​ដោយៈ បូកគោ / កំពត​: ក្រោយ​ខកខាន​មិនបាន​ដឹក​ភ្ញៀវ លម្ហែ​កម្សាន្ត​ក្នុង​ដងព្រែក មួយរយ​: ពេលនេះ ម្ចាស់​ទូក​ទេសចរណ៍ មាន​ក្តី​សប្បាយរីករាយ​ឡើងវិញ បន្ទាប់ពី​ក្រុមហ៊ុន​ស៊ី​ណូ ហាយ​ដ្រូ បិទទ្វារ​ទឹក បញ្ឈប់​ការបង្ហូរ​ចេញពី អាង​ទំនប់​វា​រី​អគ្គិសនី​កំចាយ​។​

​ស្ត្រី​ជា​ម្ចាស់​ទូក​ហេ​ប​ភី​កូនភ្លោះ បាន​រៀបរាប់ថាៈ អ្នកស្រី មាន​ក្តី​សប្បាយរីករាយ ដោយសារ​ទូក​ដឹក​ភ្ញៀវ​កម្សាន្ត ដើម្បី​ទៅ​មើល​ថ្ងៃ​លិច និង​មើល​អំពិលអំពែក តាម​ដងព្រែក បាន​ដំណើរ​ការធម្មតា​ឡើងវិញ​។ រយ​:​ពេល​ពីរ​សប្តាហ៍​កន្លង​មក ទូក​របស់​អ្នកស្រី ក៏ដូចជា ទូក​ទេសចរណ៍​ផ្សេងៗ​ទៀត បាន​ត្រឹម​ទទួលភ្ញៀវ មក​បរិភោគ​ចំណីអាហារ នៅនឹងកន្លែង ព្រោះតែ​ក្រុមហ៊ុន​វា​រី​អគ្គិសនី​កំចាយ បើក​បង្ហូរទឹក​ធ្វើ​ឲ្យ​ល្បឿន​ទឹក ក្នុង​ព្រែក​ហូរ​ខ្លាំង និង​កម្ពស់​ទឹក​ឡើង​ខ្ពស់​មិនអាច​ឲ្យ​ទូក​ឆ្លងកាត់​ខាងក្រោម​ស្ពាន​បាន​។

​ម្ចាស់​ទូក​ហេ​ប​ភី​កូនភ្លោះ​ដដែល បានបញ្ជាក់​ថាៈ កាលពី​ថ្ងៃ​ចុង​សប្តាហ៍ កន្លងទៅ ក្រុមហ៊ុន​វា​រី​អគ្គិសនី បាន​ឈប់​បង្ហូរទឹក ទើប​ពេលនេះ សេវាកម្ម​ដឹក​ភ្ញៀវ​កម្សាន្ត ក្នុង​ដងព្រែក អាច​ដំណើរការ​ឡើងវិញ​។ ម្ល៉ោះហើយ កាលពី​ថ្ងៃអាទិត្យ ស្របពេល​ទេសចរ​មកលេង នៅ​កំពត​ច្រើន ហើយ​អាកាសធាតុ ស្រឡះ​ល្អ​ផង​នោះ ទូក​ជាច្រើន​គ្រឿង បាន​ដំណើរការ ដឹក​ភ្ញៀវ ទៅ​លម្ហែ​ផ្នែក​ខាងលើ មាន​សកម្មភាព​ជាធម្មតា​ដូច​មុន​។​

​លោក សោម វិចិត្រ ប្រធាន​មន្ទីរ​រ៉ែ និង​ថាមពល ខេត្តកំពត បាន​ប្រាប់​ឲ្យ​ដឹងថាៈ ដោយសារ ស្ថានភាព​កាស​ធាតុ​ល្អប្រសើរ ក្រុមហ៊ុន​វា​រី​អគ្គិសនី​កំចាយ ស៊ី​ណូ​ហាយ​ដ្រូ បាន​បិទទ្វារ បញ្ឈប់​ការបង្ហូរ​ទឹក តាំងពី​ល្ងាច​ថ្ងៃទី​២៣ ខែកក្កដា ឆ្នាំ​២០២២ មកម្ល៉េះ​។ ដោយឡែក គិត​ត្រឹម​ម៉ោង ១០ ព្រឹក ថ្ងៃទី​២៥ ខែកក្កដា ឆ្នាំ​២០២២ នេះ ស្ថានភាព​កម្រិត​ទឹក ក្នុង​អាង​ទំនប់ វា​រី​អគ្គិសនី​កំចាយ មាន​កម្ពស់ ១៤៨,២០ ម៉ែត្រ ដោយ​លំហូរ​ទឹក​ចូល​ចំណុះ ៨៦,៧០ ម៉ែត្រ ត្រីគុណ ក្នុង​មួយ​វិនាទី​។ ចំណែក​លំហូ​ទឹក​ចេញ មាន​បរិមាណ ១៧៨,២៨ ម៉ែត្រត្រីគុណ ក្នុង​មួយ​វិនាទី ជាមួយនឹង​ការផលិត​ថាមពល មាន​កម្លាំង ១៧៩,៣ ម៉េ​ហ្គា​វ៉ា​ត់​។ ក្នុងករណី ស្ថានភាព​អាកាសធាតុ នា​តំបន់​ទំនប់​វា​រី​អគ្គិសនី នៅតែ​ល្អ​ដូច​ថ្ងៃនេះ នោះ​នឹងមិន​មានការ បើកទ្វារ​រំដោះ​ទឹក​ចេញ​ទៀត​ទេ​៕/V​