ដោយ: វ៉ៃកូ / ស្វាយរៀងៈ អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ នាព្រឹកថ្ងៃសុក្រ ទី២៩ ខែកក្កដា ឆ្នាំ២០២២នេះ បានអញ្ជើញជាអធិបតីនៅក្នុងពិធីសម្ពោធដាក់ឲ្យប្រើប្រាស់ជាផ្លូវការ នូវអគាររដ្ឋបាល អគារស្នាក់នៅ និងហេដ្ឋារចនាសម្ព័ន្ធនានា នៃសាខាគយនិងរដ្ឋាករខេត្តស្វាយរៀង។
ពិធីនេះក៏មានការអញ្ជើញចូលរួមពីលោកបណ្ឌិត គុណ ញឹម រដ្ឋមន្ត្រីប្រតិភូ អមនាយករដ្ឋមន្ត្រី អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា លោក ម៉ែន វិបុល អភិបាលខេត្តស្វាយរៀង និងលោក លោកស្រីដែលជាប្រតិភូអមដំណើរ ព្រមទាំងមន្ត្រីដែលពាក់ព័ន្ធជាច្រើនរូបទៀតផងដែរ។
នៅក្នុងឱកាសនោះ អគ្គបណ្ឌិតសភាចារ្យ អូនព័ន្ធ មុនីរ័ត្ន បានថ្លែងនូវការកោតសរសើរដល់ រដ្ឋបាលខេត្តស្វាយរៀងដែលមានលោក ម៉ែន វិបុល ជាអភិបាលខេត្ត និងមន្ត្រីរាជការសាខាគយនិងរដ្ឋាករខេត្តស្វាយរៀងទាំងអស់ បានចូលរួមចំណែកក្នុងការប្រមូលពន្ធជូនរដ្ឋ ធ្វើឲ្យកំណើនថវិការចំណូលចូលរដ្ឋ ពីមួយឆ្នាំទៅមួយឆ្នាំ មានការកើនឡើងជាបន្តបន្ទាប់។
អគ្គបណ្ឌិតសភាចារ្យក៏បានជំរុញដល់សាខាគយនិងរដ្ឋាករ ខេត្តស្វាយរៀងក៏ដូចជាមន្ត្រីគយទាំងអស់ ត្រូវខិតខំបំពេញភារកិច្ចតួនាទីរបស់ខ្លួនឱ្យបានល្អ ជាពិសេសត្រូវចូលរួមសហការជាមួយរដ្ឋបាលខេត្តគ្រប់ភាគីដែលពាក់ព័ន្ធទាំងអស់ ដើម្បីជំរុញឲ្យប្រមូលពន្ធជូនរដ្ឋ មានការកើនឡើងដែលធ្វើឲ្យសេដ្ឋកិច្ចជាតិ កើនឡើងពីមួយឆ្នាំទៅមួយឆ្នាំស្របតាមគោលនយោបាយរបស់រាជរដ្ឋាភិបាល ដែលមានសម្តេចតេជោហ៊ុន សែន នាយករដ្ឋមន្ត្រីនៃកម្ពុជា៕
