​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ កាលពី​ថ្ងៃអាទិត្យ​ទី​២៤​កក្កដា​ចិន​បាន​បាញ់​បង្ហោះ​យាន​មន្ទីរពិសោធន៍​មួយ​ក្នុងចំណោម​យាន​មន្ទីរពិសោធន៍​ចំនួន​ពីរ​ដើម្បី​បំពេញ​ការសាងសង់​ស្ថានីយ​អវកាស​គោចរ​អចិន្ត្រៃយ៍​របស់​ខ្លួន​។​

​យាន វ៉េ​ន​ឆាន​(Wentian) ត្រូវ​បាន​បាញ់​បង្ហោះ​ពី​កោះ​ហៃ​ណាន ដោយ​មាន​ហ្វូង​អ្នក​ថតរូប​និង​អ្នក​ចូលចិត្ត​លំហ​អាកាស​ជា​ច្រើន​ឈរ​មើល​។ រចនា​ឡើង​សម្រាប់​ការពិសោធ​វិទ្យាសាស្ត្រ​និង​ជីវវិទ្យា យាន​​នេះ​ត្រូវបាន​បាញ់​បង្ហោះ​នៅលើ​រ៉ុក្កែត Long March 5B remote 3 និង​បាន​ចំណាយ​ពេល​ប្រហែល​ប្រាំបី​នាទី​ក្នុង​ការហោះហើរ​មុន​ពេល​វា​ចូល​គន្លង​តារាវិថី នេះ​បើ​យោងតាម​ទីភ្នាក់ងារ​សារព័ត៌​​មាន​ស៊ីន​ហួរ​ផ្លូវការ​។​

​យាន​មន្ទីរពិសោធន៍​ទី​ពីរ ហៅ​ថា​ម៉េង​ឆាន​( Mengtian) នឹង​ត្រូវ​បាញ់​បង្ហោះ​នៅ​ខែតុលា ហើយ​យាន​ទាំង​ពីរ​នឹង​ចូលរួម​ជាមួយ​ស្ថានីយ​អវកាស​ធៀន​ហ្គ​ង​( Tiangong)​។​អវកាសយានិក​បីនាក់​កំពុង​​រស់នៅ​ក្នុង​យាន​ស្នូល​រួចទៅហើយ ហើយ​នឹង​ត្រួតពិនិត្យ​ការ​មក​ដល់​និង​ការ​ចូល​ចត​នៃ​មន្ទីរពិសោធន៍​។​

​វា​ជា​ការបាញ់​បង្ហោះ​លើក​ទី​៣​ហើយ​ចាប់តាំងពី​ស្ថានីយ​អវកាស​ចិន​ចូលដល់​ដំណាក់កាល​សាងសង់​។ ការបាញ់​បង្ហោះ​នេះ​ត្រូវបាន​ធ្វើឡើង​ក្រោយ​ការបាញ់​បង្ហោះ​យាន​ដឹក​ទំនិញ​ធៀន​ចូ​វ​( Tianzhou) និង​យាន​សិនចូ​វ​-១៤( Shenzhou-14) ។​

​កម្មវិធី​អវកាស​របស់​ចិន​គឺ​ដំណើរការ​ដោយ​យោធា​របស់​បក្ស​កុម្មុយនីស្ត​កំពុងកាន់​អំណាច គឺ​កងទ័ព​រំដោះប្រជាជន ជា​ហេតុ​ជំរុញ​ឱ្យ​សហរដ្ឋ​អាម៉េរិក​ដក​ចិន​ចេញពី​ស្ថានីយ​អវកាស​អន្តរជាតិ​។ ជា​លទ្ធផល ចិន​ភាគច្រើន​ធ្វើ​ការងារ​ដោយ​ខ្លួនឯង​នៅក្នុង​កម្មវិធី​ស្ថានីយ​អវកាស Tiangong របស់ខ្លួន ដោយ​សាងសង់​និង​បន្ទាប់​មក​បោះបង់​ចោល​ស្ថានីយ​ពិសោធន៍​ចំនួន​ពីរ​មុនពេល​ចាប់ផ្តើម​ឡើង​វិញ​​លើ​ស្ថានីយ​អវកាស​ចុងក្រោយបង្អស់​នេះ​។​

​យាន​មន្ទីរពិសោធន៍​ទម្ងន់ ២៣ តោន​នេះ​គឺ​ធ្ងន់​ជាង​យាន​ណាៗ​ទាំងអស់​ដែល​បច្ចុប្បន្ន​កំពុង​ស្ថិត​នៅក្នុង​លំហ នេះ​បើ​យោង​តាម​សារព័ត៌មាន Global Times ដែល​គ្រប់គ្រង​ដោយ​រដ្ឋ​៕

​យាន Wentian ត្រូវ​បាន​បាញ់​បង្ហោះ​ពី​កោះ​ហៃ​ណាន​តាម​រ៉ុក្កែត Long March 5B remote 3 កាលពី​ថ្ងៃអាទិត្យ​