​ប្រែ​សម្រួល : កញ្ញា​ដា​លី​ស (Global Times) ៖ ក្រុម​អ្នកឃ្លាំមើល​ទីផ្សារ​ចិន​បាន​ព្យាករណ៍​ថា យន្តហោះ​ផលិត​ក្នុងស្រុក​របស់​ចិន​C919 ដែល​បាន​បញ្ចប់​ការហោះហើរ​សាកល្បង​ទាំងអស់​រួចរាល់ ត្រូវ​គេ​រំពឹងថា​នឹងមាន​ជើងហោះហើរ​ពាណិជ្ជកម្ម​នៅ​ឆ្នាំ ២០២៣ បន្ទាប់ពី​ទទួលបាន​វិញ្ញាបនប័ត្រ​។​

​ក្រុមហ៊ុន Commercial Aircraft Corp of China (COMAC) កាលពី​ថ្ងៃ​សៅរ៍​ទី​២៣​កក្កដា​បាន​និយាយថា យន្តហោះ C919​ជិត​ទទួលបាន​វិញ្ញាបនប័ត្រ​បន្ទាប់ពី​យន្តហោះ​សាកល្បង​ចំនួន​​ប្រាំមួយ​គ្រឿង​បាន​បញ្ចប់​ការហោះហើរ​សាកល្បង​។​

​ក្រុមហ៊ុន COMAC បាន​និយាយ​នៅក្នុង​សេចក្តីថ្លែងការណ៍​មួយ​នៅ​លើ​វេបសាយ​របស់​ខ្លួន​ថា យន្តហោះ​សាកល្បង C919 សរុប​ចំនួន​ប្រាំមួយ​គ្រឿង​បាន​បញ្ចប់​ការសាកល្បង​ដែល​បង្ហាញ​ថា​យន្តហោះ​​បាន​ឈាន​ចូលដល់​ដំណាក់កាល​ចុងក្រោយ​នៃ​ការទទួល​បាន​វិញ្ញាបនបត្រ​ពី​រដ្ឋបាល​អាកាសចរណ៍​ស៊ីវិល​នៃ​ប្រទេស​ចិន (CAAC)​សម្រាប់​ប្រតិបត្តិការ​ពាណិជ្ជកម្ម​។ “​នេះ​ជា​ការទទួល​ជ័យជម្នះ​ជា​ដំណាក់កាល​ដ៏​សំខាន់​ក្នុង​ការអភិវឌ្ឍ​យន្តហោះ C919″​។​

​លោក វ៉ាង យ៉ាណា​ន (Wang Ya’nan) និពន្ធ​នាយក​នៃ​ទស្សនា​វ​ដ្តី Aerospace Knowledge ដែល​មាន​មូលដ្ឋាន​នៅ​ទីក្រុង​ប៉េកាំង បាន​ប្រាប់​កាសែត Global Times កាលពី​ថ្ងៃអាទិត្យ​ថា ការបញ្ចប់​ភារកិច្ច​សាកល្បង​បង្ហាញថា យន្តហោះ C919 បាន​ឈាន​ចូល​ដំណាក់កាល​ចុងក្រោយ​ក្នុងការ​ទទួលបាន​វិញ្ញាបនបត្រ​ហោះហើរ​។​

​បន្ទាប់មក CAAC និង COMAC នឹង​ធ្វើ​ការវាយតម្លៃ​គ្រប់​ជ្រុងជ្រោយ​អំពី​នីតិវិធី​និង​លទ្ធផល​នៃ​ការសាកល្បង​ហោះហើរ​កាលពី​ឆ្នាំមុនៗ ហើយ CAAC នឹង​កំណត់​ថា​តើ​ត្រូវ​ចេញ​លក្ខណសម្បត្តិ​សម្រាប់​​ការ​ហោះហើរ​ឬ​អត់​។ លោក​បាន​បន្ថែមថា នៅពេលណា​ដែល​ការហោះហើរ​សាកល្បង​ទាំងអស់​ត្រូវបាន​បញ្ចប់ ហើយ​លទ្ធផល​បំពេញ​តាម​លក្ខខណ្ឌ​តម្រូវ​នោះ​លក្ខណៈសម្បត្តិ​អាច​ហោះហើរ​បាន​អាច​នឹង​ត្រូវ​​បាន​ចេញផ្សាយ​។​

​បន្ទាប់ពី​ទទួលបាន​វិញ្ញាបនប័ត្រ​នៅ​ឆ្នាំ ២០២២ COMAC ត្រូវ​គេ​រំពឹងថា​នឹង​អនុវត្ត​ការហោះហើរ​សាកល្បង​នៃ​ផ្លូវ​ពាណិជ្ជកម្ម​និង​ការបណ្តុះបណ្តាល​បច្ចេកទេស​សម្រាប់​អ្នក​បើក​យន្តហោះ​និង​បុគ្គលិក​​ពាក់ព័ន្ធ ដែល​អាច​ចំណាយ​ពេល​ពី ៦ ទៅ ១២ ខែ​។​

​លោក​វ៉ាង​និយាយថា “​យន្តហោះ C919 រំពឹង​ដាក់ឱ្យ​ដំណើរការ​ពាណិជ្ជកម្ម​នៅ​ឆ្នាំ ២០២៣ ប្រសិនបើ​អ្វីៗ​ដំណើរការ​ទៅ​ដោយ​រលូន​”៕

​យន្តហោះ C919 រំពឹង​ដាក់ឱ្យ​ដំណើរការ​ពាណិជ្ជកម្ម​នៅ​ឆ្នាំ ២០២៣ ក្រោយ​ការហោះហើរ​សាកល្បង​បានបញ្ចប់​រួចរាល់​