​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ប្រធាន​អង្គការ​សុខភាព​ពិភពលោក​បាន​ផ្តល់​ដំបូន្មាន​ដល់​បុរស​ដែល​មាន​ហានិភ័យ​កើត​ជំងឺ​អុត​ស្វា​ឱ្យ​ពិចារណា​កាត់បន្ថយ​ចំនួន​ដៃគូ​រួមភេទ​របស់​ពួកគេ “​សម្រាប់​ពេល​ឥឡូវនេះ​”​។​

​រឿង​នេះ​កើតឡើង​បន្ទាប់​ពី​ទីភ្នាក់ងារ​សុខភាព​របស់​អង្គការ​សហប្រជាជាតិ​មួយ​នេះ​បានប្រកាសថា​ការរីក​រាលដាល​ជំងឺ​នេះ​ច្រើន​ឡើង​នៅក្នុង​ប្រទេស​ជាច្រើន​អាច​នឹង​ក្លាយជា​ស្ថានភាព​អាសន្ន​ជា​​សកល​។​

​អគ្គនាយក WHO លោក តេ​ត្រូស អា​ដា​ណុ​ម ហ្គេ​ប្រេ​យ៉េ​ស៊ូស បាន​និយាយថា ៩៨ ភាគរយ​នៃ​ករណី​ជំងឺ​អុត​ស្វា ដែល​រកឃើញ​ចាប់តាំងពី​ការ​ផ្ទុះឡើង​នៅ​ក្នុង​ខែ​ឧសភា​គឺ​ស្ថិតក្នុង​ចំណោម​បុរស​ស្រឡាញ់​ភេទ​​ដូចគ្នា មនុស្ស​ស្រឡាញ់​ភេទ​ទាំងពីរ និង​បុរស​ដទៃទៀត ដែល​រួម​ភេទ​ជាមួយ​បុរស​។​

​លោក​បាន​អំពាវនាវ​ឱ្យ​អ្នក​មាន​ហានិភ័យ​ទាំងនោះ​ចាត់​វិធានការ​ការពារ​ខ្លួន​ពួក​គេ​។

​លោកតេ​ត្រូសបាន​និយាយថា “​នោះ​មាន​ន័យ​ថា​បង្កើត​ជម្រើស​ប្រកបដោយ​សុវត្ថិភាព​សម្រាប់​ខ្លួន​អ្នក​និង​អ្នកដទៃ សម្រាប់​បុរស​ដែល​រួម​ភេទ​ជាមួយ​បុរស​។​សម្រាប់​ពេល​ឥឡូវ​នេះ​ក៏​រួមបញ្ចូល​ទាំង​ការ​​កាត់បន្ថយ​ចំនួន​ដៃគូ​រួមភេទ​របស់​អ្នក​ផងដែរ​”​។​

​ប្រធាន WHO បាន​និយាយថា បុគ្គល​ដែល​ឆ្លង​មេរោគ​គួរតែ​នៅ​ដាច់ដោយឡែក​ពី​គេ និង​ចៀសវាង​ការជួបជុំ​គ្នា ដែល​ពាក់ព័ន្ធ​នឹង​ការប៉ះពាល់​គ្នា​ជិតស្និទ្ធ​និង​ការ​ប៉ះ​រាងកាយ​ខណៈ​ប្រជាជន​គួរតែ​ទទួល​​បាន​ព័ត៌មាន​លម្អិត​អំពី​ទំនាក់ទំនង​សម្រាប់​ដៃគូ​ផ្លូវភេទ​ថ្មី ក្នុងករណី​ដែល​ពួកគេ​ត្រូវ​ការតាមដាន​នៅពេល​ក្រោយ​។​

​មជ្ឈមណ្ឌល​គ្រប់គ្រង​និង​បង្ការ​ជំងឺ​របស់​សហរដ្ឋ​អាម៉េរិក​មិនបាន​ណែនាំ​ឱ្យ​បុរស​ដែល​រួម​ភេទ​ជាមួយ​បុរស​កាត់បន្ថយ​ដៃគូ​រួមភេទ​របស់​ពួកគេ​នោះ​ទេ គឺ​គ្រាន់តែ​ថា​ពួកគេ​គួរ​ចៀសវាង​ការប៉ះពាល់​​ស្បែក​ជា​មួយ​មនុស្ស​ដែល​មាន​កន្ទួល ដែល​អាច​ជា​ជំងឺ​អុត​ស្វា​។​

​មន្ត្រី WHO បាន​សង្កត់ធ្ងន់ថា ជំងឺ​អុត​ស្វា​អាច​ឆ្លង​ដល់​អ្នក​ដែល​ប៉ះពាល់​ជាមួយ​អ្នកជំងឺ ឬ​សម្លៀកបំពាក់ ឬ​កម្រាលពូក​ដែល​មាន​មេរោគ​។​

​ទីភ្នាក់ងារ​សុខភាពរ​បស់​អង្គការសហប្រជាជាតិ​នេះ​បាន​ព្រមាន​ថា​ជំងឺ​នេះ​អាច​កាន់តែ​ធ្ងន់ធ្ងរ​ចំពោះ​ប្រជាជន​ដែល​ងាយ​រងគ្រោះ​ដូចជា កុមារ​ឬ​ស្ត្រី​មាន​ផ្ទៃពោះ​។​

​រហូតមកទល់​ពេលនេះ​មាន​ករណី​ជាង ១៩.០០០ ត្រូវបាន​រាយការណ៍​នៅក្នុង​ប្រទេស​ជាង ៧៥ ហើយ​ការស្លាប់​ត្រូវបាន​រាយការណ៍​តែ​នៅក្នុង​ទ្វីបអាហ្វ្រិក​ប៉ុណ្ណោះ​៕

អគ្គនាយក WHO លោក តេ​ត្រូស អា​ដា​ណុ​ម ហ្គេ​ប្រេ​យ៉េ​ស៊ូស