ប្រែសម្រួល : កញ្ញា​ដា​លី​ស (​ស្ត្រេត​ថែមស៍​) ៖ កូរ៉េ​ខាងជើង​បាន​ប្រើ​ខួប​នៃ​បទ​ឈប់​បាញ់ ដែល​បាន​បញ្ឈប់​ការប្រយុទ្ធ​គ្នា​នៅ​ឧបទ្វីប​កូរ៉េ​កាលពី​៦៩ ឆ្នាំមុន ដើម្បី​ព្រមាន​អំពី “​សង្គ្រាម​កូរ៉េ​លើក​ទី​ពីរ​” ដោយ​បន្ទោស​សហរដ្ឋ​អាម៉េរិក​និង​កូរ៉េខាងត្បូង​ចំពោះ​ការបង្ក​អរិភាព​។​

​កូរ៉េខាងជើង​ប្រារព្វ​ខួប​នៃ​បទ​ឈប់​បាញ់ ដែល​បាន​បញ្ឈប់​ការប្រយុទ្ធ​គ្នា​នៅ​ឧបទ្វីប​កូរ៉េ​កាលពី​៦៩ ឆ្នាំមុន ក្នុង​ព្រឹត្តិការ​សាធារណៈ​ដោយ​មិន​មាន​ពាក់​ម៉ាស់​ការពារកូ​វីដ​១៩

​ក្រសួងការបរទេស​កូរ៉េ​ខាងជើង​បាន​និយាយ​នៅក្នុង​សេចក្តីថ្លែងការណ៍​មួយ​ថា “​សមយុទ្ធ​យោធា​រួម​គ្នា​រវាង​សហរដ្ឋ​អាម៉េរិក​និង​កូរ៉េខាងត្បូង ដែល​កំពុង​អនុវត្ត​ជាមួយនឹង​ក្លិន​រំសេវ​ដ៏​ឈួល​នោះ​កំពុង​​ធ្វើឱ្យ​ស្ថានការណ៍​នៅ​ឧបទ្វីប​កូរ៉េ​កាន់តែ​ធ្ងន់ធ្ងរ​” ដោយ​ហៅ​ប្រទេស​ទាំងពីរ​ថា “​ពួក​បង្ករឿង ដែល​ចង់​បាន​សង្គ្រាម​ដ៏​ខ្លោចផ្សា​”​។​

​សហរដ្ឋ​អាម៉េរិក​និង​កូរ៉េខាងត្បូង​បាន​ធ្វើ​សមយុទ្ធ​យោធា​រួមគ្នា​ក្នុង​ខែ​នេះ ដែល​រួមមាន​ឧទ្ធម្ភាគចក្រ AH-64E Apache និង​យន្តហោះ​ចម្បាំង​បំបាំងកាយ F-35A ។​

​សេចក្តីថ្លែងការណ៍​របស់​កូរ៉េ​ខាងជើងរ​ហូត​មក​ទល់​ពេល​នេះ​ទើបតែ​ត្រូវបាន​ផ្តល់ជូន​នៅលើ​វេបសាយ​របស់​ក្រសួង​ប៉ុណ្ណោះ និង​មិនមែន​នៅ​លើ​ប្រព័ន្ធ​ផ្សព្វផ្សាយ​ផ្លូវការ​របស់​ខ្លួន​ទេ​ដោយ​បង្ហាញ​ថា​វា​អាច​​សម្រាប់​ទស្សនិកជន​ក្នុងស្រុក​។​

​កូរ៉េ​ខាងជើង​បាន​ហៅ​សមយុទ្ធ​រួមគ្នា​នេះ​អស់​ជាច្រើន​ទសវត្សរ៍​មក​ហើយ​ថា​ជា​ការត្រៀម​លក្ខណៈ​ឈ្លានពាន និង​និយាយ​នៅក្នុង​សេចក្តីថ្លែងការណ៍​ថា​សមយុទ្ធ​បច្ចុប្បន្ន​អាច​នឹង​រីក​រាលដាល​ទៅ​ជា​សង្គ្រាម​​កូរ៉េ​លើក​ទី​ពីរ​។​

​សេចក្តីថ្លែងការណ៍​នេះ​ធ្វើឡើង​គាប់​ជួន​ជាមួយនឹង​ការចុះហត្ថលេខា​ថ្ងៃទី ២៧ ខែកក្កដា​លើ​កិច្ចព្រមព្រៀង​ឈប់​បាញ់​ក្នុងចំណោម​កងកម្លាំង​អង្គការសហប្រជាជាតិ​ដែល​ដឹកនាំ​ដោយ​សហរដ្ឋ​អាម៉េរិក កូរ៉េខាងជើង និង​ចិន ដោយ​នាំមក​នូវ​បទ​ឈប់​បាញ់​ដល់​សង្គ្រាម​កូរ៉េ​ឆ្នាំ ១៩៥០-១៩៥៣​។​

​ទោះបី​សង្គ្រាម​បាន​បញ្ចប់​ត្រឹម​បទ​ឈប់​បាញ់ ក៏ប៉ុន្តែ​កូរ៉េ​ខាងជើង​បាន​អបអរ​ថ្ងៃនេះ​ថា​ជា “​ជ័យជម្នះ​ក្នុងបេ​តុភូមិ​”​។​

​អស់​រយៈពេល​ជាច្រើន​ឆ្នាំ​មក​ហើយ​សហរដ្ឋ​អាម៉េរិក​បានចង្អុលបង្ហាញ​ថា ប្រសិនបើ​កូរ៉េខាងជើង​ចង់បាន​សន្ធិសញ្ញា​សន្តិភាព​ផ្លូវការ​និង​ទំនាក់ទំនង​ការទូត​នោះ​ខ្លួន​ត្រូវតែ​លុបចោល​កម្មវិធី​អាវុធ​នុយ​​ក្លេ​អ៊ែរ​។​

​កូរ៉េ​ខាងត្បូង​និង​សហរដ្ឋ​អាម៉េរិក​បាន​ព្រមាន​ថា កូរ៉េខាងជើង​ឆាប់ៗ​នេះ​ទំនងជា​នឹង​សាកល្បង​អាវុធ​នុយក្លេអ៊ែរ​ជា​លើកដំបូង​ចាប់តាំងពី​ឆ្នាំ ២០១៧​ដែល​នឹង​ក្លាយ​ជា​ការសាកល្បង​លើក​ទី​ប្រាំពីរ​របស់​​ខ្លួន​៕

​ទូរទស្សន៍​កូរ៉េខាងជើង​រាយការណ៍​អំពី​ការសាកល្បង​អាវុធ​នាំ​ផ្លូវ​ថ្មី​របស់​ខ្លួន​នៅ​ស្ថានីយ​រថភ្លើង​ក្នុង​ទីក្រុង​សេ​អ៊ូ​ល​កាលពី​ថ្ងៃទី ១៧ ខែ​មេសា ឆ្នាំ ២០២២