​ប្រែ​សម្រួលៈ​បំណង​(​បាងកក​ប៉ុស្តិ៍​)៖ ទីក្រុង​បាងកក​របស់​ថៃ​កំពុង​ប្រឈម​ការផ្ទុះកូ​វីដ​១៩​នៅ​រលក​ទី​ប្រាំមួយ ដោយ​នាំ​ការឆ្លង​មួយ​ថ្ងៃ​ជាង​១០.០០០​នាក់​មក​កាន់​ទីក្រុង​នេះ​ជាថ្មី​។​

​នៅ​ពេល​ថៃ​កំពុង​ដកចេញ​វិធានការ​ទប់ស្កាត់​ការឆ្លង​រាលដាល​ជំងឺ​នេះ ការចម្លង​ថ្មី​ជំរុញ​ឡើង​ដោយ​អនុ​មេរោគ​អូ​មី​ក្រុង​BA.5​នាំអោយ​ទីក្រុង​បាងកក​ស្ថិត​ក្នុង​ការប្រកាសអាសន្ន​អំពី​ការ​ផ្ទុះ​ជំងឺ​នេះ​​មួយ​ជុំ​ទៀត​។​ក្រុង​បាងកក​អាច​ប្រឈម​នឹង​ការឆ្លង​រាប់​ម៉ឺន​នាក់​នៅ​ពេល​ការឆ្លង​ឡើង​ដល់​កំពូល​ប្រហែល​ជា​នៅ​ចុងខែ​សីហា​។​

​វេជ្ជបណ្ឌិត​យ៉ុង ពូ​វ៉ូ​រ៉ា​វ៉ាន​(Yong Poovorawan)​ប្រធាន​មជ្ឈមណ្ឌល​វីរុស​វិទ្យា​នៅ​មហាវិទ្យាល័យ​វេជ្ជសាស្ត្រ​នៃ​សកល​វិទ្យាល័យ​ជូឡា​ឡុនកន​បាន​និយាយ​ថា ក្រុង​បាងកក​ឥឡូវ​តំណាងអោយ​ការឆ្លង​ពាក់​​កណ្តាល​នៃ​ការឆ្លង​នៅ​ទូទាំង​ប្រទេស​។​«​នេះ​ជា​សញ្ញា​មួយ​បង្ហាញ​ថា ជិត​នឹង​មាន​ការផ្ទុះកូ​វីដ​១៩​រលក​ថ្មី​មួយទៀត​។​ការ​ផ្កាស់​ប្តូរ​ពី​អូ​មី​ក្រុង​BA.2​មក​អូ​មី​ក្រុង​BA.5 ស្ថិត​នៅ​ពីក្រោយ​នៃ​ការឆ្លង​កើន​​ឡើង​»​។​

​ក្រសួង​សុខាភិបាល​ថៃ​កាលពី​ព្រឹក​ថ្ងៃ​ចន្ទ​ទី​២៥​កក្កដា​នេះ​បាន​និយាយថា ខ្លួនបាន​កត់ត្រា​ឃើញ​អ្នក​ស្លាប់​ដោយកូវី​ដ​១៩​ចំនួន​៣២​នាក់​ទៀត និង​អ្នក​កើតកូ​វីដ​ចំនួន​១.៧៤០​នាក់​បាន​ចូល​ដេកពេទ្យ​​នៅ​២៤​ម៉ោង​កន្លងទៅ​។​

​កាល​ពី​ម្សិល ក្រសួង​បាន​ប្រកាស​អ្នកស្លាប់​ចំនួន​៣០​នាក់ និង​ឆ្លង​ថ្មី​ហើយ​ចូល​ដេកពេទ្យ​ចំនួន​២.៣៩០​នាក់​។​

​សូមបញ្ជាក់​ថា ចាប់តាំងពី​កូវី​ដ​១៩​មាន​វត្តមាន​នៅក្នុង​ព្រះរាជាណាចក្រ​នេះ​មក អាជ្ញាធរ​បាន​រាយការណ៍​អ្នក​ឆ្លង​សរុប ៤.៥៧៧.៥៩៣​នាក់ តែ​ជាង​៤,៥២​លាន​នាក់​បាន​ជាសះស្បើយ និង​៣១.១៨៩​នាក់​​ស្លាប់​ដោយកូវី​ដ​១៩៕

​ប្រជាជន​ថៃ​ផ្អើល​នាំគ្នា​ទៅ​ចា​ក់វ៉ាក់សាំង​ការពារកូ​វីដ​១៩​នៅ​មណ្ឌល​មួយ​ក្នុង​ក្រុង​បាងកក​កាលពី​ថ្ងៃអាទិត្យ​ទី​២៤​កក្កដា នៅពេល​ចំនួន​ស្លាប់​ប្រចាំថ្ងៃ​ដោយកូវី​ដ​១៩​កើនឡើង​