​ប្រែ​សម្រួលៈ​បំណង​(​ដេល្លី​ម៉េល​)៖​របប​យោធា​មី​យ៉ាន់​ម៉ា​កាលពី​ថ្ងៃ​អង្គារ​ទី​២៦​កក្កដា បាន​វាយបក​លើ​ការ​ថ្កោលទោស​អន្តជាតិ​ចំពោះ​ការអនុវត្ត​ទោស​ប្រហារជីវិត​លើកដំបូង​របស់​ប្រទេស​នៅក្នុង​រយៈពេល​​ប៉ុន្មាន​ទសវត្សរ៍​មក​នេះ ដោយ​និយាយថា អ្នកទោស​ដែល​ត្រូវបាន​ប្រហារជីវិត​បួន​នាក់​នោះ​តាម​ពិត «​សមតែ​ទទួលទោស​ប្រហារជីវិត​ច្រើនដង​»​។​

​ការប្រហារជីវិត​ត្រូវបាន​ប្រកាស​កាលពី​ថ្ងៃ​ចន្ទ ដោយ​បង្ក​អោយ​មាន​ការ​ថ្កោលទោស​មក​ពី​ជុំវិញ​ពិភពលោក នឹង​រំលេច​ការព្រួយបារម្ភ​ថា អាច​នឹង​មាន​ការអនុវត្ត​ទោស​បែប​នេះ​ជា​ច្រើន​ទៀត និង​ក៏​នាំ​​អោយមាន​ការអំពាវនាវ​សំរាប់​វិធានការ​អន្តរជាតិ​តឹងតែង​ឡើង​ប្រឆាំង​នឹង​របប​សឹក​ដ៏​ឯកោ​មួយ​នេះ​។​

​តែ​អាជ្ញាធរ​យោធា​មី​យ៉ាន់​ម៉ា​នៅតែ​ផ្គើន ដោយ​អ្នកនាំពាក្យ​លោក ហ្សរ មីន ទុន​(Zaw Min Tun)​នៅតែ​និយាយ​ថា បុរស​ទាំង​បួន​នាក់​នេះ​ត្រូវបាន​ផ្តល់​សិទ្ធិ​ការពារ​ខ្លួន​ស្រប​តាម​នីតិវិធី​តុលាកា​រ​។​«​បើ​​យើង​ប្រៀបធៀប​ការដាក់ទោស​ពួកគេ​ទៅ​នឹង​ការកាត់ទោស​ប្រហារជីវិត​ដទៃទៀត ពួកគេ​បាន​ប្រព្រឹត្ត​បទឧក្រិដ្ឋ​ដែល​សមតែ​ដាក់ទោស​ប្រហារជីវិត​ច្រើនដង​»​។​

​លោក​បាន​និយាយ​ក្នុង​សន្និសីទកាសែត​ក្នុង​ទីក្រុង​ណៃ​ពិដោ​ថា «​ពួកគេ​ធ្វើ​អោយ​គ្រោះថ្នាក់​ជនស្លូតត្រង់​ជា​ច្រើន​។​មាន​ការបាត់បង់​ធំៗ​ជាច្រើន​ដែល​មិន​អាច​ប៉ះប៉ូវ​បាន​»​។​

​លោក​បាន​បន្ថែមថា អ្នកទោស​ប្រហារជីវិត ត្រូវបាន​អនុញ្ញាត​អោយ​ជួប​សមាជិកគ្រួសារ​តាម​វីដេអូ​បន្ត​ផ្ទាល់​។​វា​ស្ថិត​លើ​អាជ្ញាធរ​គុក​ថា​តើ​គ្រួសារ​អ្នកទោស​ប្រហារជីវិត​ត្រូវ​អនុញ្ញាត​អោយ​យក​សាក​​សព​របស់​គេ​ដែរ​ឬ​អត់​។​

​អ្នកនាំពាក្យ​លោក ហ្សរ មីន ទុន បាន​និយាយថា អ្នកទោស​ប្រហារជីវិត​សម​ទទួលទោស​ប្រហារជីវិត​ច្រើនដង​ចំពោះ​បទឧក្រិដ្ឋ​របស់គេ​

​ភ្យូ ហ្សេ​យ៉ា ថ​រ​(Phyo Zeya Thaw) អតីត​សមាជិកសភា​គណបក្ស​សម្ពន្ធជាតិ​សំរាប់​លទ្ធិប្រជាធិបតេយ្យ​របស់​មេដឹកនាំ​ស៊ីវិល​ដែល​ត្រូវ​ទម្លាក់​ចេញពី​តំណែង អ៊ុង សាន ស៊ូ​ជី ត្រូវបាន​ចាប់ខ្លួន​និង​ចោទ​​ប្រកាន់​ថា​បាន​ដឹកនាំ​ការវាយប្រហារ​ជាច្រើន​លើ​កងកម្លាំង​ប្រដាប់អាវុធ រួម​មាន​ការវាយប្រហា​រ​ដោយ​កាំភ្លើង​មួយ​លើ​រថភ្លើង​ដឹក​អ្នកដំណើរ​នៅ​ក្រុង​យ៉ាងហ្គោន​ដែល​បាន​សម្លាប់​ប៉ូលិស​ប្រាំ​នាក់​។​

​លោក​ត្រូវបាន​កាត់ទោស​ប្រហារជីវិត​កាលពី​ខែ​មករា​ចំពោះ​ការរំលោភច្បាប់​ប្រឆាំង​ភេរវកម្ម​។​

​សកម្មជន​គាំទ្រ​លទ្ធិប្រជាធិបតេយ្យ ក្យ​រ មីន យូ​(Kyaw Min Yu)​ក៏​ទទួល​ទោស​ប្រហារជីវិត​ពី​តុលាការ​សឹក​។​អាជ្ញាធរ​បាន​ចេញ​ដីកាចាប់ខ្លួន​លោក​ចំពោះ​ការ​ញុះញង់​បង្កចលាចល​ដោយ​ប្រើ​សារ​បង្ហោះ​​ក្នុង​បណ្តាញ​សង្គម​។​

​បុរស​ពីរ​នាក់​ទៀត​ត្រូវបាន​ប្រហារជីវិត​ផងដែរ ដោយសារ​ពួកគេ​សម្លាប់​ស្ត្រី​ម្នាក់​ដែល​ពួក​គេ​ចោទប្រកាន់​ថា​ជា​អ្នក​ផ្តល់​ព័ត៌មាន​ដល់​អាជ្ញាធរ​នៅ​ក្រុង​យ៉ាងហ្គោន​។​

​សូមបញ្ជាក់​ថា ក្រោយ​ការ​ថ្កោលទោស​ជា​អន្តរជាតិ​កាលពី​ថ្ងៃ​ចន្ទ រួមទាំង​អង្គការសហប្រជាជាតិ អាម៉េរិក​និង​សហភាព​អឺរ៉ុប​ផង​ចំពោះ​ការប្រហារជីវិត​នេះ នៅ​ថ្ងៃ​អង្គារ​នេះ​ក៏​មាន​ការរិះគន់​ថ្មី​លើ​របប​​សឹក​មី​យ៉ាន់​ម៉ា​។​

​ប្លុក​សមាគម​អាស៊ាន​ដែល​បាននិងកំពុង​ដឹកនាំ​កិច្ចការ​ទូត​ដើម្បី​បញ្ចប់​វិបត្តិ​នេះ បាន​និយាយថា ខ្លួន​មាន​ការតក់ស្លុត​និង​សោកសៅ​យ៉ាង​ក្រៃលែង​ចំពោះ​ការប្រហារជីវិត​នេះ​។​

​នៅ​ក្រុង​បាងកក មនុស្ស​រាប់រយ​នាក់​បាន​ធ្វើ​ការតវ៉ា​ប្រឆាំង​អ៊ូរ​អែ​នៅក្រៅ​ស្ថានទូត​មី​យ៉ាន់​ម៉ា ដោយ​ខ្លះ​កាន់​រូបថត​អ្នកទោស រួមទាំង​រូប​លោក​ស្រី​អ៊ុង សាន ស៊ូ​ជី ហើយ​ស្រែក​ថា​«​យើង​ចង់​បាន​លទ្ធិ​ប្រ​​ជា​ធិបតេយ្យ​»​។​

​រដ្ឋមន្ត្រីការបរទេស​ម៉ាឡេស៊ី ក្នុងពេល​ជាមួយគ្នា​បាន​រិះគន់​ការប្រហារជីវិត​នេះ ដោយ​ហៅ​វា​ថា​ជា​«​ឧក្រិដ្ឋកម្ម​ប្រឆាំង​មនុស្សជាតិ​»​និង​អំពាវនាវ​អោយ​ពិនិត្យ​សើរើ​មើល​ឡើងវិញ​កិច្ចព្រមព្រៀង​មូលមតិ​គ្នា​​ប្រាំ​ចំណុច​ដែល​យល់ព្រម​ដោយ​ក្រុម​មេដឹកនាំ​អាស៊ាន​កាលពី​ឆ្នាំមុន ក្នុង​បំណង​បន្ថយ​វិបត្តិ​នយោបាយ​នៅ​មី​យ៉ាន់​ម៉ា​ក្រោយ​រដ្ឋប្រហារ​៕