​ប្រែ​សម្រួលៈ​បំណង​(​ដេល្លី​ម៉េល​)៖ បណ្តា​ទីក្រុង​នៅ​ទូទាំង​ប្រទេស​ចិន​កាលពី​ថ្ងៃ​ចន្ទ​ទី​២៥​កក្កដា​កំពុង​ស្ថិត​ក្នុង​ការព្រមាន​កំរិត​ក្រហម​អំពី​រលក​កំដៅ នៅពេល​មនុស្ស​រាប់លាន​នាក់​ត្រូវ​បាន​ណែនាំ​អោយ​នៅ​​ក្នុងផ្ទះ​ហើយ​សីតុណ្ហភាព​ក្តៅ​ខ្លាំង​កំពុង​បង្ក​បញ្ហា​ផ្គត់ផ្គង់​ចរន្ត​អគ្គិសនី​។​

​នៅក្នុង​ខេត្ត​ចេ​ជាំង​(Zhejiang)​និង​ហ្វុយ​ជៀន​(Fujian)​ភាគ​ខាងកើត​ប្រទេស សីតុណ្ហភាព​បាន​ឡើង​ហួស​៤១​អង្សា​សេ​កាលពី​ចុង​សប្តាហ៍​

​ឥឡូវ​ផ្នែក​ធំៗ​នៃ​ពិភពលោក​កំពុង​រង​កំដៅ​ខ្លាំង​អស់​ពេល​ប៉ុន្មាន​ខែ​មក​ហើយ ចាប់ពី​ឥណ្ឌា​នៅ​ខែ​មីនា​និង​មេសា​រហូត​ដល់​អឺរ៉ុប​ខាងលិច​នៅ​ខែ​កក្កដា​នេះ។​ពួក​អ្នកវិទ្យាសាស្ត្រ​និយាយថា អាកាសធាតុ​អាក្រក់​​បែប​នេះ​កាន់តែ​កើត​មាន​ញឹកញាប់​ឡើង​ដោយសារតែ​ការប្រែប្រួល​អាកាសធាតុ ហើយ​វា​ទំនងជា​នឹង​កាន់តែ​អាក្រក់​ទៅ​ដោយសារ​តែ​សីតុណ្ហភាព​ផែនដី​បន្ត​កើនឡើង​។​

​ប្រទេស​ចិន​មិន​បាន​រួចផុត​ទេ ហើយ​កំពុង​ជួប​កំដៅ​ខ្លាំង​នៅក្នុង​រដូវក្តៅ​បំផុត​មួយ​ក្នុង​ប្រវត្តិសាស្ត្រ​របស់​ខ្លួន​។​

​នៅក្នុង​ខេត្ត​ចេ​ជាំង​(Zhejiang)​និង​ហ្វុយ​ជៀន​(Fujian)​ភាគ​ខាងកើត​ប្រទេស សីតុណ្ហភាព​បាន​ឡើង​ហួស​៤១​អង្សា​សេ​កាលពី​ចុង​សប្តាហ៍ ។​ប្រជាជន​ក្នុង​តំបន់​នេះ​ស្ថិតក្រោម​ការព្រមាន​អំពី​កំដៅ​​កំរិត​​ក្រហម ដោយ​ប្រជាជន​ត្រូវ​បាន​ណែនាំ​អោយ​បញ្ឈប់​រាល់​សកម្មភាព​ក្រៅ​ផ្ទះ និង​យកចិត្តទុកដាក់​លើ​ការបង្ការ​គ្រោះ​អគ្គិភ័យ​។​

​មុន​នេះ​ក្នុង​ខែកក្កដា ទីក្រុង​សៀង​ហៃ​ក៏​ជួប​កំដៅ​ខ្ពស់បំផុត​៤០,៩​អង្សា​សេ ជា​សីតុណ្ហភាព​ខ្ពស់​បំផុត​គិត​ចាប់តាំងពី​ឆ្នាំ​១៨៧៣​។​​កំដៅ​ស្ទើរ​ឆេះ​ក៏​បាន​បញ្ជូន​មនុស្ស​រាប់រយ​នាក់​ទៅកាន់​ឆ្នេរសមុទ្រ​នៅ​ទីក្រុង​សៀ​មិន​(Xiamen)​ក្នុង​ខេត្ត​ហ្វ៊ុយ​ជៀន​កាលពី​ថ្ងៃអាទិត្យ ។​

​បណ្តាញ​ចែកចាយ​ចរន្តអគ្គិសនី​របស់​ចិន​ក៏​ជួប​បញ្ហា​បណ្តាល​មក​ពី​កំណើន​តំរូវការ​ថាមពល​សំរាប់​ម៉ាស៊ីនត្រជាក់ ដោយ​បណ្តា​រោងចក្រ​ថាមពល​ធំៗ​របស់​ប្រទេស​ផលិត​ចរន្ត​ដល់​សមត្ថភាព​កំពូល​ចាប់ពី​​ពាក់កណ្តាល​ខែ​កក្កដា​។​រដ្ឋាភិបាល​មូលដ្ឋាន​ខ្លះ​បាន​បិទ​ភ្លើង​អំពូល​តាម​ដងផ្លូវ​និង​ដំឡើង​ពន្ធ​អគ្គិសនី​សំរាប់​រោងចក្រ​នៅ​ខែ​នេះ​។​

​រលក​កំដៅ​បច្ចុប្បន្ន ដែល​វាយប្រហារ​តំបន់​ទំនាប​ទន្លេ​យ៉ាង​សេ​(Yangtze)​ខ្លាំង ក៏បង្ក​ផល​ប៉ះពាល់​ដល់​ដំណាំ​ផងដែរ​៕

​បុគ្គលិក​សុខាភិបាល​ដែល​ត្រៀម​ទទួល​អ្នក​ធ្វើតេស្តិ៍​រក​កូវី​ដ​១៩​អង្គុយ​ក្បែរ​ដុំ​ទឹកកក​ដើម្បី​ជួយ​អោយ​ត្រជាក់​ចំ​ពេល​ផ្នែក​ខ្លះ​នៃ​ប្រទេស​រង​កំដៅ​ខ្លាំង​