​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ប្រធានាធិបតី​អ៊ុយ​ក្រែនលោក វ៉ូ​ឡូ​ឌី​មៀ ហ្សេ​លេន​ស្គី​បាន​ចុះ​ទៅ​កំពង់​ផែ​សមុទ្រ​ខ្មៅ​មួយ​កាលពី​ថ្ងៃ​សុក្រ​ទី​២៩​កក្កដា​ដើម្បី​មើល​ក្រុម​ការងារ​ត្រៀម​នាំចេញ​គ្រាប់​​ធញ្ញជាតិ​ដែល​ជាប់គាំង​ដោយ​សង្គ្រាម​រយៈពេល​ប្រាំ​ខែ​របស់​រុស្ស៊ី​ពោលគឺ​មួយ​សប្តាហ៍​បន្ទាប់ពី​កិច្ចព្រមព្រៀង​មួយ​ត្រូវបាន​ធ្វើឡើង​ដើម្បី​អនុញ្ញាត​ឱ្យ​ការផ្គត់ផ្គង់​ស្បៀង​អាហារ​សំខាន់ៗ​ហូរ​ទៅកាន់​ប្រជា​​ជន​ក្រីក្រ​រាប់​លាន​នាក់​ដែល​កំពុង​ប្រឈម​នឹង​ភាពអត់ឃ្លាន​នៅ​ទូទាំង​ពិភពលោក​។​

​ខណៈ​ឈរ​ក្បែរ​នាវា​ដោត​ទង់ជាតិ​តួ​ក​គី​នៅ​កំពង់ផែ​ឆែរ​ណូម័​រស​ខ៍ (Chernomorsk) ក្នុង​តំបន់​អូ​ដេសា លោក​ហ្សេ​លេន​ស្គី​បាន​ប្រាប់​អ្នកយកព័ត៌មាន​ថា​”​កប៉ាល់​ទីមួយ​កំពុង​ដឹកទំនិញ​ចាប់តាំងពី​​ដើម​សង្គ្រាម​មក​”​។

​លោក​បាន​និយាយថា ការចាកចេញ​របស់​ស្រូវ​សាលី​និង​គ្រាប់​ធញ្ញជាតិ​ផ្សេងទៀត​នឹង​ចាប់ផ្តើម​ជាមួយនឹង​កប៉ាល់​ដែល​បាន​ផ្ទុក​រួចទៅហើយ ប៉ុន្តែ​មិន​អាច​ចាក​ចេញពី​កំពង់ផែ​អ៊ុយ​ក្រែន​បានបន្ទាប់​​ពី​រុស្ស៊ី​បាន​ឈ្លានពាន​នៅ​ចុងខែ​កុម្ភៈ​។​

​អ៊ុយ​ក្រែន​គឺជា​ប្រទេស​នាំចេ​ញស្រូវ​សាលី ស្រូវ​បា​ឡេ ពោត​និង​ប្រេង​ផ្កាឈូករ័ត្ន​ជា​សាកល ហើយ​ការបាត់បង់​ទំនិញ​ទាំងនេះ​ពី​អ៊ុយ​ក្រែន​បានបង្កើន​តម្លៃ​ស្បៀងអាហារ​ពិភពលោក គំរាមកំហែង​អស្ថិរភាព​​នយោបាយ និង​បាន​ជួយ​រុញ​មនុស្ស​កាន់តែ​ច្រើន​ចូលទៅ​ក្នុង​ភាពក្រីក្រ​និង​ភាពអត់ឃ្លាន​នៅក្នុង​ប្រទេស​ដែល​ងាយ​រងគ្រោះ​រួចជាស្រេច​ទៅហើយ​។​

​លោក​ហ្សេ​លេន​ស្គី​បាន​និយាយថា យោធា​អ៊ុយ​ក្រែន​បាន​ប្តេជ្ញា​ចិត្ត​ការពារ​សុវត្ថិភាព​របស់​នាវា​ទាំងឡាយ ដោយ​បន្ថែម​ថា “​វា​មាន​សារៈសំខាន់​សម្រាប់​ពួកយើង​ដែល​អ៊ុយ​ក្រែន​នៅតែ​ជា​អ្នកធានា​សន្តិ​​សុខ​ស្បៀង​ពិភពលោក​”​។​

​ដំណើរ​ទស្សនកិច្ច​ដោយ​មិន​បាន​ប្រកាស​របស់​លោក​ទៅកាន់​កំពង់ផែ​នេះ​គឺជា​ផ្នែក​មួយ​នៃ​ការជំរុញ​របស់​អ៊ុយ​ក្រែន​ដើម្បី​បង្ហាញ​ពិភពលោក​ថា​ខ្លួន​ជិត​រួចរាល់​ហើយ​ក្នុង​ការនាំចេញ​គ្រាប់​ធញ្ញជាតិ​រាប់​​លាន​តោន​ក្រោម​កិច្ច​ព្រមព្រៀង​ជោគជ័យ​កាលពី​សប្តាហ៍​មុន ដែល​ត្រូវបាន​សម្របសម្រួល​ដោយ​តួ​ក​គី​និង​អង្គការ​សហប្រជាជាតិ និង​បាន​ចុះហត្ថលេខា​ដាច់​ដោយឡែក​ដោយ​អ៊ុយ​ក្រែ​ន​និង​រុស្ស៊ី​៕

​លោក​ហ្សេ​លេន​ស្គី​ត្រូវ​បាន​អម​ដោយ​អគ្គរដ្ឋទូត​ជាច្រើនរូប​និង​មន្ត្រី​អ​.​ស​.​ប​អំឡុងពេល​ចុះ​ទៅ​កំពង់​ផែ​ឆឺ​ណូម័​រស៍​កាលពី​ថ្ងៃ​សុក្រ