​ប្រែ​សម្រួល : កញ្ញា​ដា​លី​ស (​ស៊ីនហួ​) ៖ យោងតាម​របាយការណ៍​ពី​វេបសាយ​វាយតម្លៃ Fitch Ratings បានឱ្យដឹងថា​ទីផ្សារ​រថយន្ត​ដឹក​អ្នកដំណើរ​របស់​ចិន​បានឃើញ​ការ​ស្ទុះ​ងើប​ឡើងវិញ​យ៉ាង​​ខ្លាំង​នៅក្នុង​ខែមិថុនា ដែល​ត្រូវបាន​ជំរុញ​ដោយ​កញ្ចប់​ថវិកា​ជំរុញ​អ្នក​ប្រើប្រាស់​ដ៏​រឹងមាំ​របស់​ប្រទេស​។​

​របាយការណ៍​នេះ​បាន​និយាយថា “​ការ​ស្ទុះ​ងើប​ឡើងវិញ​ដ៏​រឹងមាំ​នេះ​ទំនងជា​នឹង​បន្ត​រហូត​ដល់​ត្រីមាស​ទី​បី​នៃ​ឆ្នាំ ២០២២ ពី​កម្រិត​ធ្លាក់ចុះ​កាលពី​ឆ្នាំមុន ដោយសារ​តែ​កង្វះខាត​មីក្រូ​ឈីបធ្ងន់ធ្ងរ​”​។​

​របាយការណ៍​បាន​និយាយទៀតថា កាលពី​ខែ​មុន​ការ​ចែកចាយ​រថយន្ត​លក់ដុំ​បាន​កើនឡើង ៤២ ភាគរយ​ធៀប​ឆ្នាំមុន ខណៈ​ការ​លក់រាយ​បាន​កើនឡើង ២២ ភាគរយ​ធៀប​នឹង​ឆ្នាំ​មុន​ដែល​មួយ​ផ្នែក​គឺ​​ដោយសារ​តែ​ការបញ្ជាទិញ​ដែល​បាន​ពន្យារពេល​មួយចំនួន​ពី​ខែ​ឧសភា និង​តម្រូវការ​ផ្ទុះឡើង​ពី​ខែ​កក្កដា​។​

​ការនាំ​ចេញ​រថយន្ត​ដឹក​អ្នកដំណើរ​របស់​ចិន​បាន​បន្ត​កើនឡើង​យ៉ាងរឹងមាំ ៤០ ភាគរយ​ធៀប​ឆ្នាំ​មុន​ក្នុង​ត្រីមាស​ទី​ពីរ​ឆ្នាំ ២០២២​ដែល​ជា​លទ្ធផល​នៃ​តម្រូវការ​រថយន្ត​អគ្គិសនី​ខ្លាំងក្លា​នៅ​ក្រៅ​ប្រទេស​និង​​ការរាំងស្ទះ​ការផ្គត់ផ្គង់​នៅក្នុង​តំបន់​ផ្សេងទៀត​។​

​ទោះបីជា​មាន​ការយឺតយ៉ាវ​ក្នុង​ខែ​មេសា​និង​ឧសភា​ចំពេល​មាន​ការផ្អាក​ផលិតកម្ម​និង​ការស្ទះ​ខ្សែសង្វាក់​ផ្គត់ផ្គង់​ក៏ដោយ ក៏​ការ​ចែកចាយ​រថយន្ត​អគ្គិសនី​បាន​កើនឡើង​ទ្វេដង​ធៀប​នឹង​ឆ្នាំ​មុន​នៅក្នុង​ត្រីមាស​ទី​ពីរ ដែល​ស្មើនឹង​ជាង ២៦ ភាគរយ​នៃ​ចំនួន​រថយន្ត​ដឹក​អ្នកដំណើរ​។​

​ទិន្នន័យ​ផ្លូវការ​បាន​បង្ហាញថា ការលក់​រថយន្ត​ថាមពល​ថ្មី​ក្នុង​ខែមិថុនា​បាន​កើនឡើង​ដល់​កម្រិត​ខ្ពស់​បំផុត​គឺ ៥៩៦.០០០ គ្រឿង ដោយ​កើនឡើង ១,៣ ដង​ធៀប​នឹង​ខែ​ដូច​គ្នា​នៃ​ឆ្នាំមុន​៕

​មនុស្ស​នាំគ្នា​មក​មើល​ការតាំងពិព័រណ៍​រថយន្ត​អគ្គិសនី​របស់​ក្រុមហ៊ុន BYD នៅ​ទីក្រុង​ចាង​ជុន ខេត្ត​ជី​លីន កាលពី​ថ្ងៃទី ១៥ កក្កដា ឆ្នាំ​២០២២