​ដោយៈ ជា សីហៈ​/​ភ្នំពេញៈ នៅ​ទីស្តីការ​ក្រសួងពាណិជ្ជកម្ម​កាលពី​ថ្ងៃទី ២៨ ខែ កក្កដា ឆ្នាំ ២០២២ មាន​កិច្ចប្រជុំ​ក្រុមការងារ​ដើម្បី​ត្រៀម​រៀបចំ​កិច្ចប្រជុំ​រដ្ឋមន្ត្រី​សេដ្ឋកិច្ច​អាស៊ាន​លើក​ទី​៥៤ និង​កិច្ចប្រជុំ​ពាក់ព័ន្ធ​ក្រោម​អធិបតីភាព លោក ស៊ា​ង ថៃ រដ្ឋលេខាធិការ​ក្រសួងពាណិជ្ជកម្ម និង​ជា​ប្រធាន​អនុគណៈកម្មការ​ក្រុមការងារ​ពី​ធី​ការ ដឹកជញ្ជូន សន្តិសុខ សុខាភិបាល និង​សិល្បៈ ។

​ជា​កិច្ច​ចាប់ផ្តើម លោក​ប្រធាន​អង្គប្រជុំ បាន​លើកឡើងថា ក្រុមការងារ​ចំណុះ​អនុគណៈកម្មការ ពិតជា​ដើរតួរ យ៉ាងសំខាន់​ក្នុង​រៀបចំ​កិច្ចប្រជុំ រដ្ឋមន្ត្រី​សេដ្ឋកិច្ច​អាស៊ាន​លើក​ទី​៥៤ និង​កិច្ចប្រជុំ​ពាក់ព័ន្ធ​នៅ​អំឡុង​ខែកញ្ញា ឆ្នាំ​២០២២ ខាងមុខ​នៅ​ខេត្តសៀមរាប​ឱ្យ​ប្រព្រឹត្ត​ទៅដោយ​រលូន និង​ទទួលបាន ជោគជ័យ ដូចនេះ​ក្រុមការងារ ត្រូវ​បែងចែក​ភារកិច្ច​និង​ពិនិត្យ​តាមដាន វឌ្ឍនភាព​ការងារ របស់​សមាជិក​នីមួយៗ ដើម្បីឱ្យ​ការងារ ដំណើរការ​ទៅមុខ ហើយ​ប្រសិនបើ​មាន​បញ្ហា​ប្រឈម អ្វីមួយ​ត្រូវ​ចូលរួម ដោះស្រាយ​ឱ្យបាន ទាន់ពេលវេលា​។ ឯកឧត្តម​ប្រធាន​អង្គប្រជុំ បាន​បន្ថែមថា ក្រុមការងារ​នីមួយៗ មាន​ភារកិច្ច និង​ការទទួល ខុសត្រូវ​រៀងៗ​ខ្លួន ដូច​មាន​ក្នុង​ប្រកាស​ស្តីពី​ការ បង្កើត​ក្រុមការងារ​ចំណុះ​អនុគណៈកម្មការ ពិធីការ​ដឹកជញ្ជូន សន្តិសុខ សុខាភិបាល រៀបចំ​កន្លែង​ប្រជុំ និង​សិល្បៈ សម្រាប់​កិច្ចប្រជុំ​ថ្នាក់​រដ្ឋមន្ត្រី​សេដ្ឋកិច្ច អាស៊ាន លើក​ទី​៥៤ និង​កិច្ចប្រជុំ​ពាក់ព័ន្ធ​។
​លោក ស្នើឱ្យ​ប្រធាន ក្រុមការងារ​នីមួយៗ ត្រៀម​រៀបចំ​របាយការណ៍ វឌ្ឍនភាព​ការងារ របស់ខ្លួន​ដើម្បី​ចូលរួម កិច្ចប្រជុំ​បន្ត​នៅ​ខែសីហា ឆ្នាំ​២០២២ ទទួលបាន​លទ្ធផល​ល្អ​។​

​ក្នុង​កិច្ចប្រជុំ​នេះដែរ តំណាង​ក្រុមការងារ​ក្រសួងពាណិជ្ជកម្ម ក្រុមការងារ​អន្តរក្រសួង ដែល​បាន​អញ្ជើញ​មកពី ក្រសួងការបរទេស និង​សហប្រតិបត្តិការ​អន្តរជាតិ ក្រុមការងារ​ក្រសួងសុខាភិបាល ក្រុមការងារ​ក្រសួង​វប្បធម៌ និង​វិចិត្រសិល្បៈ និង​រដ្ឋបាល​ខេត្តសៀមរាប បានលើកឡើង​នូវ​មតិយោបល់ កិច្ចការ​ការងារ​បច្ចេក​ទេស និង​សំណូមពរ ជូន​លោក​ប្រធាន​អង្គប្រជុំ​ដើម្បី​ពិនិត្យ​សម្រេច និង​គោរព​ស្នើសុំ​ការអនុញ្ញាត​ពី​លោក រដ្ឋមន្ត្រីក្រសួង​ពាណិជ្ជកម្ម​។

​លោក ប្រធាន​អង្គប្រជុំ បានស្នើ​ក្រុមការងារ​ទាំងអស់​ខិតខំ​ព​ន្លឿ​ន​ការងារ​របស់ ខ្លួន​ដែល​នៅ​សេសសល់ និង​មាន​បញ្ហា​អ្វីមួយ សូម​លើក​ជូន​ប្រធាន​ក្រុមការងារ​ដោះស្រាយ​ឱ្យបាន ទាន់ពេលវេលា​ដើម្បីឱ្យ​កិច្ចប្រជុំ​រដ្ឋមន្ត្រី សេដ្ឋកិច្ច​អាស៊ាន​លើក​ទី​៥៤ និង​កិច្ចប្រជុំ​ពាក់ព័ន្ធ សម្រាប់​ឆ្នាំ​២០២២ ដំណើរការ​ទៅបាន​ដោយ​រលូន និង​ទទួលបាន​ជោគជ័យ​៕​.mara