​ប្រែ​សម្រួលៈ​បំណង​(​ដេល្លី​ម៉េល​)៖ មនុស្ស​ប្រាំពីរ​នាក់ ភាគច្រើន​ជា​កសិករ ត្រូវ​រន្ទះបាញ់​ស្លាប់​នៅក្នុង​ភូមិ​មួយ​នៅក្នុង​រដ្ឋ​អ៊ុត​តា ប្រា​ដែសរបស់​ឥណ្ឌា នេះ​បើ​តាម​ការបញ្ជាក់​ពី​ប៉ូលិស​កាលពី​ថ្ងៃ​ព្រហស្បតិ៍ ​ដោយ​ធ្វើ​អោយ​ចំនួន​មនុស្ស​ស្លាប់​ដោយ​រន្ទះបាញ់​នៅក្នុង​រដ្ឋ​ភាគ​ខាងជើង​នេះ​ឡើងដល់​៤៩​នាក់​នៅក្នុង​សប្តាហ៍​នេះ​។​

​កសិករ​រងគ្រោះ​បាន​ជ្រក​ក្រោម​ដើមឈើ​ក្នុងពេល​ធ្លាក់ភ្លៀង​កាលពី​ថ្ងៃ​អង្គារ ហើយ​រន្ទះ​បាន​បាញ់​ពួកគេ​ស្លាប់​ភ្លាមៗ​។​ជនរងគ្រោះ​រួមមាន សមាជិក​បួន​នាក់​ក្នុង​គ្រួសារ​មួយ និង​សត្វពាហនៈ​ខ្លះ​នៅ​ក្បែរ​​ទីក្រុង​កូ​សំ​ប៊ី​(Kaushambi)​។​

​ការស្លាប់​ដោយ​រន្ទះបាញ់​ដ៏​ច្រើន​នេះ​នាំ​អោយ​រដ្ឋាភិបាល​ចេញ​ការណែនាំ​អោយ​ប្រជាជន​ចេះ​ការពារ​ខ្លួន​ក្នុងអំឡុងពេល​មាន​ព្យុះភ្លៀង ។​

សូមបញ្ជាក់ថា ​រដូវវស្សា​នៅ​ឥណ្ឌា​ចាប់ពី​ខែមិថុនា ដល់ កញ្ញា​។​មន្ត្រី​ម្នាក់​នៅ​នាយកដ្ឋាន​ឧតុនិយម​ឥណ្ឌា​បាន​អោយដឹងថា រន្ទះបាញ់​សម្លាប់​មនុស្ស​ជិត​៧៥០​នាក់​នៅ​ទូទាំង​ឥណ្ឌា​ចាប់តាំងពី​ខែ​មេសា​មក ក្នុងនេះ​២០​នាក់​​នៅក្នុង​រដ្ឋ​ប៊ី​ហា​(Bihar)​នៅ​ពីរ​ថ្ងៃ​មកនេះ និង​១៦​នាក់​នៅ​រដ្ឋ​ម៉ា​តយ៉ា​(Madhya)​នៅ​ខែ​នេះ​។​

​មន្ត្រី​បរិស្ថាន​ឥណ្ឌា​ម្នាក់ បាន​និយាយថា ការឡើង​កំដៅ​ផែនដី​ដើរតួនាទី​មួយ​ក្នុង​ការកើនឡើង​នៃ​រន្ទះបាញ់​សម្លាប់​មនុស្ស​។​លោក​ថា កំណើន​សីតុណ្ហភាព​មួយ​អង្សា​សេ នាំ​អោយ​រន្ទះបាញ់​កើនឡើង​១២​ដង​។​

​ចំណែក​មន្ត្រី​ម្នាក់​ទៀត​បន្ទោស​លើ​ការបំផ្លាញ​ព្រៃឈើ ការ​បំហិនទឹក​និង​ការបំ​ពុលបរិស្ថាន​សុទ្ធតែ​ចូលរួម​អោយ​ប្រែប្រួល​អាកាសធាតុ ដែល​នាំ​ដល់​ការ​មាន​រន្ទះ​កាន់​ច្រើនឡើង​។​

​មនុស្ស​ជាង​២០០​នាក់​ត្រូវបាន​សម្លាប់​ដោយ​ជំនន់​ទឹកភ្លៀង​និង​ការបា​ក់ដី​សង្កត់​នៅ​រដ្ឋ​ឥណ្ឌា​មួយចំនួន រួម​មាន​រដ្ឋ​អា​សាម​(Assam) ម៉ា​នី​ពួរ​(Manipur) ទ្រី​ពូ​រ៉ា​(Tripura)​និង​ស៊ី​ក​គីម​(Sikkim) នៅពេល​៤២​នាក់​ទៀត​ស្លាប់​ដោយ​ឧបទ្ទវហេតុ​ដូច​គ្នា​នៅ​បង់​ក្លា​ដែ​សចាប់​តាំងពី​ថ្ងៃ​១៧​ឧសភា​មក​៕