​ប្រែ​សម្រួលៈ​បំណង​(​ដេល្លី​ម៉េល​)៖ ពលរដ្ឋ​អាម៉េរិក​ពីរ​នាក់​បាន​ស្លាប់​កាលពី​ពេល​ថ្មីៗ​នៅ​តំបន់​ដុន​បាស​នៅ​អ៊ុយ​ក្រែន​ខាងកើត នេះ​បើ​តាម​ការបញ្ជាក់​ពី​អ្នកនាំពាក្យ​ក្រសួងការបរទេស​អាម៉េរិក​ម្នាក់​កាល​​ពី​ថ្ងៃ​សៅរ៍​។​

​ដោយ​មិន​បានបញ្ជាក់ថា​តើ​អ្នក​ទាំង​ពីរ​ស្លាប់​ដោយ​របៀប​ណា អ្នកនាំពាក្យ​គ្រាន់តែ​បាន​និយាយថា រដ្ឋាភិបាល​អាម៉េរិក​បាន​ទាក់ទង​ទៅ​គ្រួសារ​អ្នក​បាត់បង់​ជីវិត​និង​បាន​ផ្តល់​ជំនួយ​ឧបត្ថម្ភ​។​

​សូមបញ្ជាក់​ថា អ៊ុយ​ក្រែន​បាន​ស្ថិតក្រោម​ការវាយប្រហារ​ពី​កងកម្លាំង​រុស្ស៊ី​អស់​ជិត​ប្រាំ​ខែ​មក​ហើយ​នៅក្នុង​អ្វី​ដែល​រដ្ឋាភិបាល​ទីក្រុង​មូ​ស្គូ​ហៅថា​«​ប្រតិបត្តិការ​យោធា​ពិសេស​»​មួយ​ដើម្បី​ដក​អាវុធ​ចេញពី​​អ៊ុយ​ក្រែ​ន​និង​កំ​ចាត់ចោល​គំនិត​ជាតិនិយម​ប្រឆាំង​រុស្ស៊ី​ជំរុញ​ឡើង​ដោយ​លោកខាងលិច​។​

​ជនជាតិ​អាម៉េរិក​និង​ទាហាន​ស៊ីឈ្នួល​ជា​ច្រើន​បាន​ស្ម័គ្រចិត្ត​ទៅ​រួម​ប្រយុទ្ធ​ជាមួយ​កងកម្លាំង​អ៊ុ​យក្រែន ទោះជា​មាន​ការព្រមាន​កុំអោយ​កាន់​អាវុធ​ចូល​សមរភូមិ​ក្តី​។​ជនជាតិ​អាម៉េរិក​ម្នាក់​បាន​សម្លាប់​ក្នុង​​ការប្រយុទ្ធ​កាលពី​ខែ​ឧសភា ក្រោយ​បាន​ចូលរួម​ជាមួយ​យុទ្ធជន​បរទេស​រាប់ពាន់​នាក់​ដើម្បី​ជួយ​អ៊ុយ​ក្រែនត​ទល់​នឹង​កងក​ម្លាំង​រុស្ស៊ី​។

​យុទ្ធជន​បរទេស​រាប់​ពាន់​នាក់​បាន​ធ្វើដំណើរ​ទៅ​ចូលរួម​ប្រយុទ្ធ​ជាមួយ​កងកម្លាំង​អ៊ុយ​ក្រែ​នទល់នឹងទាហានរុ​ស្ស៊ី

​ព័ត៌មាន​ស្តី​ការស្លាប់ជ​ន​ជាតិ​អាម៉េរិក​នៅ​តំបន់​ប្រយុទ្ធ​គ្នា​នៅ​អ៊ុយ​ក្រែន​ខាងកើត​នេះ​កើតឡើង​ចំ​ពេល​គណៈប្រតិភូ​សភា​អាម៉េរិក​មួយ​បាន​ជួប​ប្រធានាធិបតី​អ៊ុយ​ក្រែនលោក​ហ្សេ​លេន​ស្គី នៅ​ទីក្រុង​គៀវ​​កាលពី​ថ្ងៃ​សៅរ៍ ដើម្បី​ធានា​អំពី​ការ​បន្ត​គាំទ្រ​របស់​អាម៉េរិក​ក្នុងការ​ធ្វើ​សង្គ្រាម​ប្រឆាំង​រុស្ស៊ី​។​

​គណៈប្រតិភូ​នេះ​បាន​និយាយ​នៅក្នុង​សេចក្តីថ្លែងការណ៍​មួយ​ថា « សហរដ្ឋ​អាម៉េរិក រួម​ជាមួយ​សម្ពន្ធមិត្ត​និង​ដៃគូ​នៅ​ជុំវិញ​ពិភពលោក ឈរ​នៅ​ជាមួយ​អ៊ុយ​ក្រែន​ក្នុង​ការផ្តល់​ជំនួយ​សេដ្ឋកិច្ច យោធា​និង​​មនុស្សធម៌​។​យើង​នឹង​បន្ត​ស្វះស្វែង​រក​វិធី​គាំទ្រ​ប្រធានាធិបតី​ហ្សេ​លេន​ស្គី និង​ប្រជាជន​អ៊ុយ​ក្រែន​អោយមាន​ប្រសិទ្ធភាព នៅ​ពេល​ពួកគេ​បន្ត​បង្ហាញ​សេចក្តីក្លាហាន​របស់​គេ​»​។​

​ដំណើរ​ទស្សនកិច្ច​បង្ហា​ញ​ការគាំទ្រ​នេះ​កើតឡើង​ក្រោយ​រដ្ឋមន្ត្រី​ការពារ​ជាតិ​អាម៉េរិក​កាលពី​ថ្ងៃ​ពុធ​បាន​និយាយថា រដ្ឋាភិបាល​ទីក្រុង​វ៉ាស៊ីនតោន​នឹង​បញ្ជូន​ប្រព័ន្ឌ​រ៉ុក្កែត​ចល័ត​ខ្ពស់​ចំនួន​បួន​ឈុត​ទៀត​រួមទាំងដ្រូបអត្តឃាតរាប់រយគ្រឿង​ទៅកាន់​អ៊ុ​យក្រែន ដែល​នឹង​ធ្វើអោយ​អាម៉េរិក​ផ្តល់​សព្វាវុធ​ប្រទេស​នេះ​ដល់​អ៊ុយ​ក្រែន​ឡើងដល់​១៦​គ្រឿង​៕