​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ រុស្សី​នឹង​កាត់បន្ថយ​ការផ្គត់ផ្គង់​ឧស្ម័ន​ទៅកាន់​ទ្វីប​អឺរ៉ុប​បន្ថែមទៀត នៅក្នុង​ការ​វាយ​សំពង​មួយ​លើ​បណ្តា​ប្រទេស​ដែល​បាន​គាំទ្រ​ទីក្រុង​គៀវ​ខណៈ​មាន​ក្តីសង្ឃឹម​​កាលពី​ថ្ងៃ​ចន្ទ​ទី​២៥​កក្កដា​ថា ការនាំ​ចេញ​គ្រាប់​ធញ្ញជាតិ​ដែល​រាំងស្ទះ​របស់​អ៊ុយ​ក្រែ​ននឹង​បន្ត​ឡើង​វិញ​ក្នុង​សប្តាហ៍​នេះ​។​

​អង្គការសហប្រជាជាតិ​បាន​និយាយថា ទោះបីជា​មាន​ការវាយប្រហា​រ​តាម​អាកាស​នៅ​ចុង​សប្តាហ៍​ក៏ដោយ​ក៏​កប៉ាល់​ដំបូង​ពី​កំពង់ផែ​សមុទ្រ​ខ្មៅ​របស់​អ៊ុយ​ក្រែន​អាច​នឹង​ចេញ​ដំណើរ​ក្នុង​រយៈពេល​ប៉ុន្មាន​​ថ្ងៃ​ទៀត​ក្រោម​កិច្ច​ព្រមព្រៀង​ដែល​បាន​ធ្វើ​កាលពី​ថ្ងៃ​សុក្រ​។ នេះ​នឹង​ជួយ​បន្ធូរបន្ថយ​វិបត្តិ​ស្បៀងអាហារ​អន្តរជាតិ ទោះបីជា​ការ​មិន​ទុកចិត្ត​និង​លទ្ធភាព​គ្រោះថ្នាក់​នៅ​តែ​មាន​ក៏ដោយ​។​

​ការកើនឡើង​នៃ​ថ្លៃ​ថាមពល​និង​ការបារម្ភ​អំពី​គ្រោះ​ទុរ្ភិក្ស​នៅក្នុង​តំបន់​មួយចំនួន​នៃ​ពិភពលោក​បាន​បង្ហាញ​ពី​របៀប​ដែល​ជម្លោះ​ដ៏​ធំ​បំផុត​នៅ​អឺរ៉ុប​ចាប់តាំងពី​សង្គ្រាមលោកលើកទី​ពីរ កំពុងមាន​​ផលប៉ះពាល់​ហួស​ឆ្ងាយ​ពី​អ៊ុ​យក្រែន​។​

​នៅ​សមរភូមិ​ជួរមុខ យោធា​អ៊ុយ​ក្រែន​បាន​រាយការណ៍​ថា​ការ​បាញ់​ផ្លោង​កាំភ្លើង​ធំ​របស់​រុស្ស៊ី​នៅ​ភាគ​ខាងកើត​បាន​ធ្វើឡើង​ពេញ​មួយ​យប់ ហើយ​បាន​និយាយ​ថា​កងទ័ព​របស់​ទីក្រុង​មូ​ស្គូ​កំពុង​ត្រៀម​​សម្រាប់​ការវាយលុក​ថ្មី​លើ​ទីក្រុង​បាក់​មុត (Bakhmut) នៅក្នុង​តំបន់ឧស្សាហកម្ម​ដុន​បា​ស​។​

​ប្រធានាធិបតី​រុស្ស៊ី​លោក វ្ល៉ា​ឌី​មៀ ពូ​ទីន បាន​ព្រមាន​លោកខាងលិច​កាលពីដើម​ខែ​នេះ​ថា ការដាក់ទណ្ឌកម្ម​កំពុង​ប្រថុយ​បង្ក​ឱ្យ​មាន​ការកើនឡើង​តម្លៃ​ថាមពល​ពិភពលោក​ដ៏​ធំ​សម្បើម​។​

​ដោយ​ដកស្រង់​សេចក្តីណែនាំ​ពី​អ្នកឃ្លាំមើល​ឧស្សាហកម្ម ក្រុមហ៊ុន​ថាមពល​យក្ស​រុស្ស៊ី Gazprom បាន​និយាយ​កាលពី​ថ្ងៃ​ចន្ទ​ថា លំហូរ​ឧស្ម័ន​ទៅកាន់​ប្រទេស​អាល្លឺម៉ង់​តាមរយៈ​បំពង់​បង្ហូរ Nord Stream 1 នឹង​ធ្លាក់​ចុះ​មក​នៅត្រឹម ៣៣ លាន​ម៉ែត្រគូប​ក្នុង​មួយថ្ងៃ​ចាប់ពី​ថ្ងៃ​ពុធ​ទី​២៧​កក្កដា​។​នោះ​គឺ​ស្មើ​នឹង​ពាក់កណ្តាល​នៃ​លំហូរ​បច្ចុប្បន្ន​ដែល​មាន​ត្រឹមតែ ៤០ ភាគរយ​នៃ​សមត្ថភាព​ធម្មតា​ប៉ុណ្ណោះ​។ មុន​​សង្គ្រាម អឺរ៉ុប​បាន​នាំចូល​ឧស្ម័ន​ប្រហែល ៤០ ភាគរយ និង​ប្រេង ៣០ ភាគរយ​ពី​រុស្ស៊ី​។​

​វិមាន​ក្រឹម​ឡាំង​និយាយថា ការរំខាន​ឧស្ម័ន​គឺ​ដោយសារតែ​បញ្ហា​ធែ​ទាំ​ជួសជុល​និង​ការដាក់ទណ្ឌកម្ម​របស់​លោក​ខាងលិច​ខណៈ​សហ​ភាព​អឺរ៉ុប​បាន​ចោទប្រកាន់​រុស្ស៊ី​ថា​ជ្រើសរើស​ប្រើ​ការគំរាមកំហែង​​ខាង​ថាមពល​។​

​អាល្លឺម៉ង់​បាន​និយាយថា ខ្លួន​មិន​ឃើញ​ហេតុផល​បច្ចេកទេស​សម្រាប់​ការកាត់បន្ថយ​ឧស្ម័ន​ចុងក្រោយបង្អស់​នេះ​ទេ​។​

​ប្រធានាធិបតី​អ៊ុ​យក្រែន លោក វ៉ូ​ឡូ​ឌី​មៀ ហ្សេ​លេន​ស្គី បាន​ព្រមាន​ថា វិមាន​ក្រឹម​ឡាំង​កំពុង​ធ្វើ “​សង្គ្រាម​ឧស្ម័ន​ដោយ​បើកចំហ​” ប្រឆាំង​នឹង​សហភាព​អឺរ៉ុប​ដែល​រួបរួមគ្នា​។​

​ក្រុម​អ្នកនយោបាយ​នៅ​អឺរ៉ុប​បាន​និយាយ​ម្តង​ហើយ​ម្តងទៀត​ថា រុស្ស៊ី​អាច​នឹង​កាត់ផ្តាច់​ឧស្ម័ន​នៅ​រដូវរងា​នេះ ដែល​ជា​ជំហាន​មួយ​នឹង​រុញ​ប្រទេស​អាល្លឺម៉ង់​ឱ្យ​ធ្លាក់​ក្នុង​វិបត្តិ​សេដ្ឋកិច្ច​និង​នាំ​ឱ្យ​តម្លៃ​កើន​​ឡើង​សម្រាប់​អ្នកប្រើប្រាស់​ដែល​ប្រឈម​មុខ​នឹង​ការចំណាយ​ថាមពល​ខ្ពស់​យ៉ាង​ឈឺចាប់​រួចទៅហើយ​។​

​ទីក្រុង​មូ​ស្គូ​និយាយថា ខ្លួន​មិន​ចាប់អារម្មណ៍​ចំពោះ​ការបញ្ឈប់​ទាំងស្រុង​នៃ​ការផ្គត់ផ្គង់​ឧស្ម័ន​ទៅកាន់​អឺរ៉ុប​នោះទេ​៕

រុស្ស៊ី​អាច​នឹង​កាត់ផ្តាច់​ឧស្ម័ន​នៅ​រដូវរងា​នេះ​