​ប្រែ​សម្រួល : កញ្ញា​ដា​លី​ស (​ប៊ី​ប៊ីស៊ី​) ៖ នាយករដ្ឋមន្ត្រី​អេ​ស្ប៉ាញ​លោក ប៉េ​ត្រូ សាន់​ឆេស (Pedro Sanchez)​បាន​អំពាវនាវ​ដល់​អ្នក​ធ្វើកា​រ​ក្នុង​វិស័យ​សាធារណៈ​និង​ឯកជន​ទាំងអស់​ឱ្យ​ឈប់​ពាក់​​ក្រវាត់​ក ដើម្បី​ជា​វិធានការ​សន្សំសំចៃ​ថាមពល​ក្នុង​រដូវក្តៅ​។​

​លោក​សាន់​ឆេស​បាន​និយាយថា រដ្ឋាភិបាល​របស់​លោក​នឹង​អនុម័ត​វិធានការ​សន្សំសំចៃ​ថាមពល “​ជាបន្ទាន់​” នៅ​ថ្ងៃ​ចន្ទ​ក្រោយ​នៅពេល​ដែល​បណ្តា​ប្រទេស​នៅ​អឺរ៉ុប​ប្រឹងប្រែង​ដើម្បី​ក្លាយជា​​ប្រទេស​ពឹងផ្អែក​តិចតួច​លើ​ឧស្ម័ន​របស់​រុស្ស៊ី បន្ទាប់​ពី​សង្គ្រាម​នៅ​អ៊ុ​យក្រែន​។​

​កាលពី​ថ្ងៃ​សុក្រ​ទី​២៩​កក្កដា សីតុណ្ហភាព​បាន​ឡើងដល់ ៣៦ អង្សា​សេ​ក្នុង​ទីក្រុង​ម៉ា​ឌ្រី​ដ (Madrid)​និង ៣៩ អង្សា​សេ​ក្នុង​ទីក្រុង​សេ​វី​ល (Seville)​។​

​ក្នុង​រយៈពេល​ប៉ុន្មាន​សប្តាហ៍​កន្លងមកនេះ ទ្វីប​អឺរ៉ុប​បាន​ជួបប្រទះ​នឹង​សីតុណ្ហភាព​ខ្ពស់បំផុត​។​

​នៅក្នុង​សន្និសីទ​សារព័ត៌មាន​នៅ​ទីក្រុង​ម៉ា​ឌ្រី​ដ លោក​សាន់​ឆេស​បានចង្អុលបង្ហាញ​ថា​គាត់​មិន​ពាក់​ក្រវាត់ក​ទេ ហើយ​និយាយ​ថា​គាត់​ចង់ឱ្យ​រដ្ឋមន្ត្រី​របស់​គាត់ មន្ត្រី​សាធារណៈ​និង​អ្នកធ្វើការ​ក្នុង​​វិស័យ​ឯកជន​ធ្វើ​ដូច​គ្នា​។​

​លោក​បាន​បន្ថែមថា “​នេះ​មានន័យថា​យើងទាំងអស់គ្នា​អាច​សន្សំសំចៃ​ថាមពល​បាន​”​។​

​នាយករដ្ឋមន្ត្រី​បាន​និយាយថា វិធានការ​នេះ​នឹង​ធានា​ឱ្យ​មនុស្ស​រក្សា​ភាព​ត្រជាក់​ជាង​មុន ហើយ​ដូច្នេះ​តម្លៃ​ថាមពល​ក៏​ចុះ​ទាប​ដែរ ពីព្រោះ​ម៉ាស៊ីនត្រជាក់​នឹង​ត្រូវ​បាន​ប្រើ​តិច​ជាង​មុន​៕

​នាយករដ្ឋមន្ត្រី​អេ​ស្ប៉ាញ​លោក ប៉េ​ត្រូ សាន់​ឆេស​