​ប្រែ​សម្រួលៈ​បំណង​(​ដេល្លី​ម៉េល​)៖ ប្រធានសភា​អាម៉េរិក​លោកស្រី ណាន់​ស៊ី ផេ​ឡូ​ស៊ី កាលពី​ថ្ងៃអាទិត្យ​ទី​៣១​កក្កដា​បាន​បញ្ជាក់​អះអាងថា លោកស្រី​នឹងធ្វើ​ទស្សនកិច្ច​ប្រទេស​បួន​នៅ​អាស៊ី​នៅ​សប្តាហ៍​នេះ តែ​​មិន​បាន​និយាយ​ឈ្មោះ​កោះ​តៃវ៉ាន់​សំរាប់​ការឈប់​សំចត​ដែល​អាច​កើតឡើង​ណាមួយ​នោះ​ទេ​បន្ទាប់​ពី​រដ្ឋាភិបាល​ទីក្រុង​ប៉េកាំង​ព្រមាន​ចាត់វិធានការ​បើសិនជា​លោកស្រី​នៅតែ​ចចេស​ទៅធ្វើ​ទស្សនកិច្ច​លើក​​ទឹកចិត្ត​ពួក​ផ្តាច់ខ្លួន​និយម​នៅលើ​កោះ​ដែល​ជា​ទឹកដី​របស់​ចិន​នេះ​។​

​ផេ​ឡូ​ស៊ី បាន​និយាយ​នៅក្នុង​សេចក្តីថ្លែងការណ៍​មួយ​ថា លោក​ស្រី​នឹង​ដឹកនាំ​គណៈប្រតិភូ​សភា​មួយ​ទៅ​កាន់​សិង្ហ​បុរី ម៉ាឡេស៊ី កូរ៉េ​ខាងត្បូង​និង​ជប៉ុន​ដើម្បី​ពិភាក្សា​ពាណិជ្ជកម្ម ជំងឺ​ឆ្លងកូវី​ដ​១៩ ការប្រែប្រួល​​អាកាសធាតុ សន្តិសុខ​និង​អភិបាលកិច្ច​ប្រជាធិបតេយ្យ​។​

​ទោះជា​យ៉ាងណា លោកស្រី​មិន​បាន​បញ្ជាក់​អះអាង​ចំពោះ​របាយការណ៍​ព័ត៌មាន​ដែល​ថា​លោកស្រី​អាច​នឹង​ទៅ​កាន់​តៃវ៉ាន់​ថែមទៀត​នោះទេ​។​

​ប្រធានាធិបតី​ចិន​លោក​ស៊ី ជីន​ភីង ក្នុង​ការសន្ទនា​តាម​ទូរស័ព្ទ​ជាមួយ​សម​ភាគី​អាម៉េរិក​ចូ បៃ​ដិន កាលពី​ថ្ងៃ​ព្រហស្បតិ៍ បាន​ព្រមាន​កុំអោយ​អាម៉េរិក​ជ្រៀតជ្រែក​កិច្ចការ​របស់​រដ្ឋាភិបាល​ទីក្រុង​ប៉េកាំង​​ជាមួយ​នឹង​កោះ​ផ្តាច់ខ្លួន​និយម​នេះ​។​

​ចិន​ប៉េកាំង​មើលឃើញ​ការទាក់ទង​ផ្លូវការ​របស់​អាម៉េរិក​ជាមួយ​តៃវ៉ាន់​ថា​ជា​ការលើកទឹកចិត្ត​សំរាប់​ឯករាជ្យភាព​អចិន្ត្រៃយ៍​របស់​កោះ​ដែល​គ្រប់គ្រង​ដោយ​ខ្លួនឯង​នេះ​ខណៈ​ខ្លួន​ចង់​បង្រួបបង្រួម​តៃវ៉ាន់​ជា​​មួយ​មហា​ចិនដីគោក​ឡើងវិញ​។​

​សេចក្តីថ្លែងការណ៍​របស់ផេ​ឡូ​ស៊ីបា​ននិយាយថា «​ក្រោម​ការដឹកនាំ​ដ៏​រឹងមាំ​របស់​ប្រធានាធិបតីបៃដិ​ន អាម៉េរិក​ប្តេជ្ញាចិត្ត​យ៉ាង​មុតមាំ​ចំពោះ​ការចូលរួម​ពាក់ព័ន្ធ​ដោយ​វៃឆ្លាត​និង​យុទ្ធសាស្ត្រ​នៅក្នុង​តំបន់​ ដោយសារ​យល់ឃើញថា តំបន់​ឥណ្ឌូ​ប៉ាស៊ីហ្វិក​សេរី​និង​រីកចំរើន​មួយ​មាន​សារសំខាន់​ចំពោះ​វិបុលភាព​នៅក្នុង​ប្រជាជាតិ​របស់​យើង​និង​ជុំវិញ​ពិភពលោក​»​។​

​សូម​រំលឹក​ថា តៃវ៉ាន់​និង​ចិន​ប៉េកាំង​បាន​បែងចែក​គ្នា​កាន់កាប់​នៅ​ឆ្នាំ​១៩៤៩​ក្រោយ​ពី​ពួក​កុំម្មុយនីស្ត​ឈ្នះ​សង្គ្រាម​ស៊ីវិល​មួយ​នៅ​ចិនដីគោក​ហើយ​ពួក​ជាតិនិយម​ជៀង កៃ​ជៀកបាន​រត់​ភៀសខ្លួន​ទៅ​នៅ​លើ​​កោះ​នេះ​។​។​ភាគី​ទាំងពីរ​និយាយថា ពួកគេ​ជា​ប្រទេស​មួយ​តែ​ខ្វែងគំនិត​គ្នា​អំពី​ថា​តើ​រដ្ឋាភិបាល​ណា​មួយ​មាន​សិទ្ធិ​កាន់កាប់​ការដឹកនាំ​ជាតិ​ទោះជា​យ៉ាងណា​ចិន​មាន​ការទទួលស្គាល់​ពី​អង្គការសហប្រជាជាតិ​​និង​ប្រទេស​ស្ទើរ​ទាំងអស់​លើ​ពិភពលោក​។​ពួកគេ​ក៏​មិន​មាន​ទំនាក់ទំនង​ផ្លូវការ​តែ​ធ្វើ​ពាណិជ្ជកម្ម​និង​ការវិនិយោគ​តំលៃ​រាប់​ពាន់​លាន​ដុល្លារ​ជាមួយគ្នា​។​

​អាម៉េរិក​បាន​ដូរ​ការទទួលស្គាល់​ពី​តៃវ៉ាន់​មក​ចិន​ប៉េកាំង​វិញ​នៅ​ឆ្នាំ​១៩៧៩ តែ​នៅ​រក្សា​ទំនាក់ទំនង​មិន​ផ្លូវការ​ជាមួយ​កោះ​នេះ​។​តាម​ច្បាប់​អាម៉េរិក រដ្ឋាភិបាល​ទីក្រុង​វ៉ាស៊ីនតោន​មាន​កាតព្វកិច្ច​មើលថែ​​ថា រដ្ឋាភិបាល​តៃវ៉ាន់​មាន​មធ្យោ​យោបា​យ​គ្រប់គ្រាន់​ដើម្បី​ការពារ​ខ្លួន​។​

​រដ្ឋាភិបាល​ទីក្រុង​ប៉េកាំង​មិន​បាន​បញ្ជាក់​លម្អិត​ទេ​ថា​ខ្លួន​នឹង​ប្រតិកម្ម​បែបណា បើសិនជា​លោក​ស្រី​ផេ​ឡូ​ស៊ី​ធ្វើ​ទស្សនកិច្ច​តៃវ៉ាន់ តែ​កាលពី​សប្តាហ៍​មុន​ក្រសួង​ការពារ​ជាតិចិន​បាន​ព្រមាន​ថា យោធា​ចិន​​នឹង​ចាត់វិធានការ​ខ្លាំងក្លា ដើម្បី​រារាំង​ការជ្រៀតជ្រែក​មក​ពី​ខាងក្រៅ ៕

​ផេ​ឡូ​ស៊ី បាន​និយាយថា គណៈប្រតិភូ​របស់​លោក​ស្រី​រួមមាន​ប្រធាន​គណៈកម្មាធិការ​សភា​ទ​ទួល​បន្ទុក​កិច្ចការបរទេស ប្រធាន​គណៈកម្មាធិការ​ខាង​កិច្ចការ​ទាហាន​ជើងចាស់ អនុប្រធាន​គណៈកម្មាធិកា​រ​​សភា​ទទួលបន្ទុក​វិធី​និង​មធ្យោបាយ និង​សមាជិក​សភា​ជាច្រើនរូប​ទៀត​