​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ប្រមុខ​អង្គការ​សហប្រជាជាតិ​លោក អង់​តូ​នីញ៉ូ គូថេ​រ៉េស បាន​និយាយថា លោក​មាន​ការ​ខឹងសម្បា​យ៉ាងខ្លាំង​បន្ទាប់ពី​មនុស្ស​ពីរ​នាក់​បាន​ស្លាប់​និង​ជាច្រើន​នាក់​​ទៀត​បាន​រងរបួស នៅពេល​ដែល​កង​រក្សា​សន្តិភាពអ​.​ស​.​ប​បាន​បើក​ការបាញ់ប្រហារ​អំឡុង​ឧបទ្ទវហេតុ​មួយ​នៅ​ភាគ​ខាងកើត​នៃ​សាធារណរដ្ឋ​ប្រជាធិបតេយ្យ​កុង​ហ្គោ​នៅតាម​ព្រំដែន​ប្រទេស​អ៊ូ​ហ្គង់​ដា​​កាលពី​ថ្ងៃអាទិត្យ​ទី​៣១​កក្កដា​។​

​កងកម្លាំង MONUSCO របស់​អ​.​ស​.​ប​បាន​ទទួលស្គាល់ថា កង​រក្សាសន្តិភាព​រប​ស់​ខ្លួន​មួយចំនួន​បាន​បើក​ការបាញ់ “​ដោយ​គ្មាន​ហេតុផល​អាច​ពន្យល់បាន​” ដោយ​បន្ថែម​ថា​ការចាប់ខ្លួន​ត្រូវបាន​ធ្វើឡើង​​រួចហើយ​។​

​សេចក្តីថ្លែងការណ៍​របស់អ​.​ស​.​ប​និយាយថា លោក​គូថេ​រ៉េស “​មាន​ការសោកស្ដាយ​និង​រន្ធត់ចិត្ត​” ដែល​ដឹង​អំពី​ការបាញ់ប្រហារ​នេះ ហើយ​”​លោក​អគ្គលេខាធិការ​សង្កត់​ធ្ងន់​បំផុត​នូវ​តម្រូវការ​ក្នុង​ការបង្កើត​​គណនេយ្យភាព​សម្រាប់​ព្រឹត្តិការណ៍​ទាំងនេះ​”​។​

​សេចក្តីថ្លែងការណ៍​បាន​បន្ថែមថា “​លោក​ស្វាគមន៍​ការសម្រេចចិត្ត​របស់​អ្នកតំណាង​ពិសេស​របស់​គាត់​នៅ​សាធារណរដ្ឋ​ប្រជាធិបតេយ្យ​កុង​ហ្គោ​ក្នុង​ការឃុំ​ខ្លួន​បុគ្គលិក MONUSCO​ដែល​ពាក់ព័ន្ធ​ក្នុងឧ​ប​​ទ្ទ​វហេតុ​នេះ​និង​បើក​ការស៊ើបអង្កេត​ភ្លាមៗ​”​។​

​វីដេអូ​នៃ​ឧបទ្ទវហេតុ​នេះ ដែល​ត្រូវបាន​ចែករំលែក​នៅលើ​បណ្តាញ​សង្គម បានបង្ហាញ​បុរស​យ៉ាងហោច​ណាស់​ម្នាក់​ក្នុង​ឯកសណ្ឋាន​ប៉ូលិស​និង​ម្នាក់​ទៀត​ក្នុង​ឯកសណ្ឋាន​កងទ័ព​ដើរ​ឆ្ពោះទៅកាន់​ក្បួន​រថ​​យន្ត​របស់​អ​.​ស​.​ប ពីក្រោយរ​បាំងបិទ​ជិត​មួយ​នៅក្នុង​ទីប្រជុំជន​កា​ស៊ីន​ឌី (Kasindi) ។​

​ទីប្រជុំជន​នេះ​ស្ថិតនៅ​ក្នុង​ទឹកដី​បេនី (Beni) ភាគ​ខាងកើត​នៃ​ប្រទេស​កុង​ហ្គោ​ជាប់​ព្រំដែន​ជាមួយ​អ៊ូ​ហ្គង់​ដា​។​

​ក្រោយពី​មាន​ការ​ផ្តោះផ្តង​ពាក្យសម្តី កង​រក្សា​សន្តិភាព​បាន​បើក​ការបាញ់ប្រហារ​មុនពេល​បើក​ទម្លុះ​របាំង ហើយ​បើកបរ​ឆ្លងកាត់ ខណៈ​មនុស្ស​នាំគ្នា​រត់​ចែក​ជើង​គ្នា​ឬ​លាក់ខ្លួន​។​

​បេសកកម្ម​របស់​អ​.​ស​.​ប​នៅ​ទីក្រុង​កា​ស៊ីន​ឌី​បាន​និយាយ​នៅក្នុង​សេចក្តីថ្លែងការណ៍​មួយ​កាលពី​ថ្ងៃអាទិត្យ​ថា “​ក្នុង​អំឡុងពេល​នៃ​ឧបទ្ទវហេតុ​នេះ ទាហាន​មក​ពី​កងពលតូច​អន្តរាគមន៍​នៃ​កងកម្លាំង MONUSCO ដែល​ត្រឡប់​មកពី​ឈប់សម្រាក​វិញ បាន​បើក​ការបាញ់ប្រហារ​លើ​ប៉ុស្តិ៍​ព្រំដែន​សម្រាប់​ហេតុផល​ដែល​មិន​អាច​ពន្យល់បាន​និង​បាន​បើកបរ​ទម្លុះ​ឆ្លងកាត់​ទីនោះ​។​ឧបទ្ទវហេតុ​ដ៏​ធ្ងន់ធ្ងរ​​នេះ​បាន​បណ្តាលឱ្យ​បាត់បង់​អាយុជីវិត​និង​របួស​ធ្ងន់ធ្ងរ​”​។​

​អ្នកនាំពាក្យ​រដ្ឋាភិបាល​លោក ផា​ទ្រី​ក មូ​យ៉ាយ៉ា (Patrick Muyaya) បាន​និយាយ​នៅក្នុង​សេចក្តីថ្លែងការណ៍​មួយ​ថា សាធារណរដ្ឋ​ប្រជាធិបតេយ្យ​កុង​ហ្គោ​”​ថ្កោលទោស​យ៉ាង​ដាច់អហង្ការ​និង​​សោកស្ដាយ​ចំពោះឧ​ហ​ទ្ទ​វហេតុ​ដ៏​អកុសល​នេះ ដែល​ជនរួមជាតិ​ពីរ​នាក់​បាន​ស្លាប់ និង​១៥ នាក់​ផ្សេងទៀត​បាន​រងរបួស​ដោ​យ​សារ​តែ​ការបើកបរ​ទម្លុះ​របាំង​បែបនេះ​”៕

ប្រមុខ​អង្គការ​សហប្រជាជាតិ​លោក អង់​តូ​នីញ៉ូ គូថេ​រ៉េស