​ដោយ​: ទេ​ពក​ង្រី / កំពង់ឆ្នាំងៈ ដើម្បី​ពង្រឹង​នៃ ការគ្រប់គ្រង ការអនុវត្ត នៃ​ការប្រមូល​ពន្ធ​ឱ្យ​កាន់​តែមាន​ប្រសិទ្ធភាព​នោះ សាខា​ពន្ធដារ ខេត្តកំពង់ឆ្នាំង បាន​បើក​សិក្ខាសាលា​ផ្សព្វផ្សាយ ពី​បញ្ជី​គណនេយ្យ​សាមញ្ញ កាតព្វកិច្ច​សារពើពន្ធ​ប្រចាំខែ និង​ប្រចាំឆ្នាំ ប្រកាស​ពន្ធ​អាជីវកម្ម​សម្រាប់​អ្នក​ជាប់ពន្ធ​ខ្នាតតូច (GDT-Tax-Prefiling-App) ដែល​បាន​ធ្វើឡើង នៅ​ថ្ងៃទី ២៦ ខែកក្កដា ឆ្នាំ​២០២២ នៅ​សាលប្រជុំ​សាខា​ពន្ធដារ​ខេត្តកំពង់ឆ្នាំង ក្រោម​វត្តមាន​លោក វង្ស ឌី​ណា ប្រធាន​សាខា​ពន្ធដារ​ខេត្តកំពង់ឆ្នាំង ដោយមាន​ការអញ្ជើញ​ចូលរួម​ពី​ថ្នាក់ដឹកនាំ​សាខា​ពន្ធដារ​ខេត្ត មន្ត្រី​ពន្ធដារ​ខេត្ត និង​ម្ចាស់​អាជីវកម្ម​ខ្នាតតូច​ទាំងអស់​។

​បើ​យោងតាម​បទ​បង្ហាញ​របស់​មន្ត្រី​ពន្ធដារ បានធ្វើឱ្យ​ម្ចាស់​ក្រុមហ៊ុន សហគ្រាស និង​អាជីវករ​ទាំងអស់ បាន​យល់ដឹង​ពី​នីតិវិធី​នៃ​ការគ្រប់គ្រង​កិច្ច​បញ្ជី​ការ​សាមញ្ញ នៃ​អាជីវកម្ម​របស់ខ្លួន និង​កាតព្វកិច្ច នៃ​ការបង់ពន្ធ​រដ្ឋ ឱ្យបាន​គ្រប់ៗ​គ្នា និង​សូមឱ្យ​ម្ចាស់​អាជីវកម្ម​ទាំងអស់ ត្រូវ​យកចិត្តទុកដាក់​បង់ពន្ធ ឱ្យបាន​ត្រឹមត្រូវ តាមច្បាប់​បានកំណត់ ដែល​កំពុង​ធ្វើកំណែទម្រង់ និង​ពង្រឹង​ការអនុវត្ត​ច្បាប់​ពន្ធដារ ស្របតាម​យុទ្ធសាស្ត្រ​កៀរគរ​ក​ចំណូល ធានាបាន​នូវ​អភិបាលកិច្ច​ល្អ បរិយាកាស​ធុរកិច្ច​ដ៏​ប្រសើរ តាមរយៈ​ការប្រមូល​ចំណូល​ពន្ធ ប្រកបដោយ​តម្លាភាព ប្រសិទ្ធភាព ស័ក្ដិសិទ្ធិ​ភាព និង​សមធម៌​។

​ដោយឡែក ប្រធាន​សាខា​ពន្ធដារ​ខេត្ត​កំពង់ ឆ្នាំង លោក វង្ស ឌី​ណា បាន​មានប្រសាសន៍​ផ្តាំផ្ញើ​ដល់​ម្ចាស់​អាជីវកម្ម​ទាំងអស់​ថាៈ ការបើក​សិក្ខាសាលា​ផ្សព្វផ្សាយ នៅពេលនេះ គឺមាន​សារៈសំខាន់​ណាស់ ចំពោះ​ការកែទម្រង់​គោលនយោបាយ​ហិរញ្ញវត្ថុ​សាធារណៈ របស់​រាជរដ្ឋាភិបាល ក៏ដូចជា​អគ្គនាយកដ្ឋាន​ពន្ធដារ ក្នុង​គោលដៅ​បង្កើន​ចំណូល​ថវិកាជាតិ និង​ផ្តោតលើ​ការយកចិត្តទុកដាក់​ខ្ពស់ លើ​ការពង្រឹង​ការអនុវត្ត​ច្បាប់ និង​បទ​ប្បញ្ញត្តិ​ទាំងឡាយ ឲ្យ​ស្របតាម​គោលនយោបាយ កែទម្រង់​ស៊ីជម្រៅ របស់​ប្រមុខ​រាជរដ្ឋាភិបាល ដែល​ដែលមាន​សម្តេច​តេ​ជោ ហ៊ុន សែន ជា​នាយករដ្ឋមន្ត្រី ។

​ដូច្នេះ​សហគ្រាស​អ្នក​ជាប់ពន្ធ​ទាំងអស់ ត្រូវ​ចូលរួម និង​គាំទ្រ​ការពង្រឹង​នៃ​ការគ្រប់គ្រង​កិច្ច​បញ្ជី​ការ​របស់​អាជីវកម្ម​ខ្លួន និង​កាតព្វកិច្ច​ត្រូវ​បង់ពន្ធ ឱ្យបាន​គ្រប់ៗ​គ្នា ដើម្បី​ជំរុញ​ការអភិវឌ្ឍ​ប្រទេស​កម្ពុជា ឱ្យមាន​ការរីកចំរើន ជា​បន្តទៀត​៕/V​.mara