ដោយៈ ទេ​ពក​ង្រី / កំពង់ឆ្នាំងៈ នៅ​ថ្ងៃទី​៣០ កក្កដា ២០២២ រដ្ឋបាលខេត្ត​កំពង់ឆ្នាំង បានចេញ​សេចក្តីប្រកាស​គាំទ្រ​ទាំងស្រុង ចំពោះ​ការធ្វើ​វិសោធនកម្ម​រដ្ឋធម្មនុញ្ញ របស់​ព្រះរាជាណាចក្រ​កម្ពុជា លើក​ទី​១០ ។​

​នៅក្នុង​ញត្តិ​គាំទ្រ​នេះ បានកត់សម្គាល់​ឃើញថា ការធ្វើ​វិ​សោត​ធន​កម្មនេះ គឺ​ដើម្បី​បម្រើ ឧ​ត្ត​ម​ប្រយោជន៍​ជាតិ និង​ធានា​ឲ្យ​ដល់​ស្ថាប័ន​ជាតិ​ទាំងអស់ ជាពិសេស​រាជរដ្ឋាភិបាល មានដំណើរ​ការប្រព្រឹត្ត​ទៅបាន​ដោយ​រលូន មិនមាន​អ្វី​រារាំង និង​មិនមាន​ការជាប់គាំង ដែល​ធានាបាន​នូវ​និរន្តរភាព នៅ​គ្រប់​កាលៈទេសៈ​។​

​នៅក្នុង​ការធ្វើ​វិសោធនកម្ម លើក​ទី​១០ នេះ ក៏​ជាការ​បំពេញ​ភាព​ចន្លោះប្រហោង​នៃ​ច្បាប់ ហើយក៍​ពុំបាន​ធ្វើឱ្យប៉ះពាល់ ដល់​គោលការណ៍​គ្រឹះ នៃ​រដ្ឋធម្មនុញ្ញ ដូចជា​របប​ប្រជាធិបតេយ្យ សេរី​ពហុបក្ស និង​របបរាជានិយម អាស្រ័យ​រដ្ឋធម្មនុញ្ញ ហើយក៏​ពុំបាន​ធ្វើឡើង នៅក្នុង​ប្រទេស ដែល​កំពុងស្ថិត​ក្នុង​ភាព​មាន​អាសន្ន​នោះឡើយ ។​

​នៅក្នុង​សេចក្តីព្រាងច្បាប់​ធម្មនុញ្ញ ស្តីពី​ការស្នើសុំ​ធ្វើ​វិ​សោត​ធន​កម្ម​មាត្រា ១៩ ថ្មី (​មួយ​) មាត្រា ៨៩ មាត្រា​៩៨ ថ្មី​មាត្រា​១០២ និង​មាត្រា​១១៩​ថ្មី (​មួយ​) និង​មាត្រ​១២៥​ថ្មី និង​មាត្រា​៣​ថ្មី និង​មាត្រា​៤​ថ្មី នៃ​ច្បាប់​ធម្មនុញ្ញ នៃ​ព្រះរាជាណាចក្រ​កម្ពុជា ត្រូវបាន​រដ្ឋសភា អនុម័ត​ទាំងស្រុង ក្រោម​សំឡេង ១០៥ លើ ១០៦ ក្នុងសម័យ​ប្រជុំ​ពេញអង្គ​នៃ​រដ្ឋសភា លើក​ទី​៧ នីតិកាល​ទី​៦ កាល​ព្រឹក​ថ្ងៃទី ២៨ កក្កដា ២០២២ ៕/V​