ប្រែ​សម្រួលៈ​បំណង (XINHUA,ST)៖​យោធា​ចិន​នឹង​មិន​អង្គុយ​នៅ​ស្ងៀម​ឡើយបើសិនជា​ប្រធានសភា​អាម៉េរិក​លោកស្រី ណាន់​ស៊ី ផេ​ឡូ​ស៊ី​(Nancy Pelosi)​នៅតែចចេសទៅធ្វើ​ទស្សនកិច្ច​កោះ​តៃវ៉ាន់ នេះ​បើ​តាម​​ការព្រមាន​មួយ​ចេញពី​អ្នកនាំពាក្យ​យោធា​ចិន​កាលពី​ថ្ងៃ​អង្គារ​។​

​វរសេនីយ៍ឯក តាន់ កេ​ហ្វេយ​(Tan Kefei) អ្នកនាំពាក្យ​ក្រសួង​ការពារ​ជាតិចិន បាន​ធ្វើ​ការព្រមាន​ដូច្នេះ​ជា​ការឆ្លើយតប​ទៅនឹង​សំណួរ​អ្នកកាសែត​មួយ​ពាក់ព័ន្ធ​នឹង​បញ្ហា​នេះ​។​

​លោក​វរសេនីយ៍​តាន់​បាន​និយាយថា ចិន​ទាមទារ​អោយ​អាម៉េរិក​គោរព​ការសន្យា​របស់​ខ្លួន​ថា​«​មិន​គាំទ្រ​ឯករាជ្យភាព​តៃវ៉ាន់​»​។​លោក​បាន​បន្ថែមថា បើ​ភាគី​អាម៉េរិក​នៅតែ​បន្ត​ផែនការ​ទស្សនកិច្ច​នេះ នោះយោ​​ធា​ចិន​នឹង​ចាត់វិធានការ​ខ្លាំងក្លា​ដើម្បី​រារាំង​អន្តរាគមន៍​ពី​ខាងក្រៅ ឬ​ផែនការ​របស់​ពួក​ផ្តាច់ខ្លួន​ទាមទារ​ឯករាជ្យ​តៃវ៉ាន់ ហើយ​ប្តេជ្ញា​ការពារ​អធិបតេយ្យភាព​និង​បូរណភាព​ទឹកដី​របស់​ចិន​»​។​

​លោក​តាន់​បាន​កត់សំគាល់ថា ភាគី​ចិន​បាន​បញ្ជាក់​ទៅ​អាម៉េរិក​ច្បាស់​ណាស់​ថា​ខ្លួន​ប្រឆាំង​នឹង​ដំណើរ​ទស្សន​កិច្វ​របស់​លោកស្រី ផេ​ឡូ​ស៊ី នៅ​កោះ​តៃវ៉ាន់ តែ​បើ​នៅ​តែ​ចចេស​ទៅ​ទស្សនកិច្ច​វា​«​រំលោភ​លើ​គោ​​ល​ការណ៍​ចិន​មួយ​និង​សេចក្តីប្រកាស​រួម​គ្នា​ចំនួន​បី​រវាង​ចិន​និង​អាម៉េរិក ប៉ះពាល់​ធ្ងន់ធ្ងរ​ដល់​អធិបតេយ្យភាព​និង​បូរណភាព​ទឹកដី​របស់​ចិន​ព្រមទាំង​បំផ្លាញ​គ្រឹះ​នយោបាយ​នៃ​ទំនាក់ទំនង​ចិន​-​អា​ម៉េ​​រិក​»​។​

​អ្នកនាំពាក្យ​ក្រសួង​ការពារ​ជាតិចិន វរសេនីយ៍ឯក តាន់ កេ​ហ្វេយ​

​ចំ​ពេល​យោធា​ចិន​ចេញ​ការព្រមាន​ដូច្នេះ ពួក​មន្ត្រី​អាម៉េរិក​បាន​និយាយថា មាន​ការបារម្ភ​តិចតួច​ទេ​ដែល​ថា យោធា​ចិន​អាច​នឹង​វាយប្រហារ​លើ​យន្តហោះ​របស់​លោកស្រី ផេ​ឡូ​ស៊ី បើសិនជា​លោក​ស្រី​ធ្វើ​​ដំណើរ​ទៅកាន់​កោះ​តៃវ៉ាន់ តែ​លោក​ស្រី​ប្រធាន​សភា​នឹង​ឈាន​ចូល​ចំណុចក្តៅ​បំផុត​មួយ​របស់​ពិភពលោក កន្លែង​ដែល​ការយល់​ខុសឬការចាត់វិធានការ​ខុស​ណាមួយ​អាច​បង្ក​គ្រោះថ្នាក់​ដល់​សុវត្ថិភាព​របស់​​លោកស្រី​។ ដូច្នេះ ក្រសួង​ការពារជាតិ​អាម៉េរិក​កំពុង​បង្កើត​ផែនការ​យថាហេតុ​ណាមួយ​។​

​ពួក​មន្ត្រី​បាន​ប្រាប់​ទីភ្នាក់ងារ​សារព័ត៌មាន​AP​ថា ដំណើរ​របស់​លោកស្រី​ផេ​ឡូ​ស៊ី ស្ថិតក្នុង​ភាព​មិន​ទាន់​ច្បាស់​នៅឡើយ​ទេតែ​យោធា​នឹង​បង្កើន​ការ​ចល័ត​ទ័ព​និង​គ្រឿង​យោធា​របស់​ខ្លួន​នៅ​តំបន់​ឥណ្ឌូ​ប៉ា​ស៊ី​ហ្វិ​​ក តែ​បដិសេធ​មិន​ផ្តល់​ព័ត៌មាន​លម្អិត ដោយ​មន្ត្រី​យោធា​ម្នាក់​បាន​និយាយថា​ការចេញ​ក្រៅប្រទេស​របស់​មន្ត្រី​ជាន់ខ្ពស់​អាម៉េរិក​ណាមួយ វាទាមទារ​ការត្រៀម​សន្តិសុខ​បន្ថែម​។​

​កាលពី​ថ្ងៃ​អង្គារ​នេះដែរ ប្រធានាធិបតី​តៃវ៉ាន់​បាន​ឡើង​លើ​នាវាចម្បាំង​មួយ​និង​ប្រកាស​ការពា​រកោះ​នេះ​ក្នុងពេល​លោកស្រីត្រួត​បញ្ជា​សមយុទ្ធ​កងទ័ព​ជើង​ទឹក​និង​អាកាស​ប្រចាំឆ្នាំ​ដ៏​ធំ​។​

 

ប្រធានាធិបតីផ្តាច់ខ្លួននិយមតៃវ៉ាន់ សាយ អ៊ីនវិន ឡើងនាវាចម្បាំងនិងបញ្ជាសមយុទ្ធប្រចាំឆ្នាំកាលពីថ្ងៃអង្គារ

​សមយុទ្ធ​ហាត់​វាយ​រុញច្រាន​ការ​កម្លាំង​ឈ្លានពាននេះ ត្រូវបាន​ធ្វើឡើង​ជួន​ពេល​គ្នា​នឹង​សមយុទ្ធ​ទ័ពអាកាស​នៅ​ទូ​ទាំង​កោះ ដើម្បី​ត្រៀម​ប្រយុទ្ធ​ក្នុងករណី​មាន​ការវាយប្រហារ​មក​ពី​ចិន​។​

​ចិន​ចាត់ទុក​កោះ​តៃវ៉ាន់​ជា​ខេត្ត​ផ្តាច់ខ្លួន​មួយ​របស់​ខ្លួន ដែល​ត្រូវតែ​នាំ​មក​បង្រួបបង្រួម​ជាមួយ​ចិនដីគោក​ឡើង​វិញ​នៅ​ពេល​ណាមួយ និង​អាច​ប្រើ​កម្លាំងយោធា​ក្នុង​ករណី​ចាំបាច់​។​តែក្នុងពេល​ជាមួយគ្នា​​អាជ្ញាធរ​ក្រុង​តៃប៉ិះ (​តៃវ៉ាន់​) បដិសេធ​ការអះអាង​អំពី​អធិបតេយ្យភាព​របស់​ចិន​ប៉េកាំង​និង​ប្តេជ្ញា​ការពារ​សេរីភាព​និង​លទ្ធិប្រជាធិបតេយ្យ​របស់​កោះ​នេះ ក្រោម​ការ​ធានាការពា​រពារ​និង​ផ្គត់ផ្គង់​សព្វាវុធ​​ពី​អាម៉េរិក​៕

​សមយុទ្ធ​ប្រចាំឆ្នាំ​របស់​កោះ​តៃវ៉ាន់​កើតឡើង​ចំ​ពេល​អាម៉េរិក​និង​ចិន​ព្រមាន​អំពី​ការប៉ះទង្គិច​ប្រដាប់អាវុធ​ដោយសារ​តែ​តៃវ៉ាន់​និង​សមុទ្រ​ចិន​ខាងត្បូង​។ លំ​ហាត់​យោធា​នេះ​មាន​ការចូលរួម​ពី​នាវាចម្បាំង​២០​គ្រឿង យន្តហោះ​F-16 និង​យន្តហោះ​ផលិត​ក្នុងស្រុក​Ching-kuo