​ប្រែ​សម្រួលៈ​បំណង​(​ដេល្លី​ម៉េល​)៖ រដ្ឋាភិបាល​ចិន​បានប្រកាសថា​បំណែក​កំទេចកំទី​មកពី​រ៉ុក្កែត​ចិន​ធំ​មួយ​ដែល​បាន​នាំ​ផ្នែក​បង្គំ​នៃ​ស្ថានីយ​អវកាស​ថ្មី​របស់​ចិន​ចូលក្នុង​តារាវិថី​បាន​ធ្លាក់​ចូល​ក្នុង​សមុទ្រ​​ហ្វីលីពីន​កាលពី​ថ្ងៃអាទិត្យ​ទី​៣១​កក្កដា ដោយ​ភាគច្រើន​នៃ​កំណាត់​ចុងក្រោយ​របស់​រ៉ុក្កែក​Long March-5B​នេះ​បាន​ឆេះ​អស់​ពេល​ពួកវាចូល​ក្នុង​បរិយាកាស​ផែនដី​។​

​ទីភ្នាក់ងារ​អវកាស​ចិន​បាន​រាយការណ៍​ថា ភាគច្រើន​បំផុត​នៃ​កំណាត់​ចុងក្រោយ​(​ផ្នែក​ឥន្ធនៈ​ជំរុញ​)​នៃ​រ៉ុក្កែត​Long March-5B​បាន​ឆេះ​អស់​ពេល​វា​ធ្លាក់​ចូល​ក្នុង​បរិយាកាស​ផែនដី​នៅ​ម៉ោង​១២​និង​៥៥​នាទី​រំលង​អធ្រាត ចូល​ថ្ងៃអាទិត្យ​ទី​៣១​កក្កដា ។​

​សេចក្តីប្រកាស​បាន​និយាយថា បំណែក​រ៉ុក្កែត​នេះ​ធ្លាក់​ក្នុង​តំបន់​ដែនទឹក​នៅភាគ​អាគ្នេយ៍​នៃ​ទីក្រុង​ព័រ​តូ ព្រីន​សេសា​នៅលើ​កោះ ប៉ា​ឡា​វ៉ាន​។​ក្នុងពេល​ជាមួយគ្នា​មិន​មាន​សេចក្តីរាយការណ៍​ពី​អាជ្ញាធរ​ហ្វីលីពីន​​ថា​តើ​មាន​នរណា​ម្នាក់​រងរបួស​ដោយ​ការធ្លាក់​កំទេច​រ៉ុក្កែត​នេះ​ទេ​។​

​សូមបញ្ជាក់​ថា ចិន​រង​ការរិះគន់​ចំពោះ​អនុញ្ញាតអោយ​កំណាត់​រ៉ុក្កែត​ធ្លាក់​មក​ផែនដី​ដោយ​សេរី​ចំនួន​ពីរលើក​កាលពីមុន​។​កាលពី​ឆ្នាំមុន អង្គការ​ណា​សា​របស់​អាម៉េរិក​បាន​ចោទប្រកាន់​រដ្ឋាភិបាល​ទីក្រុង​​ប៉េកាំងថា​«​មិន​បាន​បំពេញ​តាម​ស្តង់ដា​ទទួលខុសត្រូវ​ពាក់ព័ន្ធ​នឹង​កំទេច​អវកាស​របស់ខ្លួន​»​បន្ទាប់​ពី​ផ្នែក​នៃ​រ៉ុក្កែត​ចិន​មួយ​បាន​ធ្លាក់​នៅក្នុង​មហាសមុទ្រ​ឥណ្ឌា​។​

​ស្ថានីយ​អវកាស​ដំបូង​របស់​ចិន Tiangong-1​បាន​ធ្លាក់​ចូល​មហាសមុទ្រ​ប៉ាស៊ីហ្វិក​ក្នុង​ឆ្នាំ​២០១៦​ក្រោយ​ពី​រដ្ឋាភិបាល​ទីក្រុង​ប៉េកាំង​អះអាងថា​ខ្លួន​បាត់បង់​ការគ្រប់គ្រង​វា​។ រ៉ុក្កែត​ចិនទម្ងន់​១៨​តោន​មួយ​បាន​​ធ្លាក់​ដោយ​គ្មាន​ការគ្រប់គ្រង​នៅ​ឆ្នាំ​២០២០៕

​រូប​បញ្ចេញ​ដោយ​ទីភ្នាក់ងារ​សារព័ត៌មាន​ស៊ីន​ហួរ បង្ហាញ​រ៉ុក្កែត Long March 5B Y3 ផ្ទុក​បន្ទប់​ស្ថានីយ​អវកាស​Wentian​បាញ់​ផ្សែង​ចេញពី​កន្លែង​បាញ់​បង្ហោះ​យានអវកាស​នៅក្នុង​ខេត្ត​ហៃ​ណាន់​​កាលពី​ថ្ងៃ​២៤​កក្កដា