​ប្រែ​សម្រួលៈ​បំណង​(ST,Sputnik,SCMP)៖ ចិន​កាលពី​ថ្ងៃ​ពុធ​ទី​២៧​កក្កដា​បាន​ព្រមាន​ថា រដ្ឋាភិបាល​ទីក្រុង​វ៉ាស៊ីនតោន​នឹង​«​ទទួលរង​ផលវិបាក​ទាំងអស់​» បើសិនជា​ប្រធានសភា​អាម៉េរិក​លោកស្រី​ ណាន់​ស៊ី ផេ​ឡូ​ស៊ី ទៅធ្វើ​ទស្សនកិច្ច​កោះ​តៃវ៉ាន់​តាម​គំរោង​ផែនការ​។​

​អ្នកនាំពាក្យ​ក្រសួងការបរទេស​ចិន​លោក ចា​វ លី​ជៀន បាន​និយាយថា​« បើ​អាម៉េរិក​បន្ត​ជំរុញ​ផែនការ​នេះ​និង​ផ្គើន​នឹង​ខ្សែបន្ទាត់​ក្រោម​បំផុត​របស់​ចិន​…​ភាគី​អាម៉េរិក​នឹង​ទទួលរង​ផលវិបាក​ទាំងអស់​​ចេញ​ពី​ទង្វើ​នេះ​ចាប់ពីពេលនោះ​តទៅ​»​។​

ដំណើរ​ទស្សនកិច្ច​របស់​លោកស្រី ផេ​ឡូ​ស៊ី ទៅ​កាន់​កោះ​តៃវ៉ាន់ អាច​នាំ​ដល់​ហានិភ័យ​នៃ​ជម្លោះ​យោធា​ដែល​មិន​អាច​មើលឃើញ​មុន​រវាង​កងកម្លាំង​ចិន​និង​អាម៉េរិក ហើយ​រដ្ឋាភិបាល​ទីក្រុង​ប៉េកាំង​អាច​​នឹង​ប្រកាស​ដាក់​តំបន់​ហាម​ហោះហើរ​មួយ ឬ​កំហិត​តំបន់​នាវាចរណ៍​មួយ​នៅក្នុង​ច្រក​សមុទ្រ​តៃវ៉ាន់ ដើម្បី​រារាំង​ដំណើរ​នេះ នេះ​បើ​តាម​ការផ្សាយ​របស់​កា​សែ​ត South China Morning Post​កាល​​ពី​ថ្ងៃ​ពុធ​។​

​លោកស្រី​ផេ​ឡូ​ស៊ី ត្រូវបាន​គេ​រាយការណ៍​ថា​មាន​ផែនការ​ទៅធ្វើ​ទស្សនកិច្ច​តៃវ៉ាន់​នៅ​ប៉ុន្មាន​សប្តាហ៍​ខាង​មុខ ដោយ​បង្ក​ការព្រួយបារម្ភ​ខ្លាំង​ពី​ចិន​ប៉េកាំង​។​ចិន​បាន​រិះគន់​អាម៉េរិក​ម្តង​ហើយ​ម្តងទៀត​អំពី​​ការទាក់ទង​ផ្លូវការ​ជាមួយ​អាជ្ញាធ​រកោះ​តៃវ៉ាន់ ដោយ​ថា​ទង្វើ​ដូច្នេះ​វា​ជ្រៀតជ្រែក​អធិបតេយ្យភាព​និង​បូរណភាព​ទឹកដី​ចិន ព្រមទាំង​បង្ក​អស្ថិរភាព​នៅ​ក្នុង​តំបន់​។​

​កាសែត​បាន​និយាយ​យោង​តាម​អ្នកជំនាញការ​យោធា​ដែល​ជឿថា បើសិនជា​លោក​ស្រី ផេ​ឡូ​ស៊ី នៅតែ​ចចេស​ទៅ​តៃវ៉ាន់ រដ្ឋាភិបាល​ទីក្រុង​ប៉េកាំង​នឹង​ខិតខំ​អស់ពី​លទ្ធភាព​ដើម្បី​រារាំង​វា ដោយ​ប្រើ​ទាំង​​មធ្យោបាយ​ការទូត សេដ្ឋកិច្ច​និង​យោធា​ថែមទៀត​។​

​អ្នកជំនាញការ​ទ័ពជើងទឹក​ចិន​លោក លី ជី បាន​និយាយថា​« ផែនការ​ទៅ​ធ្វើ​ទស្សនកិច្ច​តៃវ៉ាន់​របស់ផេ​ឡូ​ស៊ី បង្កើន​ហានិភ័យ​នៃ​ជម្លោះ​យោធា​រវាង​កងទ័ព​រំដោះ​ប្រជាជន​ចិន​និង​យោធា​អាម៉េរិក​ដោយ​​សារ​បញ្ហា​តៃវ៉ាន់ ដោយហេតុ​ថា​ចិន​សព្វថ្ងៃ​ខុស​ពី​ចិន​កាល​ពី​ទសវត្សរ៍​១៩៩០»​។​

​លោក​បាន​និយាយ​ដល់​វិបត្តិ​ច្រក​សមុទ្រ​តៃវ៉ាន់​ទី​បី​នៅ​ឆ្នាំ​១៩៩៥-១៩៩៦ នៅពេល​រដ្ឋាភិបាល​ទីក្រុង​វ៉ាស៊ីនតោន​បញ្ជូន​ក្រុម​នាវា​ដឹក​យន្តហោះ​ពីរ​កង​ទៅ​កាន់​តំបន់​ដើម្បី​រារាំង​កុំ​អោយ​កងទ័ព​ចិន​ប្រជា​មា​​និត​ប្រែក្លាយ​សមយុទ្ធ​កាំជ្រួ​ចមួយ​នា​ពេល​នោះ​ទៅ​ជា​ការ​ចូល​ឈ្លានពាន​តៃវ៉ាន់​ជាក់ស្តែង​។​

​លោក​លី​បាន​បន្ថែមថា យោធា​អាម៉េរិក​អាច​បញ្ជូន​ក្រុម​នាវា​ផ្ទុក​យន្តហោះ​ទៅ​អមដំណើរ​លោក​ស្រី​ផេ​ឡូ​ស៊ី ក្នុង​ករណី​ចាំបាច់ តែ​យោធា​ចិន​ក៏​មាន​នាវា​ដឹក​យន្តហោះ​ពីរ​កំពុង​ដាក់អោយ​ដំណើរការ ដូច្នេះ​វា​​ហានិភ័យ​ពេក​ហើយ​ដែល​ភាគី​ណាមួយ​បញ្ជូន​នាវា​ចូល​ផ្លូវទឹក​នេះ​។​

​ក្នុងពេល​ជាមួយគ្នា លោក​នី ឡេ​ស្យុង​( Ni Lexiong) សាស្ត្រាចារ្យ​នៅ​សកល​វិទ្យាល័យ​វិទ្យាសាស្ត្រ​នយោបាយ​និង​ច្បាប់​នៅ​ក្រុង​សៀង​ហៃ បាន​និយាយថា គម្លាត​យោធា​និង​បច្ចេកទេស​តិចតួចរ​វា​ង​កង​​ទ័ព​នៃ​មហាអំណាច​ទាំងពីរ អាច​អោយ​ចិន​កាន់តែ​ហ៊ាន​និង​លែង​សូវ​អត់​ឳ​ន​ចំពោះ​ការ​បង្ករឿង​និង​ការ​ប្រឈម​ពី​អាម៉េរិក​។​

​លោក​ថា រដ្ឋាភិបាល​ទីក្រុង​ប៉េកាំង​មាន​មធ្យោបាយ​ធំ​មហិមា​ដើម្បី​បង្ខំ​អោយ​ផេ​ឡូ​ស៊ី​បោះបង់ចោល​ផែនការ​នេះ​។​ឧទាហហ​រណ៍ ក្នុង​លក្ខខណ្ឌ​ជំរើស​យោធា កងទ័ព​ចិន​អាច​ប្រកាស​តំបន់​ហាម​ហោះហើរ​មួយ​​និង​កំហិត​តំបន់​ធ្វើ​នាវាចរណ៍​សំរាប់​ការធ្វើ​សមយុទ្ធ​យោធា​នៅ​ក្បែរ​ច្រក​សមុទ្រ​តៃវ៉ាន់ ដោយ​បង្ខំ​អោយ​យន្តហោះ​របស់​លោកស្រី​ផេ​ឡូ​ស៊ី ត្រូវ​ដូរ​ផ្លូវ បើ​លោក​ស្រី​នៅតែ​ចចេស​ទៅ​តៃវ៉ាន់​។​

​ប្រភព​យោធា​មួយ​បាន​ប្រាប់​កាសែត​ខាងលើ​ថា ដំណើរ​របស់ផេ​ឡូ​ស៊ី អាច​ជាន់​ពេល​គ្នា​នឹង​ខួបកំណើ​រកងទ័ព​រំដោះប្រជាជ​ន​ចិន នៅ​ថ្ងៃ​០១​សីហា ដែល​ពេលនោះ​អាច​នឹង​មាន​សមយុទ្ធ​យោធា​ទ្រង់ទ្រាយ​ធំ​​នៅ​ច្រក​សមុទ្រ​តៃវ៉ាន់ ឬ​នៅ​ឯនាយ​ឆ្នេរ​កោះ​តៃវ៉ាន់ ដោយ​មាន​ការចូលរួម​ពី​នាវាចម្បាំង​និង​យន្តហោះ​ច្រើន ពេល​យោធា​អាម៉េរិក​អាច​នាំ​លោកស្រី​ផេ​ឡូ​ស៊ី​តាម​នាវាចម្បាំង​មួយ​ចេញពី​មូលដ្ឋានទ័ព​អា​ម៉េ​​រិក​នៅ​កោះ​អូ​គី​ណា​វ៉ា​របស់​ជប៉ុន​៕

​ផែនការ​ធ្វើ​ទស្សនកិច្ច​តៃវ៉ាន់​របស់​ប្រធាន​សភា​អាម៉េរិក​កំពុង​បង្ក​ប្រតិកម្ម​ពី​ចិន​និង​ការត្រៀម​កម្លាំង​ទាំង​ចិន​និង​អាម៉េរិក​