ​ពាក់ព័ន្ធ​នានា ដែល​កម្ពុជា ធ្វើជា​ម្ចាស់ផ្ទះ នៅ​ឆ្នាំ​២០២២​នេះ បាន​ត្រៀម​រៀបចំ​រួចរាល់​ហើយ​។ តាម​កម្មវិធី​ដែល​បានគ្រោង​ទុក កិច្ចប្រជុំ​រដ្ឋមន្ដ្រីការបរទេស​អាស៊ាន លើក​ទី​៥៥ និង​កិច្ចប្រជុំ​ពាក់ព័ន្ធ​នានា នឹង​រៀបចំ​ធ្វើ​ចាប់ពី​ថ្ងៃទី​៣១ ខែកក្កដា ដល់​ថ្ងៃទី​០៦ ខែសីហា ឆ្នាំ​២០២២ ខាងមុខ នៅ​កម្ពុជា ដោយមាន​វត្តមាន​គណៈ​ប្រតិភូ​ជាន់ខ្ពស់ មកពី ៣៨​ប្រទេស ចូលរួម​រាប់ទាំង រដ្ឋមន្ត្រីការបរទេស​រុស្ស៊ី ក៏ដូចជា មន្ត្រីជាន់ខ្ពស់​ចក្រភព​អង់គ្លេស ដែលជា​ដៃគូ​របស់​អា​ស៊ា ន​លើក​ទី​១ និង​បណ្តា​មន្ត្រីជាន់ខ្ពស់ នៃ​ប្រទេស​ជា​ដៃគូ របស់​អាស៊ាន​ផ្សេងទៀត មកពី​ម​ជ្ឈឹ​ម​បូព៌ា និង​អឺរ៉ុប​ផងដែរ​។​

៧- អភិបាល​រាជធានី​ភ្នំពេញ ជំរុញ​ឲ្យ​មន្ត្រី​ជំនាញ និង​អាជ្ញាធរ​ខណ្ឌ ពិនិត្យ​មើលថែ​ដើមឈើ នៅតាម​ដងផ្លូវ និង​សួន​សាធារណៈ​អភិបាល​រាជធានី​ភ្នំពេញ បាន​ជំ​រុញអោយ​មន្ទីរ​កសិក​ម្ម រុក្ខាប្រមាញ់ និង​នេសាទ និង​អាជ្ញាធរ​ខណ្ឌ​ទាំង​១៤ យកចិត្តទុកដាក់ ពិនិត្យ​មើលថែ​ដើមឈើ គ្រប់​ប្រភេទ ដែល​បាន​ដាំ​រួច នៅតាម​ដងផ្លូវ និង​សួន​សាធារណៈ​នានា ជាពិសេស​ត្រូវ​បំផុស ឲ្យ​ពលរដ្ឋ ចេះ​ស្រលាញ់ និង​មើលថែ​ដើមឈើ​។ ការជំរុញ​បែបនេះ បានធ្វើ​ឡើង ក្នុង​ពិធី​ដាំ​ដើមឈើ អបអរសាទរ​រុក្ខទិវា ថ្ងៃ​៩​កក្កដា នៅ​បរិវេណ​វត្ត​ភ្នៀ​ត​សិម្ពលី ក្នុង​ខណ្ឌ​កំបូល នា​ថ្ងៃទី​២១ ខែកក្កដា ឆ្នាំ​២០២២​។

៨-​ប្រទេស​មី​យ៉ាន់​ម៉ា បានសម្រេច​ជា​ផ្លូវការ​ហើយ មិន​បញ្ជូន​អ្នកតំណាង​មិនមែន​កម្រិត នយោបាយ មក​ចូលរួម​កិច្ចប្រជុំ រដ្ឋមន្ត្រីការបរទេស​អាស៊ាន នៅ​កម្ពុជា​នោះទេ

​នៅ​ទីបំផុត​ទៅ ប្រទេស​ប្រទេស​មី​យ៉ាន់​ម៉ា បានសម្រេច​ជា​ផ្លូវការ​ហើយ​ថា ខ្លួន​នឹងមិន​បញ្ជូន អ្នកតំណាង​មិនមែន​កម្រិត​នយោបាយ មក​ចូលរួម​កិច្ចប្រជុំ​រដ្ឋមន្ត្រីការបរទេស​អាស៊ាន និង​កិច្ចប្រជុំ​ពាក់ព័ន្ធ នៅ​កម្ពុជា នា​ដើមខែ​សីហា ខាងមុខ​ទេ​។ ការសម្រេច​បដិសេធ របស់​មី​យ៉ាន់​ម៉ា​នេះ ធ្វើឡើង​ក្រោយពេល​រដ្ឋ ជា​សមាជិក​អាស៊ាន​ទាំង ៩ ផ្សេងទៀត បាន​មូលមតិ​គ្នា មិន​អញ្ជើញ​រដ្ឋមន្ត្រីការបរទេស​របស់​មី​យ៉ាន់ មក​ចូលរួម​ប្រជុំ​នោះទេ ដោយ​អនុញ្ញាតអោយ​ត្រឹមតែ​អ្នកតំណាង មិនមែន​កម្រិត​នយោបាយ អោយមក​ចូលរួម ជំនួស​។ ហេតុផល គឺ​ប្រទេស​មី​យ៉ាន់​ម៉ា ឬ​ប្រទេស​ភូមា មិនបាន​ធ្វើអោយមាន​ភា​ព ប្រសើរឡើង នូវ​ការឯកភាព ៥​ចំនុច ដែល​ប្រទេស​នេះ សន្យាថា នឹងធ្វើ​រួមគ្នា ជាមួយ​អាស៊ាន​។​

៩-​ព្រឹទ្ធសភា​កម្ពុជា បដិសេធ​ទាំងស្រុង ចំពោះ​ខ្លឹមសារ​ច្បាប់​ប្រជាធិបតេយ្យ និង​សិទ្ធិមនុស្ស​កម្ពុជា ឆ្នាំ​២០២២ របស់​ព្រឹទ្ធសភា​អាមេរិក​

​អ្នកនាំពាក្យ​ព្រឹទ្ធសភា​កម្ពុជា កាលពី​យប់ ថ្ងៃទី​២២ ខែកក្កដា ឆ្នាំ​២០២២ បានចេញ សេចក្តីថ្លែងការណ៍ ឆ្លើយតប​ទៅ​គណៈកម្មការ​កិច្ចការបរទេស នៃ​ព្រឹទ្ធសភា​សហរដ្ឋអាមេរិក ដែល​បានអនុម័ត ច្បាប់​ប្រជាធិបតេយ្យ និង​សិទ្ធិមនុស្ស​កម្ពុជា ឆ្នាំ​២០២២ នាពេល​ថ្មីៗ​នេះ​។ ច្បាប់​ថ្មី​របស់​សហរដ្ឋអាមេរិក​នេះ ត្រូវបាន​ព្រឹទ្ធសភា​កម្ពុជា ចាត់ទុកថា ព្រឹទ្ធសភា​អាមេរិក ធ្វើឡើង ដោយ​ផ្អែកលើ​ហេតុផល ភូមិសាស្ត្រ​នយោបាយ ជាង​គុណ​តម្លៃ​សិទ្ធិមនុស្ស​។​

១០-​បុរស​ជនជាតិ​នី​ហ្សេ​រី​យ៉ា ដែល​កើត​ជំងឺ​អុត​ស្វា រត់គេច​ពី​ប្រទេស​ថៃ ត្រូវបាន​រកឃើញ នៅផ្ទះ​សំណាក់​មួយ នៅ​ភ្នំពេញ​

​បុរស​ជនជាតិ​នី​ហ្សេ​រី​យ៉ា ដែល​កើត​ជំងឺ​អុត​ស្វា រត់គេច​ពី​ប្រទេស​ថៃ ចូលមក​ប្រទេស​កម្ពុជា នោះ ត្រូវបាន​កម្លាំង​សមត្ថកិច្ច រកឃើញ និង​ឃាត់ខ្លួន នៅ​ព្រលប់ ថ្ងៃទី​២៣ ខែកក្កដា ឆ្នាំ​២០២២ នៅក្នុង​ផ្ទះសំណាក់ ពណ៌​មាស ម្ដុំ​ផ្សារ​ដើមថ្កូវ ខណ្ឌចំការមន រាជធានី​ភ្នំពេញ​។ ក្រោយពេល​ឃាត់ខ្លួន ជនជាតិ​នី​ហ្សេ​រី​យ៉ា​រូបនេះ ត្រូវបាន​ប្រគល់ជូន​មន្ដ្រី​ជំនាញ របស់​ក្រសួងសុខាភិបាល ដើម្បី​អនុវត្ត​វិធាន​ការបន្ដ​។ នេះ​ជា​ករណី​ដំបូង​ហើយ ដែល​រកឃើញ​អ្នកជំងឺ​អ៊ុត​ស្វា នៅក្នុង​ប្រទេស​កម្ពុជា​យើង​។ បុរស​នី​ហ្សេ​រី​យ៉ា ដែល​កើត​ជំងឺ អុត​ស្វា​នោះ ត្រូវបានធ្វើ​រោគវិនិច្ឆ័យ ដោយ​អាជ្ញាធរ​សុខាភិបាល​ថៃ ហើយ​បានគេច​ខ្លួន តាំងពី​យប់​ថ្ងៃទី​២២ ខែកក្កដា ឆ្នាំ​២០២២៕/V​