​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ប្រតិបត្តិ​ករ​ទីតាំង​ជីក​រ៉ែ​របស់​អូស្ត្រាលី​បាន​ប្រកាស​កាលពី​ថ្ងៃ​ពុធ​ទី​២៧​កក្កដា​ថា អ្នករុករក​រ៉ែ​ក្នុងប្រទេស​អង់​ហ្គោឡា​បាន​រកឃើញ​ពេជ្រ​ពណ៌​ផ្កាឈូក​សុទ្ធ​ដ៏​កម្រ​មួយ ដែល​គេ​ជឿ​ថា​ជា​គ្រាប់ពេជ្រ​ធំ​បំផុត​ក្នុង​រយៈពេល ៣០០ ឆ្នាំ​។​

​ក្រុមហ៊ុន Lucapa Diamond Company បាន​និយាយ​នៅក្នុង​សេចក្តីថ្លែងការណ៍​មួយ​ទៅ​កាន់​អ្នកវិនិយោគ​ថា ពេជ្រ​ពណ៌​ផ្កាឈូក​ទម្ងន់ ១៧០ កា​រ៉ាត់ ដែល​គេ​ដាក់ឈ្មោះថា The Lulo Rose ត្រូវបាន​រកឃើញ​នៅ​អណ្តូងរ៉ែ​លូ​ឡូ (Lulo) ភាគ​ឦសាន​នៃ​ប្រទេស ហើយ​ជា​ត្បូង​ពេជ្រ​ពណ៌​ផ្កាឈូក​ដ៏​ធំ​បំផុត​មិន​ធ្លាប់​មាន​ពីមុនមក​។​

​ការរកឃើញ “​ជា​ប្រវត្តិសាស្ត្រ​” នៃ​ត្បូង​ពេជ្រ Type IIa ដែល​ជា​ទម្រង់​ដ៏​កម្រ​និង​សុទ្ធ​បំផុត​នៃ​ពេជ្រ​ធម្មជាតិ ត្រូវបាន​ស្វាគមន៍​ដោយ​រដ្ឋាភិបាល​អង់​ហ្គោឡា ដែល​ជា​ដៃគូ​នៅក្នុង​អណ្តូងរ៉ែ​នេះ​ផង​ដែរ​។​

​លោក ដាយ​អា​មែន​ទីណូ អា​ហ្សេ​វេដូ (Diamantino Azevedo) រដ្ឋមន្ត្រី​ក្រសួង​ធនធាន​រ៉ែ​របស់​អង់​ហ្គោឡា​បាន​និយាយថា​”​កំណត់ត្រា​នេះ​និង​ត្បូង​ពេជ្រ​ពណ៌​ផ្កាឈូក​ដ៏​អស្ចារ្យ​ដែល​បាន​រកឃើញ​​ពី​អណ្តូងរ៉ែ​លូ​ឡូ បន្ត​បង្ហាញថា អង់​ហ្គោឡា​ជាតួ​អង្គ​សំខាន់នៅ​លើ​ឆាក​ពិភពលោក​”​។​

​ពេជ្រ​នេះ​នឹង​ត្រូវ​លក់​ក្នុង​ការដេញថ្លៃ​ជា​អន្តរជាតិ ដែល​ទំនងជា​ក្នុងតម្លៃ​ដ៏​អស្ចារ្យ​ណាស់​។​

​ពេជ្រ​ពណ៌​ផ្កាឈូក​ស្រដៀង​គ្នា​នេះ​បាន​លក់​ក្នុងតម្លៃ​បំបែក​កំណត់ត្រា​ពិភពលោក​រួចទៅហើយ​។​

​ត្បូង​ពេជ្រ Pink Star ទម្ងន់ ៥៩,៦ កា​រ៉ាត់ ត្រូវ​បាន​លក់​ដេញថ្លៃ​នៅ​ទីក្រុង​ហុងកុង​ក្នុង​ឆ្នាំ ២០១៧ ក្នុងតម្លៃ ៧១,២ លាន​ដុល្លារ​អាម៉េរិក​។ វា​នៅតែ​ជា​ពេជ្រ​ថ្លៃ​បំផុត​មិន​ធ្លាប់​លក់​ពីមុនមក​៕

ពេជ្រ​មិនទាន់​ច្នៃ The Lulo Rose នឹង​ត្រូវ​លក់​ក្នុងតម្លៃ​ខ្ពស់​បំផុត​មិន​ធ្លាប់មាន​