ដោយ​៖​ដេប៉ូ / ភ្នំពេញ​៖ មន្ត្រីជាន់ខ្ពស់ នៃ​ក្រសួងបរិស្ថាន បាន​ថ្លែងថាៈ នាពេល​បច្ចុប្បន្ននេះ ការអភិរក្ស​ធនធាន​ធម្មជាតិ មាន​ភាព​កាន់តែ​ល្អប្រសើរ​ឡើង​។ កម្ពុជា​ទទួលបាន​ជោគជ័យ លក់​ឥណទាន​កាបូន នៅលើ​ទីផ្សារ​ស្ម័គ្រចិត្ត​អន្តរជាតិ ចាប់តាំងពី​ឆ្នាំ ២០១៦ មក ដោយ​ចាប់​ផ្តើមដំបូង នៅ​ដែនជម្រកសត្វព្រៃ​កែវ​សី​ម៉ា ក្នុងភូមិ​សាស្ត្រ​ខេត្តមណ្ឌលគិរី ហើយ​គម្រោង​ឥណទាន​កាបូន នៅ​ដែនជម្រកសត្វព្រៃ​កែវ​សី​ម៉ា​នេះ បាន​ក្លាយជា​គំរូ​មួយ សម្រាប់​ការអនុវត្ត​គម្រោង​ឥណទាន​កាបូន នៅ​តំបន់ការពារធម្មជាតិ​ផ្សេងទៀត នៅ​កម្ពុជា​។​

​ថ្លែង​ក្នុងពេល​ដឹកនាំ​ក្រុម​អ្នកសារព័ត៌មាន ស្វែងយល់​ពី​ការងារ​អភិរក្ស តំបន់ការពារធម្មជាតិ នៅ​ដែនជម្រកសត្វព្រៃ កែវ​សី​ម៉ា ក្នុង​ខេត្តមណ្ឌលគិរី​នា​ថ្ងៃទី ២៨ ខែកក្កដា ឆ្នាំ ២០២២ លោក នេត្រ ភក្ត្រា រដ្ឋលេខាធិការ និង​ជាម​ន្ត្រី​នាំពាក្យ​នៃ ក្រសួងបរិស្ថាន បានឱ្យដឹងថាៈ ក្នុងអំឡុង​ដែនជម្រកសត្វព្រៃ​កែវ​សីមា ស្ថិតក្រោម​ការការពារ និង​អភិរក្ស​របស់ ក្រសួងបរិស្ថាន តាំងពី​ឆ្នាំ ២០១៦ មក ដែនជម្រកសត្វព្រៃ​កែវ​សីមា មិន​ត្រឹមតែ​ជា​ដែន​ជម្រក សត្វព្រៃ ដែលមាន​ព្រៃស្រោង និង​អាច​លក់​ឥណទាន​កាបូន​នោះទេ តែ​ជា​តំបន់​ការពារ​ធម្ម ជាតិ ដែលមាន​សារៈសំខាន់ កម្រិត​អន្តរជាតិ ក្នុងការ​អភិរក្ស​សត្វ​ព្រៃ និង​ជីវៈចម្រុះ ជាច្រើន​ទៀត​។​

​លោក រដ្ឋលេខាធិការ នេត្រ ភក្ត្រា បានបញ្ជាក់​បន្ថែមថាៈ ជាមួយ​ប្រភេទ​សត្វ រុក្ខជាតិ និង​បុ​ច​ផសិត (fungi species) ចំនួន ៩៥៩ ប្រភេទ ដែលជា​របក​គំ​ឃើញ នៃ​ការសិក្សា​ស្រាវជ្រាវ និង​បាន​កត់ត្រា ដោយ​ក្រុម​សិក្សា​ស្រាវជ្រាវ​របស់ អង្គការ​សមាគម អភិរក្ស​សត្វព្រៃ ប្រចាំ​កម្ពុជា (WCS) និង​មន្ត្រី​គ្រប់គ្រង​ដែនជម្រកសត្វព្រៃ កែវ​សីមា នាពេល​ថ្មីៗ​នេះ បានធ្វើឱ្យ​ដែនជម្រកសត្វព្រៃ​កែវ​សីមា ក្លាយជា​តំបន់ការពារធម្មជាតិ​មួយ ដែលមាន​ធនធាន​ជីវៈចម្រុះ សម្បូណ៌​បែប​ជាងគេ ក្នុងចំណោម​តំបន់ការពារធម្មជាតិ ផ្សេងទៀត ក្នុងប្រទេស​កម្ពុជា​។​

​លោក រដ្ឋលេខាធិការ​ក្រសួងបរិស្ថាន​រូបនេះ បាន​មានប្រសាសន៍ថាៈ ដែនជម្រកសត្វព្រៃ​កែវ សីមា មាន​សារៈសំខាន់​កម្រិត​អន្តរជាតិ ក្នុងការ​អភិរក្ស​សត្វ​ដំរី​អាស៊ី សត្វ​ពានរ រួមមាន ទោច​ថ្ពាល់​លឿង ស្វា​កន្ទុយ​ស កង្កែប​ដុះ​ស្នែង​អូររាំង ប្រភេទ​មាំ​សា​សី និង​ប្រភេទ​សត្វ​ស្លាប ជាច្រើន​ប្រភេទ ដែល​ក្នុងនោះ ប្រភេទ​សត្វ និង​រុក្ខជាតិ ៧៥ ប្រភេទ ជា​ប្រភេទ​រង​ការ គំរាមកំហែង ស្ថិតក្នុង​បញ្ជី​ក្រហម របស់​អង្គការ IUCN ។​

​លោក រដ្ឋលេខាធិការ ក្រសួងបរិស្ថាន បានឱ្យដឹងថាៈ កម្ពុជា បច្ចុប្បន្ន មាន​ផ្ទៃដី​អភិរក្ស​ទំហំ ៧,៣ លាន​ហិកតា ឬ​ស្មើ​ប្រមាណ ៤១ ភាគរយ នៃ​ប្រទេស​កម្ពុជា​។ ដោយសារ​កត្តា សុខសន្តិភាព និង​ការការពារ និង​អភិរក្ស មាន​ភាពប្រសើរឡើង ចំពោះ​តំបន់ការពារធម្មជាតិ កម្ពុជា​បាន​លក់​ឥណទាន​កាបូន ទៅ​ក្រុមហ៊ុន​អន្តរជាតិ​ធំៗ ចាប់ពី​ឆ្នាំ​២០១៦ មកដល់​ឆ្នាំ ២០២០ បាន​ទឹកប្រាក់​ចំនួន ១១,៦ លាន​ដុល្លារ​អាម៉េរិក​។ រាជរដ្ឋាភិបាល​កម្ពុជា និង​ដៃគូ បាននិងកំពុង​ស្វះស្វែង​រក​ទីផ្សារ​ថ្មីៗ​បន្ថែមទៀត ដើម្បី​លក់​ឥណទាន​កាបូន ដែល​កម្ពុ​ជាមាន យក​ថវិកា​មក​បង្កើន និង​ពង្រឹង​ការងារ​ការពារ និង​អភិរក្ស​ធនធានធម្មជាតិ ដែលមាន និង​ការចូលរួម​បង្កើត​សេដ្ឋកិច្ច​មូលដ្ឋាន​។​


លោក​បាន​បញ្ជាក់ថាៈ នេះ​គឺជា​មោទកភាព​មួយ សម្រាប់​ព្រះរាជាណាចក្រ​កម្ពុជា ដែល​ជោគជ័យ​ក្នុង​ការលក់​ឥណទាន​កាបូន ក្នុង​ទីផ្សារ​ស្ម័គ្រចិត្ត នៅលើ​ពិភពលោក​។ បើតាម​ការឱ្យ​ដឹង​រប​ស់ រដ្ឋលេខាធិការ​ក្រសួងបរិស្ថាន ក្រៅពី​ដែនជម្រកសត្វព្រៃ​កែវ​សីមា កម្ពុជា​បាន​លក់​ឥណទាន​កាបូន នៅ​គម្រោង​រ៉េដ​បូក ក្រវ៉ា​ញ​ខាងត្បូង (​ឧទ្យាន​ជាតិ ជួរ​ភ្នំក្រវាញ​ខាងត្បូង និង​ដែនជម្រកសត្វព្រៃ​តា​តៃ​) ដែនជម្រកសត្វព្រៃ​ព្រៃ​ឡង់ ភូមិសាស្ត្រ​ខេត្តស្ទឹងត្រែង​។ ជាមួយគ្នានេះ ដែនជម្រកសត្វព្រៃ​មួយចំនួនទៀត ដូចជា​ដែនជម្រកសត្វព្រៃ​ឆែប ដែនជម្រកសត្វព្រៃ​គូលែន​-​ព្រហ្ម​ទេព ដែល​ជម្រក​សត្វព្រៃ ព្រះ​រការ និង​ដែល​ជម្រក​សត្វព្រៃ​ភ្នំ​ពក​ភ្នំ​ត្នោត ដែល​ជម្រក​សត្វ​ព្រៃភ្នំ​សំ​កុស និង​ដែន​ជម្រក សត្វព្រៃ​មួយចំនួនទៀត បាននិងកំពុង​ដាក់លក់ នៅលើ​ទីផ្សារ​ឥណទាន​កាបូន​។

ថវិកា​ដែល​បាន​ពី​ការលក់​ឥណទាន​កាបូន​នេះ ត្រូវបាន​ប្រើប្រាស់​សម្រាប់​ការអភិរក្ស​ធនធានធម្មជាតិ និង​ចូលរួម​អភិវឌ្ឍ​សហគមន៍ នៅ​មូលដ្ឋាន ក្នុងនោះ​រួមមាន សហគមន៍​តំបន់ ការពារ​ធម្មជាតិ ដែល​បាន​ចូលរួម​ក្នុងការ​ការពារ និង​អភិរក្ស​ធនធានធម្មជាតិ ដោយ​ផ្តល់​ជម្រើស​ថ្មី និង​កែប្រែ​ជីវភាព សម្រាប់​ពួកគាត់ បង្កើត​មុខរបរ​ថ្មី បម្រើឱ្យ​វិស័យ អេកូ​ទេសចរណ៍ ព្រមទាំង​ការបណ្តុះបណ្តាល​សហគម​ន៍ ឱ្យ​ចេះ​គ្រប់គ្រង និង​ការ​ចិញ្ចឹមសត្វ ផ្គត់ផ្គង់​ទីផ្សារ ការដាំ​ដំណាំ​រួមផ្សំ​ផ្សេងទៀត មាន​បន្លែបង្ការ សម្រាប់​ប្រើប្រាស់​ប្រចាំថ្ងៃ ខ្លួនឯង​ផង និង​សម្រាប់​បម្រើ​សេវាកម្ម ដល់​ភ្ញៀវទេសចរ ដែល​ទៅ​ទស្សនា​កម្សាន្ត នៅក្នុង​តំបន់​សហគមន៍​របស់​ពលរដ្ឋ​ផងដែរ​៕/V​