​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ក្រុមអ្នកតវ៉ា​បាន​សម្រុកចូល​មូលដ្ឋាន​អង្គការ​សហប្រជាជាតិ​នៅ​ទីក្រុង​ហ្គោ​ម៉ា (Goma) ភាគ​ខាងកើត​ប្រទេស​កុង​ហ្គោ​កាលពី​ថ្ងៃ​ចន្ទ​ទី​២៥​កក្កដា ដោយ​លួច​យក​វត្ថុ​មាន​តម្លៃ​និង​ទាមទារ​ឱ្យ​កង​រក្សា​សន្តិភាព​ចាក​ចេញពី​តំបន់​នេះ​។​

​មនុស្ស​រាប់រយ​នាក់​បាន​បិទផ្លូវ​និង​ស្រែក​ពាក្យស្លោក​ប្រឆាំង​អ​.​ស​.​ប មុន​ពេល​សម្រុកចូល​ទៅ​ក្នុង​ទីស្នាក់ការ​កណ្តាល​នៃ​បេសកកម្ម​រក្សា​សន្តិភាព​របស់​អ​.​ស​.​ប​នៅ​ទីក្រុង​ហ្គោ​ម៉ា​ដែល​ជា​មជ្ឈមណ្ឌល​ពាណិ​​ជ្ជកម្ម​ដ៏​សំខាន់​នៃ​ខេត្ត​ណត​គី​វូ (North Kivu)​។​

​អ្នកកាសែត AFP បានឃើញ​បាតុករ​វាយកម្ទេច​បង្អួច​និង​លួច​កុំព្យូទ័រ គ្រឿង​សង្ហា​រឹម​និង​វត្ថុ​មានតម្លៃ​ផ្សេង​ទៀត​ពី​ទីស្នាក់ការ​ខណៈ​មន្ត្រីប៉ូលិស​អ​.​ស​.​ប​បាន​បាញ់​ឧស្ម័ន​បង្ហូរទឹកភ្នែក​ក្នុង​គោលបំណង​​រុញច្រាន​ពួកគេ​ត្រឡប់​ថយ​ក្រោយ​វិញ​។​

​ឧទ្ធម្ភាគចក្រ​បាន​ដឹក​មន្ត្រី​អ​.​ស​.​ប​មួយចំនួន​ចេញពី​ទីស្នាក់ការ​ដែល​រង​ការវាយប្រហារ​នេះ​។​

​ក្រុមអ្នកតវ៉ា​ក៏​បាន​សម្រុកចូល​មូលដ្ឋាន​ភស្តុភារ​របស់​អ​.​ស​.​ប​នៅ​ជាយក្រុង​ផងដែរ ជា​កន្លែង​ដែល​និស្សិត​ម្នាក់​ត្រូវបាន​បាញ់​ចំ​ជើង​។​

​បេសកកម្ម​រក្សា​សន្តិភាព​របស់​អ​.​ស​.​ប​នៅ​សាធារណរដ្ឋ​ប្រជាធិបតេយ្យ​កុង​ហ្គោ ដែល​គេ​ស្គាល់​ថា MONUSCO​បាន​ទទួលរង​ការរិះគន់​ក្នុង​តំបន់​នេះ​ជាប្រចាំ​ចំពោះ​អសមត្ថភាព​របស់​ខ្លួន​ក្នុង​ការបញ្ឈប់​​ការប្រយុទ្ធ​គ្នា​នៅ​ភាគ​ខាងកើត​ដែល​ហែកហួរ​ដោយ​ជម្លោះ​។​

​ក្រុម​ប្រដាប់អាវុធ​ជាង ១២០ កំពុង​អុកឡុក​ជុំវិញ​តំបន់​ងាយ​ក្រឡាប់​ចាក់​មួយ​នេះ ជា​កន្លែង​ការសម្លាប់​រង្គាល​ជន​ស៊ីវិល​បាន​ក្លាយជា​រឿង​ធម្មតា ហើយ​ជម្លោះ​បានធ្វើឱ្យ​មនុស្ស​រាប់លាន​នាក់​ផ្លាស់​ទីលំនៅ​។​

​នៅមុន​ការតវ៉ា​កាលពី​ថ្ងៃ​ចន្ទ សាខា​យុវជន​នៃ​គណបក្ស​កាន់អំណាច UDPS នៅ​ទីក្រុង​ហ្គោ​ម៉ា​បានចេញ​សេចក្តីថ្លែងការណ៍​មួយ ដោយ​ទាមទារ​ឱ្យ MONUSCO”​ដកខ្លួន​ចេញពី​ទឹកដី​កុង​ហ្គោ​ដោយ​​គ្មាន​លក្ខខណ្ឌ ព្រោះ​បេសកកម្ម​នេះ​បាន​បង្ហាញ​ឱ្យ​ឃើញ​រួច​ហើយ​ពី​ភាព​អសមត្ថភាព​របស់​ខ្លួន​ក្នុង​ការផ្តល់​ការការពារ​ដល់​ពួកយើង​”៕

​បាតុករ​វាយកម្ទេច​បង្អួច​និង​លួច​កុំព្យូទ័រ គ្រឿង​សង្ហា​រឹម​និង​វត្ថុ​មានតម្លៃ​ផ្សេង​ទៀត​ពី​ទីស្នាក់ការ​អ​.​ស​.​ប​