ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ សមាជិក​សភា​ជប៉ុន​មួយក្រុម រួម​ទាំង​អតីតរដ្ឋមន្ត្រី​ការពារ​ជាតិ​ពីររូប​បាន​ជួប​ជាមួយ​ប្រធានាធិបតី​តៃវ៉ាន់​កាលពី​ថ្ងៃ​ព្រហស្បតិ៍​ទី​២៨​កក្កដា​ក្នុង​ដំណើរ​​ទស្សនកិច្ច​កម្រិត​ខ្ពស់​ដ៏​កម្រ​មួយ​ដើម្បី​ពិភាក្សា​អំពី​សន្តិសុខ​ក្នុង​តំបន់​។​

​គណៈប្រតិភូ​ដឹកនាំ​ដោយ​សមាជិក​សភា​និង​ជា​អតីតរដ្ឋមន្ត្រី​ការពារជាតិ​លោក ស៊ី​ហ្គេ​រូ អ៊ី​ស៊ី​បា (Shigeru Ishiba)​បាន​និយាយថា​ខ្លួន​ចង់​ឈាន​ដល់​កិច្ចព្រមព្រៀង​ជាមួយ​តៃវ៉ាន់​លើ​បញ្ហា​ការពារជាតិ​​និង​ត្រៀម​ខ្លួន​សម្រាប់​ជម្លោះ​ដែល​អាច​កើតមាន​នៅក្នុង​តំបន់ ខណៈ​ព្យាយាម​ទប់ស្កាត់​ជម្លោះ​កុំ​ឱ្យ​ផ្ទុះ​ឡើង​ផងដែរ​។​

​លោក​បាន​និយាយ​នៅក្នុង​សុន្ទរកថា​ដែល​រៀបចំ​ទុក​មុន​នៅឯ​ការិយាល័យ​ប្រធានាធិបតី​តៃវ៉ាន់​ថា “​យើង​ត្រូវ​គិត​ជា​មុន​អំពី​ស្ថានភាព​បែបណា​ដែល​អាច​កើតឡើង ច្បាប់​និង​កិច្ចព្រមព្រៀង​ប្រភេទ​ណា​​ដែល​យើង​គួររៀបចំ និង​អាវុធ​ប្រភេទ​ណា​ដែល​យើង​អាច​ប្រើប្រាស់​។ យើង​ត្រូវ​ធ្វើការ​ជាមួយ​គ្នា​ដើម្បី​ឈាន​ដល់​ការមូល​មតិ​គ្នា​លើ​បញ្ហា​នេះ​មុនពេល​មាន​អ្វីមួយ​កើតឡើង​”​។​

​លោក​អ៊ី​ស៊ី​បា​បាន​កត់សម្គាល់​ថា ជប៉ុន​ក៏​កំពុង​ធ្វើការ​យ៉ាង​ជិតស្និទ្ធ​ជាមួយ​សហរដ្ឋ​អាម៉េរិក​ផងដែរ​ដើម្បី​ទប់ស្កាត់​ជម្លោះ​នៅ​ឥណ្ឌូ​ប៉ាស៊ីហ្វិក ដោយ​និយាយថា សម្ពន្ធមិត្ត​ការពារជាតិ “​គ្មាន​ជម្រើស​អ្វី​” ក្រៅតែពី​ការត្រៀម​លក្ខណៈ​៕

​ប្រធានាធិបតី​តៃវ៉ាន់​លោកស្រី សៃ អ៊ីង​វិន ស្វាគមន៍​គណៈប្រតិភូ​ជប៉ុន​កាលពី​ថ្ងៃ​ព្រហស្បតិ៍​ក្នុង​ទីក្រុង​តៃប៉ិ