ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ស្ត្រី​ដែល​មាន​ទ្រព្យសម្បត្តិ​ច្រើន​ជាង​គេ​នៅ​អាស៊ី​បាន​បាត់បង់​ទ្រព្យសម្បត្តិ​ជាង​ពាក់កណ្តាល​ក្នុង​ឆ្នាំ​កន្លង​ទៅ​បន្ទាប់​ពី​វិស័យ​អចលនទ្រព្យ​របស់​ចិន​ត្រូវបាន​​អង្រួន​ដោយ​វិបត្តិ​សាច់ប្រាក់​។​

​លោកស្រី យ៉ាង ហ៊ុយ​យ៉ាន (Yang Huiyan) អាយុ ៤១ ឆ្នាំ ជា​ម្ចាស់​ភាគហ៊ុន​ធំ​និង​ជា​អនុប្រធាន​ក្រុមហ៊ុន​អចលនទ្រព្យ​យក្ស​ចិន Country Garden​បានឃើញ​ទ្រព្យសម្បត្តិ​សុទ្ធ​របស់​ខ្លួន​ធ្លាក់​​ចុះ​ជាង ៥២ ភាគរយ​ពី ២៣,៧ ពាន់​លាន​ដុល្លារ​មក​នៅត្រឹម ១១,៣ ពាន់​លាន​ដុល្លារ​ក្នុង​ឆ្នាំ​កន្លង​ទៅ នេះ​បើ​យោង​តាម​ស​ន្ទ​ស្សន៍​មហាសេដ្ឋី​ប្ល៊ូ​ម​បឺ​ក (Bloomberg Billionaires Index)​។​

​ទ្រព្យសម្បត្តិ​របស់​លោក​ស្រី​យ៉ាង​បាន​ជួប​បញ្ហា​ធំ​មួយ​ទៀត​កាលពី​ថ្ងៃ​ពុធ​ទី​២៧​កក្កដា នៅពេល​ដែល​ភាគហ៊ុន​ចុះបញ្ជី​នៅ​ហុងកុង​របស់​ក្រុមហ៊ុន Country Garden បាន​ធ្លាក់ចុះ ១៥ ភាគរយ បន្ទាប់ពី​ក្រុមហ៊ុន​បាន​ប្រកាសថា​ខ្លួន​នឹង​លក់​ភាគហ៊ុន​ថ្មី​ដើម្បី​បង្កើន​ដើមទុន​។​

​វិស័យ​អចលនទ្រព្យ​ត្រូវ​បាន​ប៉ាន់ប្រមាណ​ថា​មាន​ចំណែក​ពី ១៨ ទៅ ៣០ ភាគរយ​នៃ​ផលិតផល​ក្នុងស្រុក​សរុប​របស់​ចិន ហើយ​ជា​កត្តា​ជំរុញ​ដ៏​សំខាន់​នៃ​កំណើន​នៅក្នុង​សេដ្ឋកិច្ច​ធំ​ទី​ពីរ​របស់​ពិភពលោក​។​

​ការដួលរលំ​ទីផ្សារ​អចលនទ្រព្យ​បានចាប់ផ្តើម នៅពេល​អាជ្ញាធរ​ចិន​បាន​បង្ក្រាប​បំណុល​លើសលប់​ក្នុង​វិស័យ​អចលនទ្រព្យ​ក្នុង​ឆ្នាំ ២០២០ ដែល​ធ្វើឱ្យ​តួអង្គ​សំខាន់ៗ​ដូចជា​ក្រុមហ៊ុន Evergrande​និង​​ក្រុមហ៊ុន Sunac ជួប​ការលំបាក​ក្នុងការ​ទូទាត់​និង​បង្ខំ​ឱ្យ​ពួកគេ​ចរចា​ជាមួយ​ម្ចាស់បំណុល ខណៈ​ពួកគេ​កំពុង​ប្រឈមមុខ​នឹង​ការ​ក្ស័យធន​។​

​អ្នកទិញ​នៅ​ទូទាំង​ប្រទេស ដែល​ខឹងសម្បា​ចំពោះ​ការសាងសង់​យឺតយ៉ាវ​និង​ការ​ពន្យា​ពេល​នៃ​ការប្រគល់​អចលនទ្រព្យ​របស់​ពួកគេ បានចាប់ផ្តើម​លែង​បង់លុយ​រំលស់​ផ្ទះ​ដែល​បាន​លក់ មុន​ពេល​សង់​រួចរាល់​។​

​ខណៈ​ក្រុមហ៊ុន Country Garden នៅតែ​មិន​រង​ផល​ប៉ះពាល់​ពី​ភាពចលាចល​ក្នុង​ឧស្សាហកម្ម វា​បាន​ធ្វើឱ្យ​វិនិយោគិន​ភ័យ​ស្លន់ស្លោ​ជាមួយនឹង​ការប្រកាស​កាលពី​ថ្ងៃ​ពុធ​ថា​ខ្លួន​គ្រោង​នឹង​រៃអង្គាស​​ប្រាក់​ជាង ៣៤៣ លាន​ដុល្លារ​តាមរយៈ​ការលក់​ភាគហ៊ុន ដែល​មួយ​ផ្នែក​គឺ​ដើម្បី​សងបំណុល​។​

​ក្រុមហ៊ុន Country Garden បាន​និយាយ​នៅក្នុង​ឯកសារ​មួយ​ទៅ​កាន់​ផ្សារ​ហ៊ុន​ហុងកុង​ថា ប្រាក់ចំណូល​ដែល​ទទួលបាន​ពី​ការលក់​នឹង​ត្រូវ​បាន​ប្រើ​សម្រាប់​”​ការផ្តល់​ហិរញ្ញប្បទាន​ដល់​បំណុល​នៅក្រៅ​​ប្រទេស​ដែល​មាន​ស្រាប់ ដើមទុន​ដំណើរការ​ទូទៅ និង​គោលបំណង​អភិវឌ្ឍន៍​នាពេល​អនាគត​”​។​

​លោកស្រី​យ៉ាង​បាន​ទទួល​មរតក​ភាគហ៊ុន​តម្លៃ​រាប់​ពាន់​លាន​ដុល្លារ​នៃ​ក្រុមហ៊ុន​ពី​ឪពុក​របស់​គាត់ គឺ​លោក យ៉ាង គូ​ឈាំ​ង (Yang Guoqiang)​។​ដំបូង​ឡើយ​ជា​កសិករ​និង​ជា​កម្មករ​នៅ​កន្លែង​ចិញ្ចឹម​​គោ​យក​ទឹក​ដោះ គាត់​បាន​បង្កើត​ក្រុមហ៊ុន​អភិវឌ្ឍន៍​អចលនទ្រព្យ Country Garden ក្នុង​ខេត្ត​ក្វាង​ទុង​នៅ​ភាគខាងត្បូង​ប្រទេស​ចិន​ក្នុង​ឆ្នាំ ១៩៩២​។​

​លោក​គូ​ឈាំ​ង​បាន​ពង្រីក​វា​ទៅ​ជា​ក្រុមហ៊ុន​អភិវឌ្ឍន៍​អចលនទ្រព្យ​ដ៏​ធំ​បំផុត​មួយ​នៅក្នុង​ប្រទេស​ចិន​។​

​គាត់​បាន​ផ្ទេរ​ភាគហ៊ុន​របស់​គាត់​ឱ្យទៅ​កូនស្រី​ក្នុង​ឆ្នាំ ២០០៥ ហើយ​នាង​បាន​ក្លាយជា​ស្ត្រី​មាន​ជាង​គេ​បំផុត​នៅ​អាស៊ី​នៅ​ពីរ​ឆ្នាំ​ក្រោយ​នៅ​អាយុ​ត្រឹមតែ ២៦ ឆ្នាំ​បន្ទាប់ពី​ការបោះ​លក់​សន្លឹក​ហ៊ុន​​ជា​សាធារណៈ​ដំបូង​របស់​ក្រុមហ៊ុន​នៅ​ហុងកុង​បាន​ផ្តល់​អំណោយ​ដល់​នាង​នូវ​ទឹកប្រាក់​ប្រហែល ១៦ ពាន់​លាន​ដុល្លារ​។​

​នៅ​ឆ្នាំ ២០២០ លោកស្រី​មាន​ទ្រព្យសម្បត្តិ​ជាង ២០ ពាន់​លាន​ដុល្លារ ប៉ុន្តែ​លោកស្រី​សឹងតែ​របូត​តំណែង​ជា​ស្ត្រី​មាន​បំផុត​នៅ​អាស៊ី​ទៅ​ហើយ​បន្ទាប់​ពី​ការដួលរលំ​អចលនទ្រព្យ​នៅ​ប្រទេស​ចិន​​បាន​បន្ថយ​ទ្រព្យសម្បត្តិ​របស់​លោកស្រី​ជាង​ពាក់កណ្តាល​។​

​មហាសេដ្ឋី​ផ្នែក​សរសៃ​ហ្វាយ​បឺ​គីមី​លោកស្រី ហ្វាន ហុង​វៃ (Fan Hongwei) បាន​ក្លាយជា​អ្នកមាន​លំដាប់​ទី​ពីរ​នៅ​អាស៊ី តាម​ប្រកៀក​ប្រកិត​បំផុត ជាមួយនឹង​ទ្រព្យសម្បត្តិ ១១,២ ពាន់​លាន​ដុល្លារ​គិត​ត្រឹម​ថ្ងៃ​ព្រហស្បតិ៍​ទី​២៨​កក្កដា​៕

​លោកស្រី យ៉ាង ហ៊ុយ​យ៉ាន​បាន​ក្លាយជា​ស្ត្រី​មាន​ជាង​គេ​បំផុត​នៅ​អាស៊ី​នៅ​អាយុ​ត្រឹមតែ ២៦ ឆ្នាំ