ដោយៈ គង់​ហេង​/ ត្បូងឃ្មុំៈ បុរស​ជាជាង​សំណង់​ម្នាក់​បាន​លង់ទឹក​ស្លាប់ នៅក្នុង​ប្រឡាយ​ជម្រៅ​ជិត ពីរ​ម៉ែត្រ នា​តំបន់​ទួល​ប្រវត្តិសាស្ត្រ​«​ទុំ​ទាវ​»​ស្ថិតក្នុង​ភូមិ​ជាង​ខាល ឃុំ​មង់​រៀវ ស្រុក​ត្បូងឃ្មុំ បន្ទាប់ពី​ផឹកស្រា​ហើយ បាន​ប្រាប់​ក្រុមការងារ​ថា ទៅរក​កាប់​សត្វ​ពស់ថ្លាន់ កាលពី​ក្បាល​ព្រលប់​ថ្ងៃទី​២៧ កក្កដា​ម្សិលមិញ​។​

​តាម​ការបំភ្លឺ​រប​ស់បុ​រស​ជាជាង​សំណង់​ដូចគ្នា​ប្រាប់​សមត្ថកិច្ច នៅក្រោយ​កើតហេតុ​ថាៈ ជនរងគ្រោះ​ដែល​ស្លាប់​ដោយសារ​លង់ទឹក​ឈ្មោះ ឌុ​ក សា​វិ​ន អាយុ ៤៩ ឆ្នាំ រស់នៅ​ភូមិ​ត្រពាំង​ធំ ឃុំ​ស្រឡប់ ស្រុក​ត្បូងឃ្មុំ និង​មានមុខរ​បរជាក​ម្មក​រ​សំណង់ ធ្វើ​របង​នៅ​ទីទួល​ប្រវត្តិសាស្ត្រ​«​ទុំ​ទាវ​»​ស្ថិតក្នុង​ភូមិ​ឃុំ កើតហេតុ​ជាមួយ​ខ្លួន​ដែរ​។​

​ប្រភព​ដដែល​បាន​បំភ្លឺ​ប្រាប់​សមត្ថកិច្ច​ទៀតថាៈ នៅមុន​លង់ទឹក​ស្លាប់​ជនរងគ្រោះ​បាន​ជួបជុំ​អង្គុយ​ផឹកស្រា​ជាមួយ​អ្នក​រួម​ការងារ​ចំនួន ប្រាំ នាក់​រហូតដល់​ម៉ោងជាង ៦ ល្ងាច ក្បាល​ព្រលប់​ថ្ងៃទី​២៧ កក្កដា​ដដែល បាន​ប្រាប់ថា ខ្លួន​ឈប់​ផឹក​ហើយ ទៅរក​កាប់​សត្វ​ពស់ អ្នក​ក្នុង​វង់​បាន​ឃាត់ តែ​ជនរងគ្រោះ​មិន​ស្តាប់​។​

​ប្រភព​នោះបាន​បន្តថាៈ រង់ចាំ​ប្រហែល​ជិត មួយ ម៉ោង​មិនឃើញ ឌុ​ក សា​វិ​ន ត្រឡប់មកវិញ ក៏​នាំគ្នា​តាម​រកបាន​ប្រទះឃើញ​ដេក​ផ្កាប់មុខ​ស្លាប់​នៅក្នុង​ប្រឡាយទឹក​ជម្រៅ​ជិត ពីរ ម៉ែត្រ​ក៏​នាំគ្នា​ស្រង់​មក​ដាក់​លើគោក គឺ​ជនរងគ្រោះ​បាន​ស្លាប់បាត់​ហើយ និង​បាន​រាយការណ៍​ជូន​សមត្ថកិច្ច​មក​ពិនិត្យ​សាកសព​នេះ​៕​