​ដោយៈ គ្រី សម្បត្តិ​/​ភ្នំពេញ​៖​កម្លាំង​នគរបាល​បង្ការ​ពន្លត់​និង​សង្គ្រោះ​អគ្គីភ័យ​នៃ​ស្នងការដ្ឋាន​នគរបាល​រាជធានី​ភ្នំពេញ បាន​បើក​កិច្ចប្រជុំ​ត្រួតពិនិត្យ​ការងារ​បង្ការ​ទប់ស្កាត់​អគ្គីភ័យ​និង​ការជួយ​សង្គ្រោះ ដើម្បី​ពង្រឹង​ការងារ​ឱ្យ​កាន់​តែមាន​ប្រសិទ្ធភាព​នៅ​គ្រា​ដែល​គេ​មើលឃើញថា​បញ្ហា​អគ្គីភ័យ​នៅក្នុង​រាជធានី​ភ្នំពេញ​នៅតែ​ជា​បញ្ហា​ប្រឈម​បង្ក​ហានិភ័យ​គ្រោះមហន្តរាយ​ដល់​ប្រជាពលរដ្ឋ ខណៈដែល​រយៈពេល​មួយខែ​ចុង​ក្រោយនេះ​អគ្គីភ័យ​នៅក្នុង​រាជធានី​ភ្នំពេញ​បានកើត​ឡើង​ចំនួន​០៧​លើក បណ្តាលឱ្យ​ឆេះ​ផ្ទះ​ចំនួន​៤៤​ខ្នង ឆេះ​រថយន្ត​បី​គ្រឿង និង​ទ្រព្យសម្បត្តិ​មួយចំនួន​ផងដែរ​។​
​កិច្ចប្រជុំ​នេះ​បានធ្វើ​ឡើង​នា​ថ្ងៃទី​២៦ ខែកក្កដា ឆ្នាំ​២០២២ ដឹកនាំ​ដោយ​លោក​ឧ​ត្ត​ម​សេនីយ៍​ត្រី ស៊ុម សុ​ឃីម ស្នងការរង ទទួល​ផែន​ការងារ​គ្រប់គ្រង​អាវុធជាតិផ្ទុះ​និង​អគ្គីភ័យ ក្នុងនោះ​មានការ​ចូលរួម​ពី​លោកនាយ​ការិយាល័យ​ជំនាញ លោកនាយ​រងការិយាល័យ និង​មន្ត្រី​ពាក់ព័ន្ធ​។​

​លោក​ឧ​ត្ត​ម​សេនីយ៍​ត្រី ស៊ុម សុ​ឃីម ក៏បាន​លើកឡើង​ដាក់ចេញ​វិធានការ​មួយចំនួន​ដល់​កម្លាំង​បង្ការ​សង្គ្រោះ​អគ្គីភ័យ​ដោយបាន​ណែនាំ​កម្លាំង​ជំនាញ​សង្គ្រោះ​អគ្គីភ័យ​ត្រូវ​មានមុខ​ដែល​បាន​បែងចែក​តាម​វេន​ប្រចាំការ​២៤​ម៉ោង​លើ​១៤​ម៉ោង រងចាំ​ទទួល​ព័ត៌មាន និង​ត្រៀម​ចេញ​អន្តរាគមន៍​ឱ្យបាន​ទាន់ពេលវេលា​ឆាប់រហ័ស​ក្នុងករណី​អគ្គីភ័យ​កើតឡើង​ជាយថាហេតុ​ណាមួយ​នោះ​។​

លោក​ឧ​ត្ត​ម​សេនីយ៍​ស្នងការរង ក៏បាន​ណែនាំ​ឱ្យកម្លាំង​ត្រូវ​យកចិត្តទុកដាក់​ប្រកបដោយ​ស្មារតី​ទទួលខុសត្រូវ​ខ្ពស់​លើ​ការងារ​ជួយសង្គ្រោះ​អគ្គីភ័យ និង​បន្ត​ចុះ​ណែនាំ​ប្រជាពលរដ្ឋ​យល់ដឹង​ហើយ​ចូលរួម​បង្ការ​ទប់ស្កាត់​អគ្គីភ័យ​និង​ណែនាំ​ឱ្យមាន​ការថែទាំ​រថ​យន្ត​ពន្លត់អគ្គីភ័យ​និង​សម្ភារៈ​ជាប្រចាំ​ធានា​ឱ្យ​ការប្រើប្រាស់​បាន​គង់​វង់​យូរអង្វែង​៕​