​ប្រែ​សម្រួលៈ​បំណង (BLOOMBERG)៖ រដ្ឋាភិបាលយោធា​មី​យ៉ាន់​ម៉ា​កាលពី​ថ្ងៃអាទិត្យ​ទី​៣១​កក្កដា បានប្រកាស​បន្ត​អនុវត្ត​ច្បាប់​ប្រទេស​ក្នុងស្ថានភាព​គ្រាអាសន្ន​ចំនួន​ប្រាំ​មួយខែ​ទៀត រហូត​ដល់​ថ្ងៃ​០១​កុម្ភៈ ឆ្នាំ​២០២៣ ដោយ​សំអាង​ថា​ប្រទេស​ត្រូវការ​ពេលវេលា​បន្ថែម​ដើម្បី​វិល​ទៅ​កាន់​ស្ថិរភាព​និង​ការត្រៀម​រៀបចំ​ការបោះឆ្នោត​។​

​ប្រធានាធិបតី​ស្តីទី​លោក ម្យី​ន ស្វេ​(Myint Swe) បានអនុម័ត​សំណើ​របស់​ប្រមុខ​យោធា មីន អ៊ុង ហ្លាំង​(Min Aung Hlaing)​សំរាប់​ការបន្ត​ស្ថានភាព​គ្រាអាសន្ន​នៅក្នុង​កិច្ចប្រជុំ​របស់​ក្រុមប្រឹក្សា​​សន្តិសុខ​និង​ការពារជាតិ​ក្នុង​រដ្ឋធានី​ណៃ​ពីដោរ​។​

​ទូរទស្សន៍​រដ្ឋ​MRTV​បាន​ស្រង់​សម្តី​លោក​មីន អ៊ុង ហ្លាំង ដែល​បាន​និយាយថា «​ចាំបាច់​ត្រូវមាន​ការរៀបចំ​ចាត់ចែង​សំរាប់​អង្គការ​ពាក់ព័ន្ធ រួម​មាន​គណៈកម្មាធិកា​រ​បោះឆ្នោត​សហភាព ។​បណ្តា​គណបក្ស​​នយោបាយ​ក៏​គួរ​ធ្វើ​ការផ្លាស់ប្តូរ​អោយ​សមស្រប​នឹង​ប្រព័ន្ធ​បោះឆ្នោត​ថ្មី ហើយ​សាធារណជន​ក៏​ត្រូវ​អប់រំ​អោយ​យល់ដឹង​អំពី​វា ដូច្នេះ​យើង​ត្រូវការ​ពេល​សំរាប់​ការត្រៀមខ្លួន​នេះ​»​។​

​ស្ថានភាព​ប្រទេស​ក្នុង​គ្រាអាសន្ន​ត្រូវបាន​ប្រកាស​ដំបូង​នៅ​ខែ​កុម្ភៈ ឆ្នាំ​២០២១ ក្រោយ​ក្រុម​យោធា​មី​យ៉ាន់​ម៉ា​ទម្លាក់​រដ្ឋាភិបាល​ស៊ីវិល​ដឹកនាំ​ដោយ​លោកស្រី អ៊ុង សាន ស៊ូ​ជី ។​នៅ​ខែ​មករា ឆ្នាំនេះ លោក​មីន​ អ៊ុង​ហ្លាំង បានប្រកាស​បន្ត​អនុវត្ត​វា​ប្រាំ​មួយខែ និង​បាន​ប្រកាស​ខ្លួនឯង​ជា​នាយករដ្ឋមន្ត្រី​។​

​កាលពី​សប្តាហ៍​មុន របប​យោធា​នេះ​បាន​អនុវត្ត​ទោស​ប្រហារជីវិត​លើ​សកម្មជន​បួន​នាក់​ជា​លើកដំបូង​ក្នុង​រយៈពេល​ប៉ុន្មាន​ទសវត្សរ៍​មក​នេះ​បន្ទាប់​ពី​កងកម្លាំង​សន្តិសុខ​សម្លាប់​អ្នក​ប្រឆាំង​តវ៉ា​ជាង​២.១០០​នាក់​ចាប់​តាំងពី​ពេល​ខ្លួន​ធ្វើ​រដ្ឋប្រហារ​ដណ្តើម​អំណាច​មក​៕

​ស្ថានភាព​ប្រទេស​ក្នុង​គ្រាអាសន្ន​ត្រូវបាន​ប្រកាស​ដំបូង​នៅ​ខែ​កុម្ភៈ ឆ្នាំ​២០២១ ក្រោយ​ក្រុម​យោធា​មី​យ៉ាន់​ម៉ា​ទម្លាក់​រដ្ឋាភិបាល​ស៊ីវិល​ដឹកនាំ​ដោយ​លោកស្រី អ៊ុង សាន ស៊ូ​ជី