​រដ្ឋសភា បញ្ចូល​សេចក្តីព្រាងច្បាប់ ស្តីពី​វិសោធនកម្ម មាត្រា​មួយចំនួន នៃ​រដ្ឋធម្មនុញ្ញ ក្នុងសម័យ​ប្រជុំ​ពេញអង្គ នៅ​ថ្ងៃ​ព្រហស្បតិ៍ សប្តាហ៍​នេះ​
​ដោយៈ សុផល / ភ្នំពេញ​៖ សម្តេច​អគ្គ​មហា​ពញា​ចក្រី ហេង សំរិន ប្រធានរដ្ឋសភា បាន​ដឹកនាំ កិច្ចប្រជុំ​គណៈកម្មាធិការ​អចិន្ត្រៃយ៍​រដ្ឋសភា នា​ព្រឹក​ថ្ងៃទី​២៥ ខែកក្កដា ឆ្នាំ​២០២២ នេះ នៅ​វិមាន​រដ្ឋសភា ដោយ​កិច្ចប្រជុំ បានអនុម័ត​កំណត់​កាលបរិច្ឆេទ បន្ត​សម័យប្រជុំ​រដ្ឋសភា លើក​ទី​៧ នីតិកាល​ទី​៦ និង​របៀបវារៈ នៃ​កិច្ចប្រជុំពេញអង្គ​។

​កិច្ចប្រជុំ​គណៈកម្មាធិការ​អចិន្ត្រៃយ៍ បានអនុម័ត​កំណត់​កាលបរិច្ឆេទ​បន្ត​សម័យប្រជុំ​រដ្ឋសភា លើក​ទី​៧ នីតិកាល​ទី​៦ នៅ​ព្រឹក​ថ្ងៃ​ព្រហស្បតិ៍ ទី​២៨ ខែកក្កដា ឆ្នាំ​២០២២ ដោយមាន​របៀបវារៈ ចំនួន​៥ នៅក្នុង​នោះ សម័យប្រជុំ​រដ្ឋសភា នឹង​ពិភាក្សា និង​អនុម័ត សេចក្តីព្រាងច្បាប់​ធម្មនុញ្ញ ស្តីពី​វិសោធនកម្ម​មាត្រា​១៩ ថ្មី (​មួយ​) មាត្រា​៨៩ មាត្រា​៩៨ ថ្មី មាត្រា​១០២ ថ្មី មាត្រា​១១៩ ថ្មី (​មួយ​) និង​មាត្រា​១២៥ ថ្មី នៃ​រដ្ឋធម្មនុញ្ញ នៃ​ព្រះរាជាណាចក្រ​កម្ពុជា និង​មាត្រា​៣ ថ្មី និង​មាត្រា​៤ ថ្មី នៃ​ច្បាប់​ធម្មនុញ្ញ​បន្ថែម សំដៅ​ធានា​នូវ​ដំណើរការ ជា​ប្រក្រតី នៃ​ស្ថាប័ន​ជាតិ​។​

​ក្រៅពី​សេចក្តីព្រាងច្បាប់ ខាងលើនេះ សម័យប្រជុំ​រដ្ឋសភា នឹង​ពិភាក្សា និង​អនុម័ត សេចក្តីព្រាងច្បាប់ ស្តីពី​ការគ្រប់គ្រង​ចំណូល មិនមែន​សារពើពន្ធ​។ ការពិភាក្សា និង​អនុម័ត សេចក្តីព្រាងច្បាប់​ស្តីពី ការអនុម័ត​យល់ព្រម​លើៈ កិច្ចព្រមព្រៀង​រវាង​រាជរដ្ឋាភិបាល នៃ​ព្រះរាជាណាចក្រ​កម្ពុជា និង​រដ្ឋាភិបាល នៃ​តំបន់​សេដ្ឋកិច្ច​ពិសេស ម៉ា​កាវ នៃ​សាធារណរដ្ឋ​ប្រជាមានិត​ចិន ស្តីពី​ការលុបបំបាត់​ការយកពន្ធ​ត្រួតគ្នា ពាក់ព័ន្ធ​នឹង​ពន្ធ លើ​ប្រាក់ចំណូល និង​ការបង្ការ​ការ​គេចវេស​ពន្ធ និង​ការចៀសវាង​ពន្ធ និង​កិច្ចព្រមព្រៀង រវាង​រាជរដ្ឋាភិបាល នៃ​ព្រះរាជាណាចក្រ​កម្ពុជា និង​រដ្ឋាភិបាល នៃ​សាធារណរដ្ឋ​តួ​ក​គី ស្តីពី​ការចៀសវាង ការយកពន្ធ​ត្រួតគ្នា និង​ការបង្ការ​ការ​កិបកេង​បន្លំ​ពន្ធ ពាក់ព័ន្ធ​នឹង​ពន្ធ លើ​ប្រាក់ចំណូល​។​

​ចំណែក​របៀបវារៈ​មួយទៀត គឺ​ការពិភាក្សា និង​អនុម័ត សេចក្តីព្រាងច្បាប់ ស្តីពី​ការអនុម័ត យល់ព្រម​ឱ្យ ព្រះរាជាណាចក្រ​កម្ពុជា ចូល​ជា​ភាគី នៃ​អនុសញ្ញា ស្តីពី​ជំនួយ ក្នុងករណី​មាន​គ្រោះមហន្តរាយ នុយក្លេអ៊ែរ ឬ​គ្រោះអាសន្ន​វិទ្យុសកម្ម​។

​នៅក្នុង​សម័យប្រជុំ​ពេញអង្គ​រដ្ឋសភា នា​ព្រឹក​ថ្ងៃទី​២៨ កក្កដា ខាងមុខនេះ នឹង​ប្រកាស ការសម្រេច អំពី​សុពលភាព នៃ​អាណត្តិ​របស់ លោក ចាប ម៉ុ​ច ជា​តំណាងរាស្ត្រ​មណ្ឌល កណ្តាល ជំនួស​លោក​សន្តិ​បណ្ឌិត ឌុល គឿន ដែល​បានទទួល​មរណភាព ៕/V​