​ប្រែ​សម្រួល : កញ្ញា​ដា​លី​ស (​ប៊ី​ប៊ីស៊ី​) ៖ Barcelona បាន​យល់ព្រម​ចុះហត្ថលេខា​ទិញ​ខ្សែការពារ​កណ្តាល​សញ្ជាតិ​បារាំង ចូល ឃុន​ដេ (Jules Kounde) ពី Sevilla ក្នុង​កិច្ចសន្យា​រយៈពេល ៥ ឆ្នាំ ដែល​រួម​មាន​លក្ខខណ្ឌ​ទិញ​ផ្តាច់​តម្លៃ ១ ពាន់​លាន​អឺរ៉ូ​។​

​ឃុន​ដេ ដែល​ជាប់​ជម្រើសជាតិ​បារាំង​ចំនួន ១១ លើក នឹង​ចូលរួម​ជាមួយ​ក្រុម​អ្នក​មាន​បុណ្យ​ក្នុងតម្លៃ​ផ្ទេរ ៥០ លាន​អឺរ៉ូ​។​

​កីឡាក​រវ័យ ២៣ ឆ្នាំ​រូប​នេះ​បាន​បង្ហាញខ្លួន ១៣៣ ប្រកួត​ឱ្យ Sevilla និង​បានឈ្នះ​ពានរង្វាន់ Europa League ក្នុង​រដូវ​កាល​ដំបូង​របស់​ខ្លួន បន្ទាប់​ពី​ផ្ទេរ​ពី Bordeaux ក្នុង​ឆ្នាំ ២០១៩​។​

​ឃុន​ដេ ដែល Chelsea ចង់​បាន​ផង​ដែរ​នោះ គឺជា​កីឡា​ករទី​ប្រាំ​របស់ Barcelona នៅ​រដូវក្តៅ​នេះ​។​

​ការមកដល់​របស់​ខ្សែការពារ​រូបនេះ​នៅ​ទឹកដី Nou Camp កើត​ឡើង​បន្ទាប់ពី​ការចុះហត្ថលេខា​របស់​ក្លិប​កាតា​ឡាន​មួយ​នេះ​លើ​ខ្សែប្រយុទ្ធ​ប៉ូឡូញ រ៉ូបឺត ឡេ​វ៉ាន់ដូ​វស្គី (Robert Lewandowski) ពី Bayern Munich ក្នុងតម្លៃ ៤២,៦ លាន​ផោន និង​ការមកដល់​របស់​ខ្សែបម្រើ​ស្លាបប្រេ​ស៊ីល​រ៉ា​ហ្វី​ញ៉ា (Raphinha) ពី Leeds ក្នុងតម្លៃ​ផ្ទេរ ៥៥ លាន​ផោន​។​

​ខ្សែបម្រើ​សញ្ជាតិ​កូត​ឌី​វ័រ ហ្វ្រែង កេស​ស៊ី (Franck Kessie) និង​ខ្សែការពារ​សញ្ជាតិ​ដា​ណឺ​ម៉ាក អង់​ដ្រេ​ស គ្រី​ស្ទាន​សិន (Andreas Christensen) ក៏បាន​ចូលរួម​ជាមួយ​ក្រុម​របស់​អ្នក​ចាត់ការ​ទូទៅ​សាវី (Xavi) ក្នុង​ការផ្ទេរ​ដោយ​គ្មាន​តម្លៃ​ខ្លួន​ពី AC Milan និង Chelsea រៀងៗ​ខ្លួន​ផង​ដែរ ខណៈ​ខ្សែបម្រើ​ស្លាប​បារាំង អូស្មាន ដេម​បេឡេ (Ousmane Dembele) បាន​ចុះ​កុងត្រា​បន្ត​នៅ​ជាមួយ Barcelona​។​

​ឃុន​ដេ​នឹង​ត្រូវ​បង្ហាញខ្លួន​ជា​ផ្លូវការ​ក្នុងនាម​ជា​កីឡាករ​របស់ Barcelona នៅ​ថ្ងៃ​ចន្ទ​ក្រោយ​៕

ឃុន​ដេ​ផ្ទេរ​មក Barcelona ក្នុងតម្លៃ ៥០ លាន​អឺរ៉ូ