​ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ លោកស្រី ប៉េង លី​យួន (Peng Liyuan) ភរិយា​របស់​ប្រធានាធិបតី​ចិន​ស៊ី ជីន​ភីង កាលពី​ថ្ងៃ​អង្គារ​ទី ២៦ កក្កដា បាន​ជួប​ជាមួយ​ជំទាវ​ទី​មួយ​ឥណ្ឌូនេស៊ី លោកស្រី អៀ​រី​យ៉ាណា ចូកូ វី​ដូ​ដូ (Iriana Joko Widodo) នៅឯ​លំនៅដ្ឋាន​រដ្ឋ​ទាវ​យូ​តា​យ (Diaoyutai) ក្នុង​ទីក្រុង​ប៉េកាំង​។​

​លោកស្រី​ប៉េង​បាន​ស្វាគមន៍​យ៉ាង​កក់ក្តៅ​ចំពោះ​លោកស្រី​អៀ​រី​យ៉ាណា ដែល​កំពុង​អមដំណើរ​ប្រធានាធិបតី​ឥណ្ឌូនេស៊ី ចូកូ វី​ដូ​ដូ​ក្នុង​ដំណើរ​ទស្សនកិច្ច​របស់​គាត់​ទៅកាន់​ប្រទេស​ចិន​ហើយ​អ្នក​ទាំង​ពីរ​បាន​​រំលឹក​អនុស្សាវរីយ៍​ដ៏​សប្បាយរីករាយ​នៃ​ជំនួប​កាលពី​លើក​មុន​របស់​ពួកគេ​។​

​លោកស្រី​ប៉េង​បាន​និយាយថា ក្នុងនាម​ជា​អ្នកជិតខាង​ដ៏​សំខាន់ ប្រជាជន​ចិន​និង​ឥណ្ឌូណេស៊ី​មាន​ទំនាក់ទំនង​មិត្តភាព​ជា​មួយ​ប្រវត្តិសាស្ត្រ​ដ៏​យូរអង្វែង​។​

​លោកស្រី​បាន​និយាយថា ប្រទេស​ទាំង​ពីរ​បាន​ឃើញ​ការផ្លាស់ប្តូរ​រវាង​ប្រជាជន​និង​ប្រជាជន​ដ៏​រឹងមាំ​ក្នុង​ប៉ុន្មាន​ឆ្នាំ​ថ្មីៗ​នេះ​ហើយ​ឥណ្ឌូនេស៊ី​គឺ​ជា​គោលដៅ​ទេសចរណ៍​ដ៏​ពេញនិយម​ទី​ពីរ​សម្រាប់​ភ្ញៀវ​ទេស​​ចរ​ចិន​។​

​លោកស្រី​អៀ​រី​យ៉ាណា​បាន​និយាយថា លោកស្រី​ពិតជា​រីករាយ​ណាស់​ដែល​បាន​ឃើញ​មិត្តភក្តិ​ចាស់ៗ​នៅ​ទីក្រុង​ប៉េកាំង​និង​ថ្លែងអំណរគុណ​ដល់​លោក​ប្រធានាធិបតី​ស៊ី​និង​លោកស្រី​ប៉េង​សម្រាប់​បដិ​សណ្ឋារ​​កិច្ច​របស់​ពួកគេ​។​

​លោកស្រី​ស្វាគមន៍​ភ្ញៀវទេសចរ​ចិន​កាន់តែ​ច្រើន​មក​ទស្សនា​ប្រទេស​ឥណ្ឌូនេស៊ី ហើយ​និយាយ​ថា​លោកស្រី​សង្ឃឹម​មាន​មិត្តភាព​យូរអង្វែង​រវាង​ឥណ្ឌូនេស៊ី​និង​ចិន​៕

លោកស្រី​ប៉េង លី​យួន​ជួប​ជាមួយ​ជំទាវ​ទីមួយ​ឥណ្ឌូនេស៊ី លោកស្រី អៀ​រី​យ៉ាណា ចូកូ វី​ដូ​ដូ នៅឯ​លំនៅដ្ឋាន​រដ្ឋ​ទាវ​យូ​តា​យ (Diaoyutai) ក្នុង​ទីក្រុង​ប៉េកាំង​កាលពី​ថ្ងៃ​អង្គារ