​ប្រែ​សម្រួល : កញ្ញា​ដា​លី​ស (Global Times) ៖ រ៉ុក្កែត Lijian-1 (ZK-1) របស់​ចិន​បាន​ធ្វើ​ការហោះហើរ​លើកដំបូង​របស់​ខ្លួន​ពី​មជ្ឈមណ្ឌល​បាញ់​បង្ហោះ​ផ្កាយរណប​ជីវ​ក្វាន់ (Jiuquan) នៅ​ភាគ​ពាយព្យ​ប្រទេស​ចិន ដោយ​បាន​បញ្ជូន​ផ្កាយរណប​ចំនួន​ប្រាំមួយ​ទៅកាន់​គន្លង​ដែល​បាន​កំណត់​ទុកជាមុន​ដោយ​ជោគជ័យ​។ យោង​តាម​អ្នក​អភិវឌ្ឍន៍​របស់​វា គឺ​បណ្ឌិត្យសភា​វិទ្យាសាស្ត្រ​ចិន (CAS) រ៉ុក្កែត​ថ្មី​ដែល​មាន​អង្កត់ផ្ចិត ២,៦៥ ម៉ែត្រ​និង​បណ្តោយ​ប្រវែង ៣០ ម៉ែត្រ​នេះ​គឺជា​ប្រភេទ​រ៉ុក្កែត​ធំ​បំផុត​នៅក្នុង​ប្រទេស​ចិន​។​

​ការហោះហើរ​ដំបូង​ដោយ​ជោគជ័យ​របស់​រ៉ុក្កែត ZK-1 ដែល​មាន​បំណង​គាំទ្រ​ជា​ចម្បង​លើ​បេសកកម្ម​បាញ់​បង្ហោះ​ផ្កាយរណប​ខ្នាតតូច​និង​មធ្យម មិន​ត្រឹមតែ​ផ្តល់​នូវ​ជម្រើស​សមត្ថភាព​បន្ថែម​ទៀត​សម្រាប់​ការបាញ់​បង្ហោះ​ដោយ​ប្រើ​រ៉ុក្កែត​រឹង​ប៉ុណ្ណោះ​ទេ ប៉ុន្តែ​ថែមទាំង​នាំមក​នូវ​ការអភិវឌ្ឍ​របស់​ប្រទេស​ចំពោះ​ប្រភេទ​រ៉ុក្កែត​បែបនេះ​ដល់​កម្រិត​លំដាប់​ពិភពលោក​ទៀតផង​។​

​នៅក្នុង​សេចក្តីថ្លែងការណ៍​មួយ​ដែល CAS បាន​ផ្តល់​ឱ្យ​ទៅ​កាសែត Global Times កាលពី​ថ្ងៃ​ពុធ CAS បាន​និយាយថា អ្វីដែល​ធ្វើឱ្យ​វា​ក្លាយជា​រ៉ុក្កែត​រឹង​លំដាប់​ពិភពលោក​គឺ​ផ្អែក​លើ​ផ្នែក​ជាច្រើន រួម​ទាំង​សមត្ថភាព​បាញ់​បង្ហោះ ភាពជឿជាក់ និង​ការចំណាយ​តិច​របស់​វា​សម្រាប់​បេសកកម្ម​បាញ់​បង្ហោះ​។​

​រ៉ុក្កែត​នេះ​គឺជា​យាន​បាញ់​បង្ហោះ​បួន​ដំណាក់កាល​និង​មាន​ទម្ងន់ ១៣៥ តោន នៅពេល​បាញ់​បង្ហោះ​ជាមួយនឹង​កម្លាំង​ត្បុរ ២០០ តោន​។ ក្បាល​រ៉ុក្កែត​នេះ​មាន​អង្កត់​ផ្ចិត ២,៦៥ ម៉ែត្រ​ក្នុងអំឡុងពេល​បាញ់​បង្ហោះ​កាលពី​ថ្ងៃ​ពុធ​ទី​២៧​កក្កដា​។ CAS បាន​បង្ហាញ​ឱ្យដឹងថា រ៉ុក្កែត ZK-1 មាន​សមត្ថភាព​បញ្ជូន​វត្ថុ​ទម្ងន់ ១.៥០០ គីឡូក្រាម​ទៅក្នុង​គន្លង​ព្រះអាទិត្យ​ចម្ងាយ ៥០០ គីឡូម៉ែត្រ (SSO)៕

រ៉ុក្កែត ZK-1 ដឹក​ផ្កាយរណប​ចំនួន​៦​ទៅ​ដង​តារាវិថី​កាលពី​ថ្ងៃ​ពុធ​