ដោយៈ ប​.​ខុន / ភ្នំពេញៈ នៅ​ខេត្តកណ្តាល មាន​ប្រជា​នេសាទ ចំនួន​៤​នាក់ បានដាក់​ពាក្យ ចូលរួម​ដេញថ្លៃ​ឈ្នួល​ដាយ​ត្រី សម្រាប់ធ្វើ​អាជីវកម្ម ក្នុង​រដូវ​នេសាទ ឆ្នាំ​២០២២-២០២៣ និង​ឆ្នាំ​២០២៣-២០២៤ នៅសល់​គន្លង​ដាយ ចំនួន​១៩ គ្មាន​អ្នកដាក់ពាក្យ​ដេញថ្លៃ​។ ការដេញថ្លៃ នឹង​ប្រព្រឹត្តទៅ នៅ​ថ្ងៃទី​៥ ខែសីហា នៅ​សាលា​ខេត្តកណ្តាល​។​

​លោក ហេង សុភា​រិ​ទ្ធ នាយ​ខណ្ឌ​រដ្ឋបាល​ជល ខេត្តកណ្តាល បាន​ប្រាប់​ឱ្យ​រស្មី​កម្ពុជា​ដឹង នៅ​ថ្ងៃទី​១ ខែសីហា ឆ្នាំ​២០២២​ថាៈ ការដេញថ្លៃ​ឈ្នួល​ដាយ​ត្រី សម្រាប់ធ្វើ​អាជីវកម្ម តាម​គន្លង​ដាយ ក្នុងភូមិ​សាស្ត្រ​ខេត្តកណ្តាល នឹង​ប្រព្រឹត្តទៅ នៅ​ថ្ងៃទី​៥ ខែសីហា ដោយ​មកដល់ពេលនេះ (១​សីហា​) មាន​អ្នកដាក់ពាក្យ​បាន​ចំនួន ៤​នាក់ ដោយ​បីនាក់​នៅ​ជួរ លេខ​១៥ មាន​គន្លង​ដាយ​១៥​អាង ១៥​បេ និង​១៥​សេ ហើយនឹង​ជួរ​លេខ​១១​អា​។​

​លោក ហេង សុភា​រិ​ទ្ធ បាន​និយាយ​ឱ្យដឹងទៀតថាៈ គន្លង​ដាយ​ត្រី នៅក្នុង​ខេត្តកណ្តាល ដែល​ត្រូវ​ប្រកាស​ដាក់ឱ្យ​ដេញថ្លៃ មាន​ចំនួន ២៣ គន្លង​ដាយ​។ គន្លង​ដាយ​ដែល​គ្មាន​អ្នក​ដាក់ ពាក្យ​ដេញថ្លៃ លើក​នេះ អាច​នឹង​ប្រកា​សរក​អ្នកដេញថ្លៃ លើក​ទី​២ ឬ​ប្រកាស​ដាក់ឱ្យ​ជួល នៅពេល​បន្ទាប់​ទៀត​។ គន្លង​ដាយ​ខ្លះ គ្មាន​អ្នក​ជួល តាំងពី​ឆ្នាំមុន​មកម្ល៉េះ ដោយសារ ស្ថានភាព​ទឹកទន្លេ ប៉ុន្មាន​ឆ្នាំ​ចុងក្រោយ ឡើង​មិនធំ​។​

រំលឹក​ឱ្យដឹងថា កាលពី​ថ្ងៃទី​២៨ ខែមិថុនា ឆ្នាំ​២០២២ រដ្ឋបាល​ជលផល នៃ​ក្រសួងកសិកម្ម រុក្ខាប្រមាញ់ និង​នេសាទ ជូនដំណឹង ស្តីពី​ការដេញ​ថ្លៃឈ្នួល​ដាយ​ត្រី ដាយ​ត្រី​លេញ និង​ដាយ​បង្ក ចំនួន​ចំនួន ៥៣ គន្លង ដាយ ស្ថិតនៅក្នុង​ភូមិសាស្ត្រ រាជធានី​ភ្នំពេញ ខេត្តកណ្តាល និង​ខេត្តព្រៃវែង សម្រាប់ធ្វើ​អាជីវកម្ម ក្នុង​រដូវ​នេសាទ ឆ្នាំ​២០២២-២០២៣ និង​ឆ្នាំ​២០២៣-២០២៤​។​

​នៅក្នុង​សេចក្តីជូនដំណឹង ដែល​ចុះហត្ថលេខា ដោយ​លោក ពុំ សុថា ប្រតិភូ​រាជរដ្ឋាភិបាល ទទួលបន្ទុក​ជា ប្រធាន​រដ្ឋបាល​ជលផល បាន​សរស​រថាៈ រដ្ឋបាល​ជលផល នឹង​រៀបចំ ដេញថ្លៃ​ឈ្នួល​ដាយ​ត្រី នៅ​រាជធានី​ភ្នំពេញ ខេត្តកណ្តាល និង​ដាយ​ត្រី​លេញ ដាយ​បង្កង នៅ​ខេត្តព្រៃវែង សម្រាប់ធ្វើ​អាជីវកម្ម ក្នុង​រដូវ​នេសាទ ឆ្នាំ​២០២២-២០២៣ និង​ឆ្នាំ​២០២៣-២០២៤ ដែល​នឹង​ប្រព្រឹត្តទៅ នៅ​ខេត្តព្រៃវែង ថ្ងៃទី​២៨ ខែកក្កដា ឆ្នាំ​២០២២ នៅ​រាជធានី​ភ្នំពេញ ថ្ងៃទី​៣ ខែសីហា ឆ្នាំ​២០២២ និង​នៅ​ខេត្តកណ្តាល ថ្ងៃទី​៥ ខែសីហា ឆ្នាំ​២០២២​។​

​ក្នុង​សេចក្តីជូនដំណឹង បាន​សរសេរ​ទៀតថាៈ ពលរដ្ឋ​ខ្មែរ​គ្រប់រូប មាន​សិទ្ធិ​ចូលរួម​ដេញថ្លៃ ដាយ​ត្រី នៅ​រាជធានី​ភ្នំពេញ ខេត្តកណ្តាល និង ដាយ​ត្រី​លេញ ដាយ​បង្កង នៅ​ខេត្តព្រៃវែង ដោយ​ត្រូវដាក់​ពាក្យសុំ​ដេញថ្លៃ ធ្វើ​អាជីវក​ម្មដាយ​ត្រី ដាយ​ត្រី​លេញ និង​ដាយ​បង្កង យ៉ាង​យឺត​បំផុត ១០ ថ្ងៃ មុនពេល​ដេញថ្លៃ នៅ​ខណ្ឌ​រដ្ឋបាល​ជលផល​ព្រៃវែង ខណ្ឌ​រដ្ឋបាល​ជលផល​កណ្តាល និង​ខណ្ឌ​រដ្ឋបាល​ជល​ផល​ភ្នំពេញ នៃ​មន្ទីរ​កសិកម្ម រុក្ខាប្រមាញ់ និង​នេសាទ រាជធានី​-​ខេត្ត​។​

​គន្លង​ដាយ​ត្រី ដែល​ត្រូវ​ដាក់ឱ្យ​ដេញថ្លៃ មាន​ចំនួន ១៧ នៅ​រាជធានី​ភ្នំពេញ ចំនួន ២៣ នៅ​ខេត្តកណ្តាល និង​ចំនួន​១៣ នៅ​ខេត្តព្រៃវែង ដែល​ក្នុងនេះ មាន​ដាយ​ត្រី​លេញ ចំនួន​៦ និង​ដាយ​បង្កង ចំនួន​៧៕/V​