​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ប្រព័ន្ធ​ផ្សព្វផ្សាយ​រដ្ឋ​បាន​រាយការណ៍​កាលពី​ថ្ងៃ​ព្រហស្បតិ៍​ទី​២៨​កក្កដា​ថា មេដឹកនាំ​កូរ៉េខាងជើង​លោក គីម ជុង​អ៊ុន បាន​និយាយថា​ប្រទេស​របស់​លោក​បាន​​ត្រៀម​ខ្លួន​រួចជាស្រេច​ដើម្បី​រៀបចំ​ការ​ទប់ទល់​សង្គ្រាម​នុយក្លេអ៊ែរ​និង​សម្រាប់​ការប៉ះទង្គិច​យោធា​ណាមួយ​ជាមួយ​សហរដ្ឋ​អាម៉េរិក ចំ​ពេល​មាន​សញ្ញា​ថា​កូរ៉េ​ខាងជើង​អាច​ធ្វើ​ការសាកល្បង​នុយក្លេអ៊ែ​រ​​ជា​លើកដំបូង​ចាប់តាំងពី​ឆ្នាំ ២០១៧​។​

​យោងតាម​ទីភ្នាក់ងារ​សារព័ត៌មាន KCNA លោក​គីម​បាន​ធ្វើ​ការកត់សម្គាល់​បែប​នេះ​ក្នុងអំឡុង​សុន្ទរកថា​នៅ​ក្នុង​ព្រឹត្តិការណ៍​មួយ​ដើម្បី​ប្រារព្ធ​ខួប​លើក​ទី ៦៩ នៃ​បទ​ឈប់​បាញ់​នៃ​សង្គ្រាម​កូរ៉េ​ថ្ងៃទី​២៧ ខែកក្កដា ដែល​បាន​ធ្វើឱ្យ​កូរ៉េ​ទាំង​ពីរ​នៅតែ​ស្ថិត​ក្នុង​សង្គ្រាម​ដដែល​បើ​គិត​តាមន័យ​បច្ចេកទេស​។​

​លោក​គីម​ក៏​បាន​បរិហារ​រដ្ឋបាល​របស់​លោក​យូ​ន ស៊ុក​យ៉ូល (Yoon Suk-yeol) របស់​កូរ៉េ​ខាងត្បូង​ផងដែរ ដោយ​និយាយថា រាល់​ការប៉ុនប៉ង​ណាមួយ​ដើម្បី​ធ្វើឱ្យ​កូរ៉េខាងជើង​ដួលរលំ​ជា​មុន​នឹង​ត្រូវ​​ជួប​ជាមួយ​ការឆ្លើយតប​យ៉ាង​ម៉ឺងម៉ាត់ និង “​វិនាសកម្ម​”​។​

​លោក​គីម​បាន​និយាយថា “​ខ្ញុំ​សូម​បញ្ជាក់​ម្តងទៀត​ថា កូរ៉េ​ខាងជើង​បាន​ត្រៀម​ខ្លួន​រួចរាល់​ហើយ​សម្រាប់​ការប្រឈមមុខ​គ្នា​ផ្នែក​យោធា​ណាមួយ​ជាមួយ​សហរដ្ឋ​អាម៉េរិក​”​។​

​កូរ៉េខាងជើង​ក្នុង​រយៈពេល​ប៉ុន្មាន​ខែ​ថ្មីៗ​នេះ​បាន​សាកល្បង​មី​ស៊ី​ល​លឿន​ជាង​សំឡេង​និង​មី​ស៊ី​ល​ធម្មតា ដែល​ខ្លួន​និយាយថា​អាច​ផ្ទុក​អាវុធ​នុយក្លេអ៊ែរ​យុទ្ធសាស្ត្រ​ដោយ​កាត់បន្ថយ​ពេលវេលា​ដែល​ទីក្រុង​​សេ​អ៊ូ​ល​នឹងត្រូវ​ឆ្លើយតប​ចំពោះ​ការវាយប្រហារ​ដែល​កំពុង​ធ្វើឡើង​៕

ប្រធានាធិបតី​កូរ៉េខាងជើង គីម ជុង​អ៊ុន