ដោយៈ ភ្នំដែក/ព្រះវិហារ៖ លោកឧត្តមសេនីយ៍ត្រី កង សៅគុណ មេបញ្ជាការកងរាជអាវុធហត្ថខេត្តព្រះវិហារបានដឹកនាំកិច្ចប្រជុំត្រួតពិនិត្យ ការអនុវត្តតួនាទី ភារកិច្ច និងវឌ្ឍនភាពការងារ កងរាជអាវុធហត្ថសម្រាប់ខែកក្កដា និងលើកទិសដៅការងារសម្រាប់ ខែសីហាឆ្នាំ២០២២ និងការប្រគល់ប័ណ្ណសរសើរ លិខិតសរសើរ របស់ក្រសួងការពារជាតិ ដល់នាយទាហាន និងនាយទាហានរង នៃកងរាជអាវុធហត្ថខេត្ត ចំនួន ១២នាក់ នៅថ្ងៃទី២៩ ខែកក្កដា ឆ្នាំ២០២២ នៅបញ្ជាការដ្ឋានកងរាជអាវុធហត្ថខេត្ត។
លោកឧត្តមសេនីយ៍ត្រី កង សៅគុណ មេអាវុធហត្ថខេត្តព្រះវិហារ បានមានប្រសាសន៍ថា ការផ្តល់ជូនប័ណ្ណសរសើរ និងលិខិតសរសើរ របស់ក្រសួងការពារជាតិ ដល់នាយទាហាន និងនាយទាហានរង នៃកងរាជអាវុធហត្ថខេត្តទាំង ១២នាក់ នៅក្នុងពេលនេះ គឺជាការលើកទឹកចិត្តដល់យោធិន ដែលមានស្នាដៃ និងបានចូលរួមយ៉ាងសកម្មក្នុងយុទ្ធនាការជាតិ ចាក់វ៉ាក់សាំងការពារជំងឺកូវីដ-១៩ ជូនយោធិន អតីតយុទ្ធជន និងគ្រួសារ រួមទាំងប្រជាពលរដ្ឋ ក្នុងពេលដែលកម្ពុជា និងពិភពលោក កំពុងរងនូវការរីករាលដាលជំងឺកូវីដ-១៩ កន្លងទៅ។
លោកឧត្តមសេនីយ៍មេបញ្ជាការ បានថ្លែង កោតសរសើរដល់យោធិន នៃកងរាជអាវុធហត្ថខេត្ត ក្រុង ស្រុកទាំងអស់ ដែលគោរព និងអនុវត្តតាមតួនាទី ភារកិច្ច និងបទបញ្ជាថ្នាក់លើ ក្នុងការចូលរួមក្នុងវិស័យមនុស្សធម៌ សង្គមធម៌ និងការរក្សាសន្តិសុខ សណ្តាប់ធ្នាប់សាធារណៈ ជូនថ្នាក់ដឹកនាំ និងប្រជាពលរដ្ឋនៅក្នុងមូលដ្ឋាន បានយ៉ាងល្អប្រសើរ នាពេកន្លងទៅ និងនៅពេលបច្ចុប្បន្ន៕សរន
