​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖​ក្រុម​ស្វែងរក​និង​ជួយ​សង្គ្រោះ​កំពុង​ប្រើប្រាស់​ទូក​និង​ឧទ្ធម្ភាគចក្រ​កាលពី​ថ្ងៃ​សុក្រ​ទី​២៩​កក្កដា​ដើម្បី​ស្វែងរក​អ្នក​នៅ​រស់រាន​មានជីវិត​ពី​ទឹកជំនន់​ភ្លាមៗ​ដែល​​បណ្តាលមកពី​ភ្លៀង​ធ្លាក់​ខ្លាំង ដែល​បាន​សម្លាប់​មនុស្ស​យ៉ាងហោចណាស់ ១៦ នាក់​នៅក្នុង​តំបន់​អាប​ផា​ឡា​ឆា (Appalachia) នៅ​រដ្ឋ​ខិន​ថាក់​ឃី (Kentucky) ភាគ​ខាងកើត​សហរដ្ឋ​អាម៉េរិក​។​

​លោក អេន​ឌី បេ​សៀ (Andy Beshear) អភិបាលរដ្ឋ​កេន​ថា​ក់គី បាន​ព្រមាន​ថា ចំនួន​អ្នក​ស្លាប់​ដោយសារ​ទឹកជំនន់​ធ្ងន់ធ្ងរ​នេះ​ទំនងជា “​នឹង​កើនឡើង​ច្រើន​ទៀត​”​។​

​លោកបេ​សៀបា​ននិយាយថា ប្រាំមួយ​នាក់​ក្នុងចំណោម​អ្នក​ស្លាប់​ទាំង ១៦ ដែល​ត្រូវ​បាន​បញ្ជាក់​គឺ​ជា​កុមារ រួម​ទាំង​កុមារ​បួន​នាក់​មកពី​គ្រួសារ​តែ​មួយ​។​លោក​បាន​និយាយថា​មនុស្ស​រាប់រយ​នាក់​ត្រូវបាន​​ជួយសង្គ្រោះ​តាម​ទូក​ចាប់តាំងពី​ទឹកជំនន់​បាន​ចាប់ផ្តើម​កាលពី​ល្ងាច​ថ្ងៃ​ពុធ ហើយ​មាន​ការជួយ​សង្គ្រោះ​ពីលើ​អាកាស​ប្រហែល ៥០ លើក​ដោយ​ប្រើ​ឧទ្ធម្ភាគចក្រ​ឆ្មាំ​ជាតិ​។​

​ឧទ្ធម្ភាគចក្រ​ឆ្មាំ​ជាតិ​រដ្ឋ​ខិន​ថាក់​ឃី ទូក​របស់​មន្ទីរ​នេសាទ​និង​សត្វព្រៃ និង​អ្នកស្ម័គ្រចិត្ត​មួយក្រុម​កំពុង​រុករក​តំបន់​រងគ្រោះ​ដោយ​ទឹកជំនន់​កាលពី​ថ្ងៃ​សុក្រ​សម្រាប់​អ្នកស្រុក​ដែល​ជាប់គាំង​នៅ​លើដំបូល និង​សូម្បី​តោង​លើ​ដើមឈើ​។​

​លោក​អភិបាល​បាន​និយាយថា ដោយសារ​ផ្លូវ​ជាច្រើន​បាន​លិច​អស់ “​យើង​នៅតែ​មិន​អាច​ទៅ​ដល់​មនុស្ស​ជាច្រើន​បាន​នៅឡើយ​។ ចរន្តទឹក​គឺ​ខ្លាំងក្លា​ពេក​ចឹង​វា​មិន​មាន​សុវត្ថិភាព​សម្រាប់​ការជួយ​​សង្គ្រោះ​ដែល​យើង​ត្រូវធ្វើ​នោះទេ​”​។​

​លោកបេ​សៀបាន​កត់សម្គាល់ថា តំបន់​អាប​ផា​ឡា​ឆា​ដ៏​ក្រីក្រ​នៃ​រដ្ឋ​កេន​ថា​ក់គី​ភាគ​ខាងកើត​ធ្លាប់​មាន​ទឹកជំនន់​ភ្លាមៗ​កាលពី​មុន​ដែរ “​ប៉ុន្តែ​យើង​មិនដែល​ឃើញ​អ្វី​ដូចនេះ​ពី​មុន​ទេ​”​។​

​លោក​បាន​បន្តថា “​ក្រុមការងារ ដែល​ដោះស្រាយ​បញ្ហា​នេះ​អស់ ២០ ឆ្នាំ​មកហើយ​នោះ មិនដែល​ឃើញ​ទឹក​ឡើង​ខ្ពស់​បែបនេះ​ទេ​។ ផ្ទះ​ប្រជាពលរដ្ឋ​មួយចំនួន​ត្រូវបាន​ទឹកជំនន់​ទាញ​យក​ទៅ​ទាំង​កណ្តាលយប់ ខណៈ​ពួកគេ​កំពុង​ដេកលក់​”៕

​ផ្ទះ​ប្រជាពលរដ្ឋ​មួយចំនួន​ត្រូវបាន​ទឹកជំនន់​ទាញ​យក​ទៅ​ទាំង​កណ្តាលយប់ ខណៈ​ពួកគេ​កំពុង​ដេកលក់