ដោយ​: បូកគោ / កំពត​: អំឡុង​ឆមាស​ទីមួយ​នៃ​ឆ្នាំ​២០២២ វិស័យ​សំណង់​ក្នុង​ខេត្តកំពត​នៅតែមាន​ស្ថានភាព​ល្អប្រសើរ​។ សំណង់​អគារ​ប្រមាណ​ជាង​១៦០​គម្រោង​លើ​ផ្ទៃ​ទំហំ​៥២.៦៥៨​ម៉ែត្រក្រឡា ដែលមាន​តម្លៃ​ទុនវិនិយោគ​ជាង​១៨​លាន​ដុល្លារ​បាន និង​កំពុងដំណើរការ ក្នុងចំណោម​នោះ មាន​លិខិតអនុញ្ញាត​សាងសង់​ជាង​១៤០​គម្រោង និង​គ្មាន​លិខិតអនុញ្ញាត​ជិត​២០​គម្រោង​។

​លោក​ស៊ឹម សុខ​ជា អនុប្រធាន​មន្ទីរ​រៀបចំ​ដែនដី នគរូបនីយកម្ម សំណង់ និង​សូ​រិ​យោ​ដី​ខេត្តកំពត​បាន​ប្រាប់​ឲ្យ​ដឹងថា វិស័យ​សំណង់​ខេត្តកំពត​នៅតែមាន​ស្ថានភាព​ល្អប្រសើរ​។ ជាក់ស្តែង​ក្នុង​ឆមាស​ទីមួយ​នៃ​ឆ្នាំ​២០២២ នៅ​ទូទាំង​ខេត្ត​មាន​សំណង់​អគារ ចំនួន​១៦១​គម្រោង​លើ​ផ្ទៃ​ទំហំ​៥២.៦៥៨​ម៉ែត្រក្រឡា​ក្នុងតម្លៃ​ទុនវិនិយោគ​ប្រមាណ​ជាង​១៨​លាន​ដុល្លារ​។

​លោក​អនុប្រធាន​មន្ទីរ​បាន​បន្តថា​ក្នុងចំណោម​នោះ សំណង់​មាន​លិខិតអនុញ្ញាត​ចំនួន​១៤២​គម្រោង​ដែលមាន​ផ្ទៃ​សរុប​៤៩.៣៩៨​ម៉ែត្រក្រឡា​ក្នុងតម្លៃ​ទុនវិនិយោគ​ជាង​១៧​លាន​ដុល្លារ​។ ក្នុងនោះ​បានចេញ​លិខិតអនុញ្ញាត​ដោយ​រដ្ឋបាលខេត្ត​ចំនួន​១២​គម្រោង និង​ចេញ​ដោយ​រដ្ឋបាល​ក្រុង​ស្រុក​ចំនួន​១៣០​គម្រោង​។ លោក​ស៊ឹម សុខ​ជា​បាន​បញ្ជាក់ថា​ទន្ទឹមនឹងនោះ ក៏​នៅមាន​សំណង់​ចំនួន​១៩​គម្រោង​ស្ថិតក្នុង​ក្រុង​បូកគោ និង​ស្រុក​ឈូក​ស្មើនឹង​៣.២៦០​ម៉ែត្រក្រឡា​គិត​ជា​តម្លៃ​ទុនវិនិយោគ​ជិត​១​លាន​២​សែន​ដុល្លារ​បាន​ដំណើរការ​ដោយ​ពុំមាន​លិខិតអនុញ្ញាត​ផងដែរ​។​

​ក្នុងនាម​មន្ត្រី​ជំនាញ​ទទួលបន្ទុក​ផ្នែក​សំណង់ លោក​អនុប្រធាន​មន្ទីរ​បាន​បញ្ជាក់ថា​តាម​ការសង្កេត​ឃើញជាក់ស្តែង ការយល់ដឹង​របស់​ប្រជាពលរដ្ឋ​នៅមានកម្រិត​ដោយ​សំណង់​ខ្លះ​ក្នុង​បណ្តា​ក្រុង​ស្រុក​សាងសង់​លើស​ចំនួន​ជាន់ លើស​ទំហំ​ដែល​បានចេញ​លិខិតអនុញ្ញាត​។ ការដ្ឋាន​មួយចំនួន​មិនបាន​ធ្វើ​របាំង ឬ​ឧបករណ៍​សុវត្ថិភាព​សម្រាប់​កម្មក​រ និង​ក្រុម​ជាង​ឡើយ​។ ចំណែក​ការដ្ឋាន​សំណង់​មួយចំនួនទៀត​ពុំមាន​ស្ថាបត្យករ ឬ​វិស្វករ​ប្រចាំការ ពោលគឺ​ធ្វើ​តាមតែ​ម្ចាស់​សំណង់​បង្គាប់ និង​គ្មាន​លិខិតអនុញ្ញាត ទោះបី​មន្ត្រី​ជំនាញ​បាន​ចុះ​ផ្សព្វផ្សាយ ពន្យល់​ពី​លក្ខណៈ​បច្ចេកទេស​ជា​ញឹកញយ​ក៏ដោយ​។ ដូច្នេះ លោក​សំណូមពរ​ដល់​អាជ្ញាធរ​មូលដ្ឋាន​ជួយ​ផ្សព្វផ្សាយ​ជូន​ប្រជាពលរដ្ឋ​បាន​យល់ដឹង​អំពី​ច្បាប់​សំណង់ និង​គោរព​តាម​នីតិវិធី​ឲ្យ​បាន​ត្រឹមត្រូវ​៕​