ដោយៈ ភ្នំសន្ទុក / កំពង់ធំៈ ប្រធានមន្ទីរកសិកម្មខេត្ត បានអះអាងពីករណីទឹកជំនន់ទឹកភ្លៀង បានបង្កឱ្យប៉ះពាល់ដីស្រែ របស់អ្នកស្រុក តាំងគោក ចំនួនជាង ៣.០០០ ហិកតា ស្របពេលដែលប្រធានមន្ទីរធនធានទឹកខេត្ត បានឆ្លើយតបទៅនឹងការបារម្ភរបស់ប្រជាពលរដ្ឋ រស់នៅតាមដងស្ទឹងសែន ថាទឹកស្ទឹង អាចនឹងមានការកើនឡើង នាំឱ្យលិចលង់លំនៅដ្ឋាន ដំណាំ និងសត្វចិញ្ចឹមនានា។
លោក ប៉ែន វណ្ណរិទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ធំ បានឲ្យដឹង នៅថ្ងៃទី២៥ កក្កដានេះ ដោយយោងតាមរបាយការណ៍របស់ការិយាល័យកសិកម្មស្រុក ក្រុង ទាំង ៩ នៃខេត្តកំពង់ធំថាៈ ទឹកជំនន់ បានបង្កឱ្យប៉ះពាល់ដីស្រែ របស់អ្នកស្រុកតាំងគោក ចំនួនជាង ៣.០០០ ហិកតា ក្នុងនោះ ខូចខាតអស់ជិត ៥០០ ហិកតា ។
ពាក់ព័ន្ធបញ្ហានេះ លោកបានបញ្ជាក់ថាៈ ការខូចខាតទាំងអស់នេះ មិនមែនដោយសារ ទឹកជំនន់ នៃទឹកស្ទឹងសែនទេ គឺដោយសារតែទឹកជំនន់ នៃទឹកភ្លៀង រយៈពេលប៉ុន្មានថ្ងៃ ចុងក្រោយនេះ។
ឆ្លើយតបតាមការព្រួយបារម្ភរបស់ប្រជាពលរដ្ឋ រស់នៅតាមដងស្ទឹងសែន ថាទឹកស្ទឹង អាចនឹងមានការកើនឡើង នាំឱ្យលិចលង់លំនៅដ្ឋាន ដំណាំ និងសត្វចិញ្ចឹមនានា ប្រសិនបើ នៅថ្ងៃទី២៥ កក្កដានេះ នៅមានភ្លៀងធ្លាក់បន្តទៀតនោះ លោក យូ ឡា ប្រធានមន្ទីរធនធានទឹក និងឧតុនិយម ខេត្តកំពង់ធំ បានប្រាប់ឲ្យដឹងថាៈ បញ្ហាទឹកស្ទឹងសែន ពុំទាន់មានការកើនឡើង គួរឲ្យកត់សម្គាល់ទេ ហើយកំពស់ទឹកត្រឹមតែ ១២,៣៦ ម៉ែត្រ តែបើកំពស់ទឹក ១៣,៥០ ម៉ែត្រ ជាសញ្ញាប្រកាសងាសន្ន និងត្រូវជូនដំណឹង។
លោក យូ ឡា បានបន្ថែមទៀតថាៈ ទឹកស្ទឹងសែន បើសិនជាមានការកើនឡើងនោះ ទាល់តែ ទឹកស្ទឹងសែន នៅស្រុកសណ្ដាន់ (ខេត្តកំពង់) និងនៅខេត្តព្រះវិហារ ឡើងទៀត ទើបមានការ ប្រកាសអាសន្ន។ ប៉ុន្តែដល់ពេលនេះ ស្ថានភាពទឹកក្នុងស្ទឹងសែន មានសភាពស្រកបន្តិច ហើយគ្មានអ្វីគួរឲ្យកត់សម្គាល់ដែរ៕/V.mara
