ដោយ​៖ ដេប៉ូ / មណ្ឌលគិរី​៖ គិត​រហូតមក​ដល់ពេលនេះ យ៉ាងហោចណាស់ មាន​ម្ចាស់​ភោជនីយដ្ឋាន ចំនួន ៤២ ទីតាំង ក្នុង​ខេត្ត​ចំនួន ៣ (​ខេត្តមណ្ឌលគិរី ចំនួន ៣២ ខេត្តព្រះវិហារ ចំនួន ៥ និង​ខេត្តក្រចេះ ចំនួន ៥) បានប្រកាស​មិន​លក់​មុខម្ហូប ធ្វើ​ពី​សាច់​សត្វព្រៃ គ្រប់​ប្រភេទ ជូន​ដល់​ភ្ញៀវ​របស់ខ្លួន​ឡើយ​។ នេះ​ជាការ​ថ្លែង​បញ្ជាក់ ពី​សំណាក់​លោក នេត្រ ភក្ត្រា រដ្ឋលេខាធិការ និង​ជាម​ន្ត្រី​នាំពាក្យ​ក្រសួងបរិស្ថាន​។​

​ថ្លែង​ក្នុង​យុទ្ធនាការ​អន្ទាក់​សូន្យ នៅ​ខេត្តមណ្ឌលគិរី កាលពី​ថ្ងៃទី​២៩ ខែកក្កដា ឆ្នាំ​២០២២ លោក នេត្រ ភក្ត្រា បានឱ្យដឹងថាៈ នាពេលនេះ មាន​ម្ចាស់​ភោជនីយដ្ឋាន កាន់តែច្រើន បាន​ស្ម័គ្រចិត្ត​ចូលរួម បញ្ឈប់​ការដាក់​អន្ទាក់ និង​ការ​បរបាញ់ និង​ជួញដូរ​សត្វព្រៃ​ខុសច្បាប់ តាមរយៈ​ការប្រកាស​មិន​លក់​មុខម្ហូប ធ្វើ​ពី​សាច់​សត្វព្រៃ​។​

​លោក​បាន​បញ្ជាក់ថាៈ ”​នេះ​គឺជា​ផ្នែក​មួយ​នៃ​លទ្ធផល ដែល​កើតចេញពី​ការផ្សព្វផ្សាយ​អប់រំ និង​យុទ្ធនាការ​អន្ទាក់​សូន្យ ក្នុង​តំបន់ការពារធម្មជាតិ ដែល​ផ្តួច​ផ្តើមគំនិត និង​ដឹកនាំ​រៀបចំ ដោយ​ក្រសួងបរិស្ថាន និង​មានការ​គាំទ្រ និង​ចូលរួម​យ៉ាងសកម្ម ពី​អង្គការ​អន្តរជាតិ​នានា ដែល​ធ្វើ​កិច្ចការ​អភិរក្ស ធនធានធម្មជាតិ នៅ​កម្ពុជា​”​។​

​លោក នេត្រ ភក្ត្រា ក៏​ជា​ប្រធាន​យុទ្ធនាការ​អន្ទាក់​សូន្យ​ដែរនោះ បាន​សម្តែង​នូវ​មោទកភាព និង​អបអរសាទរ ចំពោះ​ម្ចាស់​ភោជនីយដ្ឋាន​ទាំងអស់ ដែល​បាន​ស្ម័គ្រចិត្ត ប្រកាស​មិន​លក់​មុខម្ហូប ធ្វើ​ពី​សាច់​សត្វព្រៃ ដោយ​លោក​បាន​គូសបញ្ជាក់ថាៈ «​ជាការ​ចូលរួម ប្រកបដោយ​គុណ​តម្លៃ និង​ប្រសិទ្ធភាព​ខ្ពស់បំផុត ព្រោះ​ភោជនីយដ្ឋាន ជា​កន្លែង​ចែកចាយ និង​បង្កើត​ការជួញដូរ​សត្វព្រៃ យ៉ាងសំខាន់ ហើយ​បើ​មានការ​លក់ដូរ មុខម្ហូប​ធ្វើ​ពី​សាច់​សត្វព្រៃ វា​ជា​ផ្នែក​នៃ​ការលើកទឹកចិត្ត ឱ្យមាន​ការដាក់​អន្ទាក់ និង​បរបាញ់​សត្វព្រៃ​»​។​

​លោក​បានបញ្ជាក់​បន្ថែម​ថាៈ ម្ចាស់​ភោជនីយដ្ឋាន ចំនួន ៣២ នៅក្នុង​ខេត្តមណ្ឌលគិរី បានប្រកាស​ជា​ភោជនីយដ្ឋាន គ្មាន​ការលក់​មុខម្ហូប ពី​សាច់​សត្វព្រៃ គ្រប់​ប្រភេទ ហើយ​ភោជនីយដ្ឋាន​ទាំងនោះ បានទទួល​បណ្ណ​សរសើ​រ និង​ទទួលស្គាល់​ពី​ក្រសួងបរិស្ថាន​។​

​លោក​រដ្ឋលេខាធិការ បាន​ថ្លែងថាៈ «​នេះ​ជា​ភាពជោគជ័យ​មួយ នៃ​យុទ្ធនាការ​អន្ទាក់​សូន្យ ដែល​បានធ្វើឱ្យ ម្ចាស់​ភោជនីយដ្ឋាន តាំងចិត្ត និង​ចូលរួម​ជាមួយ​ក្រសួង ស្ថាប័ន​មាន​សមត្ថកិច្ច ទប់ស្កាត់​ការ​បរបាញ់ និង​ជួញដូរ​សត្វព្រៃ ខុសច្បាប់​»​។​

​លោក​បានបញ្ជាក់​បន្ថែម​ថាៈ នេះ​គឺជា​មោទកភាព នៃ​ក្រុមការងារ​យុទ្ធនាការ​អន្ទាក់​សូន្យ ដែលមាន​ក្រសួងបរិស្ថាន ជា​អ្នកដឹកនាំ មានការ​ចូលរួម​ពី​រដ្ឋបាលខេត្ត ក្នុង​ក្របខណ្ឌ​នៃ យុទ្ធនាការ​អន្ទាក់ នៅ​តំបន់​ទេសភាព​ខ្ពង់រាប​ខាងកើត រួមមាន ខេត្តស្ទឹងត្រែង ក្រចេះ ព្រះវិហារ កំពង់ធំ រតនគិរី និង​មណ្ឌលគិរី និង​អង្គការ​អន្តរជាតិ​ដៃគូ ទីភ្នាក់ងារ​សហរដ្ឋអាមេរិក សម្រាប់​អភិវឌ្ឍន៍​អន្តរជាតិ (USAID) អង្គការ​មូលនិធិ​សកល សម្រាប់​អភិរក្ស​ធម្មជាតិ (WWF) អង្គការ​សមាគម​អភិរក្ស​សត្វព្រៃ (WCS) អង្គការ​ជីវិត​សត្វ​ស្លាប​កម្ពុជា (BirdLife) មជ្ឈមណ្ឌល​សម្រាប់​មនុ​ស្ស និង​ព្រៃឈើ (RECOFTC) និង​អង្គការ​សម្ព័ន្ធ​សត្វព្រៃ និង​ធម្មជាតិ (Wild Earth Allies) និង​អង្គការ​អភិរក្ស​អន្តរជាតិ CI ។​

​គួរ​បញ្ជាក់ថា ម្ចាស់​ភោជនីយដ្ឋាន និង​អាហារ​ដ្ឋា​ន ក្នុង​ខេត្តមណ្ឌលគិរី ដែល​កំពុង​ទទួល រៀបចំ​ចម្អិន​ម្ហូបអាហារ សម្រាប់​ភ្ញៀវទេសចរ ចូលមក​កម្សាន្ត និង​ការ​ស្នាក់នៅ ក្នុងភូមិ​សាស្ត្រ ខេត្តមណ្ឌលគិរី បាន​ប្តេជ្ញាចិត្ត អំពី​សកម្មភាព​ជួញដូរ​សត្វព្រៃ និង​ការបរិភោគ​សាច់​ព្រៃ គ្រប់​ប្រភេទ ដូចតទៅៈ​

១.​ហាង ឬ​ភោជនីយដ្ឋាន របស់​យើងខ្ញុំ គឺ​ពុំមាន​ការទទួល​រៀបចំ​ចម្អិន ឬ​លក់ ឬ​ស្តុក​សាច់​សត្វព្រៃ សម្រាប់អ្នកទេសចរ ឬ​បុគ្គល​ណា​ម្នាក់​ឡើយ​។​

២.​ក្នុងនាម​ខ្លួន​ខ្ញុំ​ផ្ទាល់ និង​អាហារ​ដ្ឋា​ន​របស់​យើងខ្ញុំ គឺ​នឹងធ្វើ​ការរាយការណ៍ ជូន​សមត្ថកិច្ច ប្រសិនបើ​បានដឹង ឬ​បានឃើញ អំពី​សកម្មភាព​ជួញដូរ​សត្វព្រៃ ពីព្រោះ​នេះ​ជា​សកម្មភាព ល្មើសច្បាប់​។​

៣.​ភោជនីយដ្ឋាន​របស់​យើងខ្ញុំ ទទួល​រៀបចំ​ជូន​ភ្ញៀវទេសចរ តែ​មុខម្ហូប​ដែល​ចម្អិន​ពី សាច់មាន់ សាច់គោ សាច់ ជ្រូក ស៊ុត និង​ប្រភព​សាច់​ស្រុក ដែល​រួមបញ្ចូល​នូវ​បន្លែស្រស់ គ្មាន​ជាតិគីមី និង​មាន​អនាម័យ សម្រាប់​ភ្ញៀវ​បរិភោគ​ប៉ុណ្ណោះ​។​

៤.​យើងខ្ញុំ​ក៏​សូម​ថ្លែងអំណរគុណ​ផងដែរ ដល់​ក្រសួងបរិស្ថាន រដ្ឋបាលខេត្ត អាជ្ញាធរ​មូលដ្ឋាន អង្គការ​អភិរក្ស និង​ប្រជាពលរដ្ឋ​ទាំងអស់ ដែល​បាន​ចូលរួម​ជួយ​គិតគូរ ដល់​ប្រភព​សត្វព្រៃ និង​ធនធានធម្មជាតិ ជាពិសេស ក៏​សូម​ដាស់តឿន​ដល់​បណ្តា​ភោជនីយដ្ឋាន និង​រមណីយដ្ឋាន ព្រមទាំង​ភ្ញៀវទេសចរ​ទាំងអស់ សូម​បញ្ឈប់ និង​កុំ​ទទួលទាន​សាច់សត្វ​ព្រៃ ហើយ​ងាក​មក​ទទួលទាន តែ​ប្រភព​សាច់​ក្នុងស្រុក ដើម្បី​ជួយ​លើកកម្ពស់​ជីវភាព​រស់​នៅ របស់​ប្រជាពលរដ្ឋ​ខ្មែរ​យើង និង​រួមចំណែក​ការពារ និង​អភិរក្ស​ពូជ​សត្វព្រៃ សំខាន់ៗ ដែលមាន​នៅសល់ បច្ចុប្បន្ន​៕/V