ដោយៈ ទេ​ពក​ង្រី / កំពង់ឆ្នាំងៈ នៅ​ថ្ងៃទី​១ ខែសីហា ឆ្នាំ​២០២២ លោក ស៊ុន សុ​វណ្ណា​រិ​ទ្ធិ អភិបាលខេត្ត​កំពង់ឆ្នាំង ដោយមាន​ការចូលរួម​ពី​អភិបាលរង​ខេត្ត លោកនាយក​រដ្ឋបាល លោក​ប្រធាន​មន្ទីរ​សេដ្ឋកិច្ច​និង​ហិរញ្ញវត្ថុ​ខេត្ត និង ប្រធាន​មន្ទីរ​បរិស្ថាន​ខេត្ត បានប្រគល់ រថយន្ត​ដឹក​សំរាម ចំនួន ៣ គ្រឿង ជូន​ដល់​រដ្ឋបាល​ក្រុង​កំពង់ឆ្នាំង រដ្ឋបាល​ស្រុក​រលាប្អៀរ និង​រដ្ឋបាល​ស្រុក​កំពង់ត្រឡាច ដែលជា​អំណោយ​របស់លោក សាយ សំ​អាល់ រដ្ឋមន្ត្រី​ក្រសួងបរិស្ថាន និង​ស្ថានទូត​ជប៉ុន ប្រចាំ​កម្ពុជា​។

​រថយន្ត​ដឹក​សំរាម​ទាំងនេះ នឹងចូលរួម​គាំទ្រ​ផ្តល់​សេវា​ប្រមូល សម្អាត ដឹកជញ្ជូន​សំរាម សំណល់​រឹង នៅក្នុង​មូលដ្ឋាន បាន​កាន់តែ​ល្អប្រសើរ និង​ធានា​និរន្តរភាព ព្រមទាំង​ភាពជា ម្ចាស់​របស់​អាជ្ញាធរ​មូ​ល​ដ្ឋា​ន ក្នុងការ​គ្រប់គ្រង​សំរាម សំណល់​រឹង ដើម្បី​បរិស្ថាន​ល្អ ។​

​ក្រោយពី​បានប្រគល់​រថយន្ត​ដឹក​សម្រាម​រួចមក លោក​អភិបាលខេត្ត​កំពង់ឆ្នាំង បាន​បន្ត​អញ្ជើញ​ទៅពិនិត្យ​មើល កូន​ដើមឈើ ប្រភេទ​ដើម​ក្ងោក និង​ដើម​ម៉ៃសាក់ ដែលជា​អំណោយ​របស់លោក​រដ្ឋមន្ត្រី​ក្រសួងបរិស្ថាន ផ្ដល់ជូន​រដ្ឋបាលខេត្ត សម្រាប់​ដាំ​លម្អ នៅតាម​ដងផ្លូវ និង​ទីសាធារណៈ​ក្នុង​ក្រុង និង​តាម​បណ្តា​ស្រុក​។​

​ក្នុងឱកាស​នោះ​ផងដែរ លោក​អភិបាលខេត្ត បាន​ណែនាំ​ដល់​រដ្ឋបាល​ក្រុង ស្រុក ឲ្យ​រៀបចំ​ផែនការ​ដាំ​កូន​ដើមឈើ​ទាំងនេះ ដើម្បី​លើកកម្ពស់​សោភ័ណភាព​ទីក្រុង ទីប្រជុំជនឲ្យ​កាន់តែ​ស្រស់បំព្រង និង​មាន​បរិស្ថាន​ល្អ​ប​ន្ដែ​ម​ទៀត ដើម្បី​ទាក់ទាញ​ភ្ញៀវទេសចរ​ជាតិ និង​អន្តរជាតិ ឆ្លងកាត់​ទៅមក​បានក​ម្សា​ន្ត​ផងដែរ ៕/V​