​ប្រែ​សម្រួលៈ​បំណង​(Xinhua,BLOOMBERG)៖ ក្នុង​សន្និសីទកាសែត​មួយ​របស់​ក្រុម​បង្ការ​និង​គ្រប់គ្រង​កូវី​ដ​១៩​កាលពី​ថ្ងៃ​សៅរ៍ អ្នកជំនាញការ​និង​ពួក​មន្ត្រី​ចិន​បាន​អះអាង​ថា​វ៉ាក់សាំង​កូវី​ដ​១៩​ផលិត​នៅ​ចិន​​មាន​សុវត្ថិភាព​និង​ប្រសិទ្ធភាព ហើយ​បើ​តាម​លោក​ចេង យី​ស៊ីន​(Zeng Yixin)​នៅ​គណៈកម្មាធិការ​សុខាភិបាល​ជាតិ​បានបញ្ជាក់​ថា មេដឹកនាំ​របស់​ខ្លួន​ទាំងអស់​បាន​ទទួល​វ៉ាក់សាំង​កូវី​ដ​១៩​ផលិត​ក្នុង​​ស្រុក​ដោយសារ​តែ​ពួកលោក​«​មាន​ជំនឿ​ខ្ពស់​»​លើ​វ៉ាក់សាំង​ផលិត​ក្នុងស្រុក ។​

​លោក​ក៏​បាន​ដោះស្រាយ​ការព្រួយបារម្ភ​ជុំវិញ​ការចាក់​វ៉ាក់សាំង​ចិន ដោយ​ថា​វា​មិន​បង្ក​ជំងឺ ដូចជា​រោគ​កោសិកា​ស​និង​ទឹកនោម​ផ្អែម​ដូច​ពាក្យ​ចចាមអារ៉ាម​ទេ​។​

​ក្រសួងការបរទេស​ចិន​កន្លងមក​បាន​បដិសេធ​អំពី​ឋានៈ​វ៉ាក់សាំង​របស់​លោក​ប្រធានាធិបតី​ស៊ី ហើយ​ការទម្លាយ​អោយដឹង​នេះ​ទំនងជា​ចង់​បង្ហាញ​គុណប្រយោជន៍​នៃ​វ៉ាក់សាំង​ចិន ព្រមទាំង​ភាព​ជឿន​​លឿន​ខាង​វិទ្យាសាស្ត្រ។

​លោក​ចេង យី​ស៊ីន​បានអោយដឹងថា តាំងពី​មុន​មក ប្រជាជន​ចិន​៩២,១​ភាគរយ​ បាន​ទទួល​វ៉ាក់សាំង​ដូសទី​មួយ​ ៨៩,៧​ភាគរយ​ចាក់​បាន​ពីរ​ដូសពេញ​លេញ​និង​៧១,៧​ភាគរយ​​បាន​ទទួលដូស​ជំរុញ​។​តែ​ក្នុងចំណោម​អ្នកមាន​អាយុ​៦០​ឆ្នាំ​ឡើង ៨៩,៦​ភាគរយ​បាន​ទទួល​វ៉ាក់សាំង​មួយ​ដូស ៨៤,៧​ភាគរយ​ចាក់​បាន​ពី​រដូស និង​៦៧,៣​ភាគរយ​បាន​ចាក់ដូស​ជំរុញ​។​

​លោក​ចេង​បាន​បន្ថែមថា «​មេដឹកនាំ​បក្ស​និង​រដ្ឋ​ទាំងអស់​សុទ្ធតែ​បាន​ចាក់​វ៉ាក់សាំង​ពេញលេញ​ប្រឆាំង​នឹង​វីរុស​កូរ៉ូណា ដោយ​ប្រើ​វ៉ាក់សាំង​ផលិត​ក្នុងស្រុក​»​ហើយ​ចិន​បច្ចុប្បន្ន​ក៏​កំពុង​ធ្វើ​ការសិក្សា​ស្រាវជ្រាវ​និង​ផលិត​វ៉ាក់សាំង​ប្រឆាំង​វីរុស​អូ​មី​ក្រុង​តាម​ផ្លូវ​បច្ចេកទេស​ជា​ច្រើន​។​

​ហ្វេ​ង ហ្ស៊ី​ជាំង (Feng Zijian) អនុប្រធាន​និង​ជា​អគ្គលេខា​សមាគម​វេជ្ជសាស្ត្រ​បង្ការ​ចិន​បាន​ប្រាប់​សន្និសីទ​កាសែត​ថា «​វ៉ាក់សាំង​ចិន​នៅតែ​អាច​ការពារ​អ្នក​ឆ្លង​មិន​អោយ​កើតកូ​វីដ​ធ្ងន់ធ្ងរ​និង​​ស្លាប់ បង្កឡើង​ដោយ​វីរុស​អូ​មី​ក្រុង​»​។​

​លោក​បាន​បន្តថា ចិន​កំពុង​ជំរុញ​ការសិក្សា​ស្រាវជ្រាវ​និង​អភិវឌ្ឍ​វ៉ាក់សាំង​ប្រឆាំង​វីរុស​អូ​មី​ក្រុង​យ៉ាង​ឆាប់រហ័ស​ផង​ដែរ​។​

​ចំណែក​លោក វ៉ាង ហ្វ៊ុយ​សេង នៅ​បណ្ឌិតសភា​វិទ្យាសាស្ត្រ​ចិន បាន​និយាយថា វ៉ាក់សាំង​កូវី​ដ​១៩​របស់​ចិន​មិន​នាំ​អោយ​កើតរោគ​កោសិកា​សនិងជំងឺ​ទឹកនោម​ផ្អែម​ទេ​។​លោក​ថា សារធាតុ​ក្នុង​វ៉ាក់សាំង​មាន​សុ​​វត្ថិ​ភាព​សំរាប់​មនុស្ស​និង​មិន​បង្ក​ជំងឺ​ដោយ​ផ្ទាល់​ទេ ហើយ​មាន​ការធានា​អំពី​សុវត្ថិភាព​គ្រប់គ្រាន់​និង​ទទួល​ស្គាល់​ពី​បណ្តា​អង្គការ​អន្តរជាតិ​ថែមទៀត៕

​ស្ត្រី​វ័យ​៨៩​ឆ្នាំ​ទទួល​វ៉ាក់សាំង​ផលិត​ក្នុងស្រុក​នៅ​ទីក្រុង​ប៉េកាំង​កាលពី​ថ្ងៃ​១៣​កក្កដា