​ដោយៈ សុផល / ភ្នំពេញ​៖ ក្រសួង​សាធារណការ និង​ដឹកជញ្ជូន នា​ថ្ងៃទី​២៧ ខែកក្កដា បាន​បើក​វគ្គ​បណ្តុះបណ្តាល ស្ដីពី​ចំណេះដឹង ដែល​អ្នកបើកបរ ទោចក្រយានយន្ត ទោចក្រយានយន្ត​សណ្តោង​រ៉ឺម៉ក ត្រីចក្រយានយន្ត ត្រូវ​យល់ដឹង​ពី​សុជីវធម៌ ក្នុងការ​បើកបរ ច្បាប់​ចរាចរណ៍ និង​សញ្ញា​ចរាចរណ៍​ផ្លូវគោក ដោយមាន​ការចូលរួម​ពី​សិក្ខាកាម ចំនួន​ប្រមាណ ១០០ នាក់ និង​មានការ​បង្ហាត់បង្ហាញ​ដោយផ្ទាល់ ពី​មន្ត្រី​ជំនាញ​នៃ អគ្គនាយកដ្ឋាន​ដឹកជញ្ជូន​ផ្លូវគោក​។​

​វគ្គ​បណ្តុះបណ្តាល​នេះ បានរៀបចំ​ឡើង ក្នុង​គោលបំណង​បង្កើន​សមត្ថភាព​យល់ដឹង ពី​ច្បាប់​ចរាចរណ៍​ផ្លូវគោក ជូន​ដល់​ក្រុម​អ្នក​ដឹកជញ្ជូន ដែល​ផ្តល់​សេវា​ដឹកជញ្ជូន​ចំណីអាហារ តាមរយៈ​ម៉ូតូ ក្នុង​គោលដៅ​លុបបំបាត់ ការបំពានច្បាប់​ចរាចរណ៍ កាត់បន្ថយ​គ្រោះថ្នាក់ ចរាចរណ៍ និង​រក្សា​សុវត្ថិភាព ក្នុងពេល​បើកបរ​។​

​ការបណ្តុះបណ្តាល​នេះ បានធ្វើ​បទ​បង្ហាញ​សំខាន់ៗ​មួយចំនួន ដូចជា​៖ (១) មាត្រា​សំខាន់ៗ នៃ​ច្បាប់​ស្តីពី​ចរាចរណ៍​ផ្លូវគោក (២)​សញ្ញា​ចរាចរណ៍​ផ្លូវគោក (៣) សិទ្ធិ​អាទិភាព​នៅ ផ្លូវ​ប្រសព្វ (៤)​ការត្រួតពិនិត្យ​យានជំនិះ និង​ការ​ផ្ទុកទំនិញ និង​(៥)​បច្ចេកទេស និង​សុវត្ថិភាព ក្នុងការ​បើកបរ​។​

​ថ្លែង​ទៅកាន់​អ្នកចូលរួម លោក សុខុម វីរ​ផល អគ្គនាយករង នៃ​អគ្គនាយកដ្ឋាន​ដឹកជញ្ជូន ផ្លូវគោក បានលើកឡើង​ថាៈ យោងតាម​អង្គការ UNDP និង​គណៈកម្មាធិការ​ជាតិ សុវត្ថិភាព​ចរាចរណ៍​ផ្លូវគោក ក្នុង​មួយថ្ងៃ គិត​ជា​មធ្យម មាន​មនុស្ស ៥ នាក់ បាន​ស្លាប់ និង​រងរបួស ១០ នាក់ ហើយ​គ្រោះថ្នាក់​នេះ បានធ្វើឱ្យ​កម្ពុជា ខាតបង់​ផលិតផល ក្នុងស្រុក​សរុប (GDP) ប្រមាណ ២,៥% ទៅ ៣% ក្នុង​មួយឆ្នាំ​។ ចំណែកឯ​ការកកស្ទះ ចរាច​ណ៍​វិញ ធ្វើឱ្យ​ខាតបង់​ប្រាក់​ប្រមាណ ៧២ លាន​ដុល្លារ ក្នុង​មួយឆ្នាំ​៕/V​