ដោយៈ ភ្នំ​សន្ទុក / កំពង់ធំៈ នៅ​ថ្ងៃទី​២៩ ខែកក្កដា ឆ្នាំ​២០២២ លោក ងួន រតនៈ អភិបាលខេត្ត​កំពង់ធំ បញ្ជា​ឱ្យ​មន្ត្រីរាជការ​ក្រោម​ឱវាទ​គ្រប់រូប ត្រូវ​ពង្រឹង​របៀបរបប​ការងារ ឱ្យមាន​ផែនការ​ច្បាស់លាស់ និង​ស្តាប់​នូវ​របាយការណ៍​វឌ្ឍនភាព ទាក់ទង​នឹង​ការដោះស្រាយ បញ្ហា​ទំនាស់​ដីធ្លី នៅតាម​បណ្តា​ក្រុង ស្រុក ទាំង ៩ ដែល​បាន​កើតមានឡើង នៅក្នុង​ដែន សមត្ថកិច្ច​របស់ខ្លួន ។​

​បន្ទាប់ពី​បាន​ស្តាប់​របាយការណ៍​វឌ្ឍនភាព របស់​អភិបាលក្រុង​ស្រុក រួចមក លោក ងួន រតនៈ បាន​ជំរុញ​ដល់​លោក​អភិបាលក្រុង ស្រុក​ទាំងអស់ ប្រធាន​គណៈកម្មការ​សុរិយោដី​ក្រុង ស្រុក ត្រូវតែ​បណ្តុះបណ្តាល វគ្គ​ជំនាញ​ដោះស្រាយ​ទំនាស់​ដីធ្លី ក្រៅ​ប្រព័ន្ធតុលាការ បន្ថែមទៀត បន្ត​សហការ​ជាមួយ​យន្តការ​ថ្នាក់​ខេត្ត ខិតខំ​ដោះស្រាយ​បញ្ហា​ទំនាស់​ដីធ្លី ដែល​នៅ​សេសសល់ ជា​បញ្ហា​អាទិភាព ក្នុងចំណោម​បញ្ហា​អាទិភាព ធ្វើ​ការងារ​ជាប្រចាំ ត្រូវមាន​វិធានការ ក្នុងការ​ដោះស្រាយ ឲ្យ​បានច្បាស់លាស់​។​

​លោក​អភិបាល​ខេត្តកំពង់ធំ បាន​បន្តទៀតថាៈ សំណុំរឿង​ខ្លះ រដ្ឋបាលខេត្ត​កំពង់ធំ ទទួលបាន​ពាក្យបណ្តឹង ពី​ប្រជាពលរដ្ឋ សំណុំរឿង​ខ្លះទៀត ទទួលបាន​លិខិត​ពី ក្រសួងមហាផ្ទៃ ដែល​ប្រជាពលរដ្ឋ ផ្ញើ​សារ​ចូលក្នុង​ផេ​ក​សម្ដេច​ក្រឡាហោម ឧបនាយករដ្ឋមន្ត្រី និង​ជា​រដ្ឋមន្ត្រី​ក្រសួងមហាផ្ទៃ ។

​លោក​អភិបាល​ខេត្តកំពង់ធំ បាន​បន្ថែមទៀតថាៈ ករណី​សំណុំរឿង​ទាំងអស់នេះ រដ្ឋបាលខេត្ត​កំពង់ធំ បាន​ចាត់ចែង​បន្ត​បញ្ជូន​ដីកា ទៅតាម​មន្ទីរជំនាញ រដ្ឋបាល​ក្រុង ស្រុក ឲ្យ​ធ្វើការ​ដោះស្រាយ និង​មាន​កំណត់ហេតុ​បំភ្លឺ​ច្បាស់លាស់​។​

​លោក​អភិបាល​ខេត្តកំពង់ធំ បានបញ្ជាក់​ថាៈ ក្នុងករណី​សំណុំ​រឿងក្តី​ណាមួយ មាន​បញ្ហា ប្រឈម សូម​រាយការណ៍​មក​រដ្ឋបាលខេត្ត ដើម្បី​ស្នើសុំ​គោលការណ៍​ណែនាំ​ពី​ថ្នាក់ដឹកនាំ ខេត្ត​បន្តទៀត ទៅតាម​គោលបំណង នៃ​ពាក្យបណ្ដឹង ឬក៏​ប្រភេទ​នៃ​ពាក្យបណ្ដឹង​៕/V​