​ប្រែ​សម្រួលៈ​បំណង​(​ស្ត្រេត​ថែមស៍​)៖ ក្រុមហ៊ុន​ថាមពល​ខ្នាត​យក្ស​របស់​រុស្ស៊ី​កាលពី​ថ្ងៃ​សៅរ៍​ទី​៣០​កក្កដា បាន​ផ្អាក​ការផ្គត់ផ្គង់​ហ្គាស​ទៅកាន់​ប្រទេស​ឡា​ត​វី ក្រោយ​មាន​ភាព​តានតឹង​រវាង​លោកខាងលិច​​និង​រដ្ឋាភិបាល​ទីក្រុង​មូ​ស្គូអំពី​ជម្លោះ​នៅ​អ៊ុ​យក្រែ​ន​និង​ការដាក់ទណ្ឌកម្ម​ទូទៅ​របស់​សហភាព​អឺរ៉ុប​និង​អាម៉េរិក​ប្រឆាំង​រុស្ស៊ី​។​

​ក្រុមហ៊ុន​បាន​និយាយ​តាមតេ​ឡេ​ក្រាម​ថា « ថ្ងៃនេះ ក្រុមហ៊ុន​Gazprom ផ្អាក​ការផ្គត់ផ្គង់​ហ្គាស​ទៅកាន់​ឡា​ត​វី​…​ដោយសារ​ប្រទេស​នេះ​រំលោភ​លក្ខខណ្ឌ​នៃ​ការទិញ​លក់​»​។​

​បើ​តាម​សារព័ត៌មាន​ស្ពុ​ត​និច ក្រុមហ៊ុន​រុស្ស៊ី​បាន​ផ្តាច់ការ​ផ្គត់ផ្គង់​ហ្គាស​ទៅ​ឡា​ត​វី ដោយសារតែ​ប្រទេស​អឺរ៉ុប​នេះ​មិន​ព្រម​បង់ថ្លៃ​ទិញ​ថាមពល​ជា​ប្រាក់​រូបល៍​។​

​សូមបញ្ជាក់​ថា​ក្រុមហ៊ុន​Gazprom​បាន​កាត់បន្ថយ​ការផ្តល់​ហ្គាស​ទៅកាន់​អឺរ៉ុប​យ៉ាងច្រើន​តាម​បំពង់​បង្ហូរ Nord Stream កាលពី​ថ្ងៃ​ពុធ មក​នៅត្រឹមតែ​២០​ភាគរយ​នៃ​សមត្ថភាព​របស់​វា​។​ក្រុមហ៊ុន​​រដ្ឋ​រុស្ស៊ី​នេះ​កាលពីមុន​បាន​ប្រកាសថា​ខ្លួន​នឹង​បន្ថយ​ការផ្គត់ផ្គង់​ហ្គាស​៣៣​លាន​ម៉ែត្រ​គីប​ក្នុង​មួយថ្ងៃ ស្មើ​នឹង​ពាក់កណ្តាល​នៃ​បរិមាណ​ដែល​ខ្លួន​បាន​ផ្តល់​ចាប់តាំងពី​ការបន្ត​សេវា​ផ្គត់ផ្គង់​ហ្គាស​ឡើងវិញ​កាល​​ពី​សប្តាហ៍​មុន ក្រោយ​ការផ្អាក​បង្ហូរ​ហ្គាស​ដើម្បី​ជួសជុល​ថែទាំ​បំពង់​បង្ហូរ​នេះ​អស់​ដប់​ថ្ងៃ​។​

​បណ្តា​រដ្ឋ​អឺរ៉ុប ចោទប្រកាន់​រុស្ស៊ី​ថា​ខ្ទប់​ការផ្គត់ផ្គង់​ដើម្បី​សងសឹក​ទណ្ឌកម្ម​របស់​លោកខាងលិច​លើ​ខ្លួន តែ​ក្រុមហ៊ុន​បាន​និយាយថា​ការបញ្ឈប់​ប្រត្តិ​ការបញ្ជូនហ្គាស​តាមបំព​ង់​បង្ហូ​រមួយ​ក្នុងចំណោម​បំពង់​ពីរ ​គឺ​មកពី​បញ្ហា​បច្ចេកទេស​នៅ​ម៉ាស៊ីន​មួយ​។​

​អ្នកនាំពាក្យ​វិមាន​ក្រឹម​ឡាំង លោក​ឌី​មី​ទ្រី ប៉េ​ស្កូវ បាន​បន្ទោស​ទណ្ឌកម្មរ​បស់​សហភាព​អឺរ៉ុប​លើ​រុស្ស៊ី​ចំពោះ​ការផ្គត់ផ្គង់​មាន​កំណត់​នេះ​។​

​សូមបញ្ជាក់​ថា សហភាព​អឺរ៉ុប​នៅ​សប្តាហ៍​នេះ​បាន​យល់ព្រម​លើ​ផែនការ​កាត់បន្ថយ​ការប្រើប្រាស់​ហ្គាស ដើម្បី​បង្ហាញ​សាមគ្គីភាព​ជាមួយ​អាល្លឺម៉ង់ ដែល​កំពុង​រង​ការកាត់បន្ថយ​ការផ្គត់ផ្គង់​ហ្គាស​ទៅ​ពី​រុស្ស៊ី​​ហើយ​ងាក​ទៅប្រើ​ថាមពល​ផ្សេង​ជំនួស​៕