ដោយ: កាំពី / ក្រចេះ ៖ កម្លាំងនគរបាលខេត្តក្រចេះ ដោយមានការចង្អុលបង្ហាញ ពីលោក លន់ សុផាត ស្នងការនគរបាលខេត្ត បានចុះបំបែកលើសំណុំរឿង អំពើឃាតកម្មមួយ ដែលប្ដីកាប់ប្រពន្ធខ្លួនឯង បណ្ដាលឲ្យស្លាប់ នៅកន្លែងកើត ហេតុ។ ហេតុការណ៍ប្ដីកាប់ ប្រពន្ធនេះ បានកើតឡើង នៅយប់ថ្ងៃទី២៦ ខែកក្កដា ឆ្នាំ២០២២ នៅចំណុចទំនប់ចិន ស្ថិតនៅភូមិថ្មក្រែ ឃុំថ្មគ្រែ ស្រុកចិត្របុរី ខេត្តក្រចេះ។
ក្នុងប្រតិបត្តិការ ចុះស្រាវជ្រាវ បានរយៈពេលមួយថ្ងៃពេញ ដោយក្នុងនោះ នគរបាលជំនាញ ព្រហ្មទណ្ឌខេត្ត ស្រុក បានសម្រេចចាប់ឃាត់ខ្លួន ជនសង្ស័យដៃ ដល់ម្នាក់ ជាប្តី នៅថ្ងៃទី២៧ ម្សិលមិញ នេះ។
យោងតាមរបាយការណ៍ នគរបាលស្រុកចិត្របុរី បានបញ្ជាក់ឲ្យដឹងថាៈ សពជនរងគ្រោះ ឈ្មោះ ក្ដាន់ យ៉េម ភេទស្រី អាយុ ៦២ ឆ្នាំ។ ចំណែកជនសង្ស័យ ជាជនដៃដល់ឈ្មោះ មាន ឈាងនី ភេទប្រុស អាយុ ៥៦ឆ្នាំ អ្នកទាំងពីររស់នៅ ភូមិថ្មគ្រែកណ្ដាល ឃុំថ្មគ្រែ ស្រុកចិត្របុរី ខេត្តក្រចេះ។
នគរបាលស្រុកចិត្របុរី បានបញ្ជាក់ទៀតថាៈ នៅថ្ងៃកើតហេតុ ឈ្មោះ ក្ដាន់ យ៉េម ជាមួយនឹងប្ដី ឈ្មោះ មាន ឈាងនី បានទៅបោះតង់ធ្វើរោង នៅចំណុចកើតហេតុ តែពីរនាក់ប្ដីប្រពន្ធ ដើម្បីធ្វើស្រែ។ មុនពេលកើតហេតុ ឈ្មោះ ក្ដាន់ យ៉េម នៅចាំរោង ចំណែកប្ដី ឈ្មោះ មាន ឈាងនី ទៅភ្ជួរស្រែ លុះដល់ពេលកើតហេតុ ឈ្មោះ មាន ឈាងនី មកពីស្រែវិញ ចង់យកគោយន្ដ ដឹកស្រូវ យកទៅឲ្យប្រពន្ធចុង ឈ្មោះ មួង ស៊ីនាត អាយុ ៤៣ ឆ្នាំ រស់នៅឃុំចង្ក្រង់ ស្រុកចិត្របុរី ខេត្តក្រចេះ។
ខណៈពេលនោះ ឈ្មោះ មាន ឈាងនី ខឹងប្រពន្ធរអ៊ូរទាំ ឲ្យខ្លួនដដែលៗពេក ក៍បានយក កូនពូថៅ នៅលើរ៉ឺម៉កគោយន្ដ កាប់ប្រពន្ធ ត្រូវកញ្ចឹង ក ខាងឆ្វេង មួយពូថៅ ដួលផ្កាប់មុខ លើចង្ក្រានបាយ ស្លាប់នៅនឹងកន្លែង ហើយទូរស័ព្ទប្រាប់កូន ឈ្មោះ ហ៊ត រ៉ាវី អាយុ ៣០ ឆ្នាំ ថា ប្រពន្ធខ្យល់គរ ដួលស្លាប់ ហើយក្រុមគ្រួសារ បានដឹកយកទៅមន្ទីរសុខភាពថ្មគ្រែ រួចបន្តដឹកសព មកផ្ទះនៅភូមិតែម្ដង។
បើតាមចម្លើយសារភាពរបស់ជនដៃដល់ ត្រូវជាប្តីចិត្តព្រៃផ្សៃ បានសារភាពថាៈ កាលពីយប់ ថ្ងៃកើតហេតុ ថ្ងៃទី២៦ ខែកក្កដា ឆ្នាំ២០២២ នេះ រូបគេបានធ្វើ សកម្មភាព យកពូថៅ កាប់ ទៅលើស្ត្រីរងគ្រោះ ជាប្រពន្ធឈ្មោះ ក្តាន់ យេម ចំកញ្ចឹង ក ខាងឆ្វេង បណ្តាលឱ្យដួល ផ្កាប់មុខ ទៅលើចង្ក្រាន ស្លាប់នៅនឹងកន្លែង នៅមុខខ្ទមស្រែ ពិតប្រាកដមែន ដោយសារតែ ខឹងនឹងស្ត្រីរងគ្រោះ មិនឱ្យរូបគេ ដឹកស្រូវយកទៅឱ្យប្រពន្ឋចុង។
បច្ចុប្បន្ន ជនសង្ស័យ ជាជនដៃដល់ ឈ្មោះ មាន ឈាងងនី ត្រូវឃាត់ខ្លួនជា បណ្ដោះអាន្ន នៅអធិការដ្ឋាននគរបាល ស្រុកចិត្របុរី ដើម្បីបំពេញសំណុំរឿង បញ្ជូនទៅការិយាល័យ ជំនាញខេត្ត ដើម្បីអនុវត្តបន្ត តាមនីតិវិធី៕/V-PC
